অধ্যায় 207

207.1

বৈশংপায়ন উবাচ
শ্রুত্বেমাং ধর্মসংয়ুক্তাং ধর্মরাজঃ কথাং শুভাম্
পুনঃ পপ্রচ্ছ তমৃষিং মার্কণ্ডেয়ং তপস্বিনম্

যুধিষ্ঠির উবাচ
কথমগ্নির্বনং যাতঃ কথং চাপ্যঙ্গিরাঃ পুরা
নষ্টেঽগ্নৌ হব্যমবহদগ্নির্ভূত্বা মহানৃষিঃ

অগ্নির্যদা ত্বেক এব বহুত্বং চাস্য কর্মসু
দৃশ্যতে ভগবন্সর্বমেতদিচ্ছামি বেদিতুম্

কুমারশ্চ যথোত্পন্নো যথা চাগ্নেঃ সুতোঽভবৎ
যথা রুদ্রাচ্চ সংভূতো গঙ্গায়াং কৃত্তিকাসু চ

এতদিচ্ছাম্যহং ত্বত্তঃ শ্রোতুং ভার্গবনন্দন
কৌতূহলসমাবিষ্টো যথাতথ্যং মহামুনে

মার্কণ্ডেয় উবাচ
অত্রাপ্যুদাহরন্তীমমিতিহাসং পুরাতনম্
যথা ক্রুদ্ধো হুতবহস্তপস্তপ্তুং বনং গতঃ

যথা চ ভগবানগ্নিঃ স্বয়মেবাঙ্গিরাভবৎ
সংতাপয়ন্স্বপ্রভয়া নাশয়ংস্তিমিরাণি চ

আশ্রমস্থো মহাভাগো হব্যবাহং বিশেষয়ন্
তথা স ভূত্বা তু তদা জগত্সর্বং প্রকাশয়ন্

তপশ্চরংশ্চ হুতভুক্সংতপ্তস্তস্য তেজসা
ভৃশং গ্লানশ্চ তেজস্বী ন স কিংচিত্প্রজজ্ঞিবান্

অথ সংচিন্তয়ামাস ভগবান্হব্যবাহনঃ
অন্যোঽগ্নিরিহ লোকানাং ব্রহ্মণা সংপ্রবর্তিতঃ
অগ্নিত্বং বিপ্রনষ্টং হি তপ্যমানস্য মে তপঃ

কথমগ্নিঃ পুনরহং ভবেয়মিতি চিন্ত্য সঃ
অপশ্যদগ্নিবল্লোকাংস্তাপয়ন্তং মহামুনিম্

সোপাসর্পচ্ছনৈর্ভীতস্তমুবাচ তদাঙ্গিরাঃ
শীঘ্রমেব ভবস্বাগ্নিস্ত্বং পুনর্লোকভাবনঃ
বিজ্ঞাতশ্চাসি লোকেষু ত্রিষু সংস্থানচারিষু

ত্বমগ্নে প্রথমঃ সৃষ্টো ব্রহ্মণা তিমিরাপহঃ
স্বস্থানং প্রতিপদ্যস্ব শীঘ্রমেব তমোনুদ

অগ্নিরুবাচ
নষ্টকীর্তিরহং লোকে ভবাঞ্জাতো হুতাশনঃ
ভবন্তমেব জ্ঞাস্যন্তি পাবকং ন তু মাং জনাঃ

নিক্ষিপাম্যহমগ্নিত্বং ত্বমগ্নিঃ প্রথমো ভব
ভবিষ্যামি দ্বিতীয়োঽহং প্রাজাপত্যক এব চ

অঙ্গিরা উবাচ
কুরু পুণ্যং প্রজাস্বর্গ্যং ভবাগ্নিস্তিমিরাপহঃ
মাং চ দেব কুরুষ্বাগ্নে প্রথমং পুত্রমঞ্জসা

মার্কণ্ডেয় উবাচ
তচ্ছ্রুত্বাঙ্গিরসো বাক্যং জাতবেদাস্তথাকরোৎ
রাজন্বৃহস্পতির্নাম তস্যাপ্যঙ্গিরসঃ সুতঃ

জ্ঞাত্বা প্রথমজং তং তু বহ্নেরাঙ্গিরসং সুতম্
উপেত্য দেবাঃ পপ্রচ্ছুঃ কারণং তত্র ভারত

স তু পৃষ্টস্তদা দেবৈস্ততঃ কারণমব্রবীৎ
প্রত্যগৃহ্ণংস্তু দেবাশ্চ তদ্বচোঽঙ্গিরসস্তদা

অত্র নানাবিধানগ্নীন্প্রবক্ষ্যামি মহাপ্রভান্
কর্মভির্বহুভিঃ খ্যাতান্নানাত্বং ব্রাহ্মণেষ্বিহ