অধ্যায় 208

208.1

মার্কণ্ডেয় উবাচ
ব্রহ্মণো যস্তৃতীয়স্তু পুত্রঃ কুরুকুলোদ্বহ
তস্যাপবসুতা ভার্যা প্রজাস্তস্যাপি মে শৃণু

বৃহজ্জ্যোতির্বৃহত্কীর্তির্বৃহদ্ব্রহ্মা বৃহন্মনাঃ
বৃহন্মন্ত্রো বৃহদ্ভাসস্তথা রাজন্বৃহস্পতিঃ

প্রজাসু তাসু সর্বাসু রূপেণাপ্রতিমাভবৎ
দেবী ভানুমতী নাম প্রথমাঙ্গিরসঃ সুতা

ভূতানামেব সর্বেষাং যস্যাং রাগস্তদাভবৎ
রাগাদ্রাগেতি যামাহুর্দ্বিতীয়াঙ্গিরসঃ সুতা

যাং কপর্দিসুতামাহুর্দৃশ্যাদৃশ্যেতি দেহিনঃ
তনুত্বাত্সা সিনীবালী তৃতীয়াঙ্গিরসঃ সুতা

পশ্যত্যর্চিষ্মতী ভাভির্হবির্ভিশ্চ হবিষ্মতী
ষষ্ঠীমঙ্গিরসঃ কন্যাং পুণ্যামাহুর্হবিষ্মতীম্

মহামখেষ্বাঙ্গিরসী দীপ্তিমত্সু মহামতী
মহামতীতি বিখ্যাতা সপ্তমী কথ্যতে সুতা

যাং তু দৃষ্ট্বা ভগবতীং জনঃ কুহুকুহায়তে
একানংশেতি যামাহুঃ কুহূমঙ্গিরসঃ সুতাম্