অধ্যায় 209

209.1

মার্কণ্ডেয় উবাচ
বৃহস্পতেশ্চান্দ্রমসী ভার্যাভূদ্যা যশস্বিনী
অগ্নীন্সাজনয়ত্পুণ্যান্ষডেকাং চাপি পুত্রিকাম্

209.2

আহুতিষ্বেব যস্যাগ্নের্হবিষাজ্যং বিধীয়তে
সোঽগ্নির্বৃহস্পতেঃ পুত্রঃ শংয়ুর্নাম মহাপ্রভঃ

209.3

চাতুর্মাস্যেষু যস্যেষ্ট্যামশ্বমেধেঽগ্রজঃ পশুঃ
দীপ্তো জ্বালৈরনেকাভৈরগ্নিরেকোঽথ বীর্যবান্

209.4

শংয়োরপ্রতিমা ভার্যা সত্যা সত্যা চ ধর্মজা
অগ্নিস্তস্য সুতো দীপ্তস্তিস্রঃ কন্যাশ্চ সুব্রতাঃ

209.5

প্রথমেনাজ্যভাগেন পূজ্যতে যোঽগ্নিরধ্বরে
অগ্নিস্তস্য ভরদ্বাজঃ প্রথমঃ পুত্র উচ্যতে

209.6

পৌর্ণমাস্যেষু সর্বেষু হবিষাজ্যং স্রুবোদ্যতম্
ভরতো নামতঃ সোঽগ্নির্দ্বিতীয়ঃ শংয়ুতঃ সুতঃ

209.7

তিস্রঃ কন্যা ভবন্ত্যন্যা যাসাং স ভরতঃ পতিঃ
ভরতস্তু সুতস্তস্য ভরত্যেকা চ পুত্রিকা

209.8

ভরতো ভরতস্যাগ্নেঃ পাবকস্তু প্রজাপতেঃ
মহানত্যর্থমহিতস্তথা ভরতসত্তম

209.9

ভরদ্বাজস্য ভার্যা তু বীরা বীরশ্চ পিণ্ডদঃ
প্রাহুরাজ্যেন তস্যেজ্যাং সোমস্যেব দ্বিজাঃ শনৈঃ

209.10

হবিষা যো দ্বিতীয়েন সোমেন সহ যুজ্যতে
রথপ্রভূ রথধ্বানঃ কুম্ভরেতাঃ স উচ্যতে

209.11

সরয্বাং জনয়ত্সিদ্ধিং ভানুং ভাভিঃ সমাবৃণোৎ
আগ্নেয়মানয়ন্নিত্যমাহ্বানেষ্বেষ কথ্যতে

209.12

যস্তু ন চ্যবতে নিত্যং যশসা বর্চসা শ্রিয়া
অগ্নির্নিশ্চ্যবনো নাম পৃথিবীং স্তৌতি কেবলম্

209.13

বিপাপ্মা কলুষৈর্মুক্তো বিশুদ্ধশ্চার্চিষা জ্বলন্
বিপাপোঽগ্নিঃ সুতস্তস্য সত্যঃ সময়কর্মসু

209.14

আক্রোশতাং হি ভূতানাং যঃ করোতি হি নিষ্কৃতিম্
অগ্নিঃ স নিষ্কৃতির্নাম শোভয়ত্যভিসেবিতঃ

209.15

অনুকূজন্তি যেনেহ বেদনার্তাঃ স্বয়ং জনাঃ
তস্য পুত্রঃ স্বনো নাম পাবকঃ স রুজস্করঃ

209.16

যস্তু বিশ্বস্য জগতো বুদ্ধিমাক্রম্য তিষ্ঠতি
তং প্রাহুরধ্যাত্মবিদো বিশ্বজিন্নাম পাবকম্

209.17

অন্তরাগ্নিঃ শ্রিতো যো হি ভুক্তং পচতি দেহিনাম্
স যজ্ঞে বিশ্বভুঙ্নাম সর্বলোকেষু ভারত

209.18

ব্রহ্মচারী যতাত্মা চ সততং বিপুলব্রতঃ
ব্রাহ্মণাঃ পূজয়ন্ত্যেনং পাকয়জ্ঞেষু পাবকম্

209.19

প্রথিতো গোপতির্নাম নদী যস্যাভবত্প্রিয়া
তস্মিন্সর্বাণি কর্মাণি ক্রিয়ন্তে কর্মকর্তৃভিঃ

209.20

বডবামুখঃ পিবত্যম্ভো যোঽসৌ পরমদারুণঃ
ঊর্ধ্বভাগূর্ধ্বভাঙ্নাম কবিঃ প্রাণাশ্রিতস্তু সঃ

209.21

উদগ্দ্বারং হবির্যস্য গৃহে নিত্যং প্রদীয়তে
ততঃ স্বিষ্টং ভবেদাজ্যং স্বিষ্টকৃত্পরমঃ স্মৃতঃ

209.22

যঃ প্রশান্তেষু ভূতেষু মন্যুর্ভবতি পাবকঃ
ক্রোধস্য তু রসো জজ্ঞে মন্যতী চাথ পুত্রিকা
স্বাহেতি দারুণা ক্রূরা সর্বভূতেষু তিষ্ঠতি

209.23

ত্রিদিবে যস্য সদৃশো নাস্তি রূপেণ কশ্চন
অতুল্যত্বাত্কৃতো দেবৈর্নাম্না কামস্তু পাবকঃ

209.24

সংহর্ষাদ্ধারয়ন্ক্রোধং ধন্বী স্রগ্বী রথে স্থিতঃ
সমরে নাশয়েচ্ছত্রূনমোঘো নাম পাবকঃ

209.25

উক্থো নাম মহাভাগ ত্রিভিরুক্থৈরভিষ্টুতঃ
মহাবাচং ত্বজনয়ত্সকামাশ্বং হি যং বিদুঃ

Contains text from DharmicData, made available under the Open Database License (ODbL). Simple meanings are written by AI and can contain mistakes.