অধ্যায় 210

210.1

মার্কণ্ডেয় উবাচ
কাশ্যপো হ্যথ বাসিষ্ঠঃ প্রাণশ্চ প্রাণপুত্রকঃ
অগ্নিরাঙ্গিরসশ্চৈব চ্যবনস্ত্রিষুবর্চকঃ

অচরন্ত তপস্তীব্রং পুত্রার্থে বহুবার্ষিকম্
পুত্রং লভেম ধর্মিষ্ঠং যশসা ব্রহ্মণা সমম্

মহাব্যাহৃতিভির্ধ্যাতঃ পঞ্চভিস্তৈস্তদা ত্বথ
জজ্ঞে তেজোময়োঽর্চিষ্মান্পঞ্চবর্ণঃ প্রভাবনঃ

সমিদ্ধোঽগ্নিঃ শিরস্তস্য বাহূ সূর্যনিভৌ তথা
ত্বঙ্নেত্রে চ সুবর্ণাভে কৃষ্ণে জঙ্ঘে চ ভারত

পঞ্চবর্ণঃ স তপসা কৃতস্তৈঃ পঞ্চভির্জনৈঃ
পাঞ্চজন্যঃ শ্রুতো বেদে পঞ্চবংশকরস্তু সঃ

দশ বর্ষসহস্রাণি তপস্তপ্ত্বা মহাতপাঃ
জনয়ত্পাবকং ঘোরং পিতৄণাং স প্রজাঃ সৃজন্

বৃহদ্রথংতরং মূর্ধ্নো বক্ত্রাচ্চ তরসাহরৌ
শিবং নাভ্যাং বলাদিন্দ্রং বায্বগ্নী প্রাণতোঽসৃজৎ

বাহুভ্যামনুদাত্তৌ চ বিশ্বে ভূতানি চৈব হ
এতান্সৃষ্ট্বা ততঃ পঞ্চ পিতৄণামসৃজত্সুতান্

বৃহদূর্জস্য প্রণিধিঃ কাশ্যপস্য বৃহত্তরঃ
ভানুরঙ্গিরসো বীরঃ পুত্রো বর্চস্য সৌভরঃ

প্রাণস্য চানুদাত্তশ্চ ব্যাখ্যাতাঃ পঞ্চ বংশজাঃ
দেবান্যজ্ঞমুষশ্চান্যান্সৃজন্পঞ্চদশোত্তরান্

অভীমমতিভীমং চ ভীমং ভীমবলাবলম্
এতান্যজ্ঞমুষঃ পঞ্চ দেবানভ্যসৃজত্তপঃ

সুমিত্রং মিত্রবন্তং চ মিত্রজ্ঞং মিত্রবর্ধনম্
মিত্রধর্মাণমিত্যেতান্দেবানভ্যসৃজত্তপঃ

সুরপ্রবীরং বীরং চ সুকেশং চ সুবর্চসম্
সুরাণামপি হন্তারং পঞ্চৈতানসৃজত্তপঃ

ত্রিবিধং সংস্থিতা হ্যেতে পঞ্চ পঞ্চ পৃথক্পৃথক্
মুষ্ণন্ত্যত্র স্থিতা হ্যেতে স্বর্গতো যজ্ঞয়াজিনঃ

তেষামিষ্টং হরন্ত্যেতে নিঘ্নন্তি চ মহদ্ভুবি
স্পর্ধয়া হব্যবাহানাং নিঘ্নন্ত্যেতে হরন্তি চ

হবির্বেদ্যাং তদাদানং কুশলৈঃ সংপ্রবর্তিতম্
তদেতে নোপসর্পন্তি যত্র চাগ্নিঃ স্থিতো ভবেৎ

চিতোঽগ্নিরুদ্বহন্যজ্ঞং পক্ষাভ্যাং তান্প্রবাধতে
মন্ত্রৈঃ প্রশমিতা হ্যেতে নেষ্টং মুষ্ণন্তি যজ্ঞিয়ম্

বৃহদুক্থতপস্যৈব পুত্রো ভূমিমুপাশ্রিতঃ
অগ্নিহোত্রে হূয়মানে পৃথিব্যাং সদ্ভিরিজ্যতে

রথংতরশ্চ তপসঃ পুত্রোঽগ্নিঃ পরিপঠ্যতে
মিত্রবিন্দায় বৈ তস্য হবিরধ্বর্যবো বিদুঃ
মুমুদে পরমপ্রীতঃ সহ পুত্রৈর্মহায়শাঃ