Utshovঅধ্যায় 211
211.1
মার্কণ্ডেয় উবাচ
গুরুভির্নিয়মৈর্যুক্তো ভরতো নাম পাবকঃ
অগ্নিঃ পুষ্টিমতির্নাম তুষ্টঃ পুষ্টিং প্রয়চ্ছতি
ভরত্যেষ প্রজাঃ সর্বাস্ততো ভরত উচ্যতে
211.2
অগ্নির্যস্তু শিবো নাম শক্তিপূজাপরশ্চ সঃ
দুঃখার্তানাং স সর্বেষাং শিবকৃত্সততং শিবঃ
211.3
তপসস্তু ফলং দৃষ্ট্বা সংপ্রবৃদ্ধং তপো মহৎ
উদ্ধর্তুকামো মতিমান্পুত্রো জজ্ঞে পুরংদরঃ
211.4
ঊষ্মা চৈবোষ্মণো জজ্ঞে সোঽগ্নির্ভূতেষু লক্ষ্যতে
অগ্নিশ্চাপি মনুর্নাম প্রাজাপত্যমকারয়ৎ
211.5
শংভুমগ্নিমথ প্রাহুর্ব্রাহ্মণা বেদপারগাঃ
আবসথ্যং দ্বিজাঃ প্রাহুর্দীপ্তমগ্নিং মহাপ্রভম্
211.6
ঊর্জস্করান্হব্যবাহান্সুবর্ণসদৃশপ্রভান্
অগ্নিস্তপো হ্যজনয়ত্পঞ্চ যজ্ঞসুতানিহ
211.7
প্রশান্তেঽগ্নির্মহাভাগ পরিশ্রান্তো গবাংপতিঃ
অসুরাঞ্জনয়ন্ঘোরান্মর্ত্যাংশ্চৈব পৃথগ্বিধান্
211.8
তপসশ্চ মনুং পুত্রং ভানুং চাপ্যঙ্গিরাসৃজৎ
বৃহদ্ভানুং তু তং প্রাহুর্ব্রাহ্মণা বেদপারগাঃ
211.9
ভানোর্ভার্যা সুপ্রজা তু বৃহদ্ভাসা তু সোমজা
অসৃজেতাং তু ষট্পুত্রাঞ্শৃণু তাসাং প্রজাবিধিম্
211.10
দুর্বলানাং তু ভূতানাং তনুং যঃ সংপ্রয়চ্ছতি
তমগ্নিং বলদং প্রাহুঃ প্রথমং ভানুতঃ সুতম্
211.11
যঃ প্রশান্তেষু ভূতেষু মন্যুর্ভবতি দারুণঃ
অগ্নিঃ স মন্যুমান্নাম দ্বিতীয়ো ভানুতঃ সুতঃ
211.12
দর্শে চ পৌর্ণমাসে চ যস্যেহ হবিরুচ্যতে
বিষ্ণুর্নামেহ যোঽগ্নিস্তু ধৃতিমান্নাম সোঽঙ্গিরাঃ
211.13
ইন্দ্রেণ সহিতং যস্য হবিরাগ্রয়ণং স্মৃতম্
অগ্নিরাগ্রয়ণো নাম ভানোরেবান্বয়স্তু সঃ
211.14
চাতুর্মাস্যেষু নিত্যানাং হবিষাং যো নিরগ্রহঃ
চতুর্ভিঃ সহিতঃ পুত্রৈর্ভানোরেবান্বয়স্তু সঃ
211.15
নিশাং ত্বজনয়ত্কন্যামগ্নীষোমাবুভৌ তথা
মনোরেবাভবদ্ভার্যা সুষুবে পঞ্চ পাবকান্
211.16
পূজ্যতে হবিষাগ্র্যেণ চাতুর্মাস্যেষু পাবকঃ
পর্জন্যসহিতঃ শ্রীমানগ্নির্বৈশ্বানরস্তু সঃ
211.17
অস্য লোকস্য সর্বস্য যঃ পতিঃ পরিপঠ্যতে
সোঽগ্নির্বিশ্বপতির্নাম দ্বিতীয়ো বৈ মনোঃ সুতঃ
ততঃ স্বিষ্টং ভবেদাজ্যং স্বিষ্টকৃত্পরমঃ স্মৃতঃ
211.18
কন্যা সা রোহিণী নাম হিরণ্যকশিপোঃ সুতা
কর্মণাসৌ বভৌ ভার্যা স বহ্নিঃ স প্রজাপতিঃ
211.19
প্রাণমাশ্রিত্য যো দেহং প্রবর্তয়তি দেহিনাম্
তস্য সংনিহিতো নাম শব্দরূপস্য সাধনঃ
211.20
শুক্লকৃষ্ণগতির্দেবো যো বিভর্তি হুতাশনম্
অকল্মষঃ কল্মষাণাং কর্তা ক্রোধাশ্রিতস্তু সঃ
211.21
কপিলং পরমর্ষিং চ যং প্রাহুর্যতয়ঃ সদা
অগ্নিঃ স কপিলো নাম সাংখ্যয়োগপ্রবর্তকঃ
211.22
অগ্নির্যচ্ছতি ভূতানি যেন ভূতানি নিত্যদা
কর্মস্বিহ বিচিত্রেষু সোঽগ্রণীর্বহ্নিরুচ্যতে
211.23
ইমানন্যান্সমসৃজত্পাবকান্প্রথিতান্ভুবি
অগ্নিহোত্রস্য দুষ্টস্য প্রায়শ্চিত্তার্থমুল্বণান্
211.24
সংস্পৃশেয়ুর্যদান্যোন্যং কথংচিদ্বায়ুনাগ্নয়ঃ
ইষ্টিরষ্টাকপালেন কার্যা বৈ শুচয়েঽগ্নয়ে
211.25
দক্ষিণাগ্নির্যদা দ্বাভ্যাং সংসৃজেত তদা কিল
ইষ্টিরষ্টাকপালেন কার্যা বৈ বীতয়েঽগ্নয়ে
211.26
যদ্যগ্নয়ো হি স্পৃশ্যেয়ুর্নিবেশস্থা দবাগ্নিনা
ইষ্টিরষ্টাকপালেন কার্যা তু শুচয়েঽগ্নয়ে
211.27
অগ্নিং রজস্বলা চেত্স্ত্রী সংস্পৃশেদগ্নিহোত্রিকম্
ইষ্টিরষ্টাকপালেন কার্যা দস্যুমতেঽগ্নয়ে
211.28
মৃতঃ শ্রূয়েত যো জীবন্পরেয়ুঃ পশবো যথা
ইষ্টিরষ্টাকপালেন কর্তব্যাভিমতেঽগ্নয়ে
211.29
আর্তো ন জুহুয়াদগ্নিং ত্রিরাত্রং যস্তু ব্রাহ্মণঃ
ইষ্টিরষ্টাকপালেন কার্যা স্যাদুত্তরাগ্নয়ে
211.30
দর্শং চ পৌর্ণমাসং চ যস্য তিষ্ঠেত্প্রতিষ্ঠিতম্
ইষ্টিরষ্টাকপালেন কার্যা পথিকৃতেঽগ্নয়ে
211.31
সূতিকাগ্নির্যদা চাগ্নিং সংস্পৃশেদগ্নিহোত্রিকম্
ইষ্টিরষ্টাকপালেন কার্যা চাগ্নিমতেঽগ্নয়ে