UtshovChapter 211
211.1
मार्कण्डेय उवाच
गुरुभिर्नियमैर्युक्तो भरतो नाम पावकः
अग्निः पुष्टिमतिर्नाम तुष्टः पुष्टिं प्रयच्छति
भरत्येष प्रजाः सर्वास्ततो भरत उच्यते
Markandeya uvacha
Gurubhirniyamairyukto bharato nama pavakah
Agnih pushtimatirnama tushtah pushtim prayachchhati
Bharatyesha prajah sarvastato bharata uchyate
211.2
अग्निर्यस्तु शिवो नाम शक्तिपूजापरश्च सः
दुःखार्तानां स सर्वेषां शिवकृत्सततं शिवः
Agniryastu shivo nama shaktipujaparashcha sah
Duhkhartanam sa sarvesham shivakritsatatam shivah
211.3
तपसस्तु फलं दृष्ट्वा संप्रवृद्धं तपो महत्
उद्धर्तुकामो मतिमान्पुत्रो जज्ञे पुरंदरः
Tapasastu phalam drishtva sampravriddham tapo mahat
Uddhartukamo matimanputro jagye purandarah
211.4
ऊष्मा चैवोष्मणो जज्ञे सोऽग्निर्भूतेषु लक्ष्यते
अग्निश्चापि मनुर्नाम प्राजापत्यमकारयत्
Ushma chaivoshmano jagye sognirbhuteshu lakshyate
Agnishchapi manurnama prajapatyamakarayat
211.5
शंभुमग्निमथ प्राहुर्ब्राह्मणा वेदपारगाः
आवसथ्यं द्विजाः प्राहुर्दीप्तमग्निं महाप्रभम्
Shambhumagnimatha prahurbrahmana vedaparagah
Avasathyam dvijah prahurdiptamagnim mahaprabham
211.6
ऊर्जस्करान्हव्यवाहान्सुवर्णसदृशप्रभान्
अग्निस्तपो ह्यजनयत्पञ्च यज्ञसुतानिह
Urjaskaranhavyavahansuvarnasadrishaprabhan
Agnistapo hyajanayatpancha yagyasutaniha
211.7
प्रशान्तेऽग्निर्महाभाग परिश्रान्तो गवांपतिः
असुराञ्जनयन्घोरान्मर्त्यांश्चैव पृथग्विधान्
Prashantegnirmahabhaga parishranto gavampatih
Asuranjanayanghoranmartyanshchaiva prithagvidhan
211.8
तपसश्च मनुं पुत्रं भानुं चाप्यङ्गिरासृजत्
बृहद्भानुं तु तं प्राहुर्ब्राह्मणा वेदपारगाः
Tapasashcha manum putram bhanum chapyangirasrijat
Brihadbhanum tu tam prahurbrahmana vedaparagah
211.9
भानोर्भार्या सुप्रजा तु बृहद्भासा तु सोमजा
असृजेतां तु षट्पुत्राञ्शृणु तासां प्रजाविधिम्
Bhanorbharya supraja tu brihadbhasa tu somaja
Asrijetam tu shatputranshrinu tasam prajavidhim
211.10
दुर्बलानां तु भूतानां तनुं यः संप्रयच्छति
तमग्निं बलदं प्राहुः प्रथमं भानुतः सुतम्
Durbalanam tu bhutanam tanum yah samprayachchhati
Tamagnim baladam prahuh prathamam bhanutah sutam
211.11
यः प्रशान्तेषु भूतेषु मन्युर्भवति दारुणः
अग्निः स मन्युमान्नाम द्वितीयो भानुतः सुतः
Yah prashanteshu bhuteshu manyurbhavati darunah
Agnih sa manyumannama dvitiyo bhanutah sutah
211.12
दर्शे च पौर्णमासे च यस्येह हविरुच्यते
विष्णुर्नामेह योऽग्निस्तु धृतिमान्नाम सोऽङ्गिराः
Darshe cha paurnamase cha yasyeha haviruchyate
Vishnurnameha yognistu dhritimannama songirah
211.13
इन्द्रेण सहितं यस्य हविराग्रयणं स्मृतम्
अग्निराग्रयणो नाम भानोरेवान्वयस्तु सः
Indrena sahitam yasya haviragrayanam smritam
Agniragrayano nama bhanorevanvayastu sah
211.14
चातुर्मास्येषु नित्यानां हविषां यो निरग्रहः
चतुर्भिः सहितः पुत्रैर्भानोरेवान्वयस्तु सः
Chaturmasyeshu nityanam havisham yo niragrahah
Chaturbhih sahitah putrairbhanorevanvayastu sah
211.15
निशां त्वजनयत्कन्यामग्नीषोमावुभौ तथा
मनोरेवाभवद्भार्या सुषुवे पञ्च पावकान्
Nisham tvajanayatkanyamagnishomavubhau tatha
Manorevabhavadbharya sushuve pancha pavakan
211.16
पूज्यते हविषाग्र्येण चातुर्मास्येषु पावकः
पर्जन्यसहितः श्रीमानग्निर्वैश्वानरस्तु सः
Pujyate havishagryena chaturmasyeshu pavakah
Parjanyasahitah shrimanagnirvaishvanarastu sah
211.17
अस्य लोकस्य सर्वस्य यः पतिः परिपठ्यते
सोऽग्निर्विश्वपतिर्नाम द्वितीयो वै मनोः सुतः
ततः स्विष्टं भवेदाज्यं स्विष्टकृत्परमः स्मृतः
Asya lokasya sarvasya yah patih paripathyate
Sognirvishvapatirnama dvitiyo vai manoh sutah
Tatah svishtam bhavedajyam svishtakritparamah smritah
211.18
कन्या सा रोहिणी नाम हिरण्यकशिपोः सुता
कर्मणासौ बभौ भार्या स वह्निः स प्रजापतिः
Kanya sa rohini nama hiranyakashipoh suta
Karmanasau babhau bharya sa vahnih sa prajapatih
211.19
प्राणमाश्रित्य यो देहं प्रवर्तयति देहिनाम्
तस्य संनिहितो नाम शब्दरूपस्य साधनः
Pranamashritya yo deham pravartayati dehinam
Tasya sannihito nama shabdarupasya sadhanah
211.20
शुक्लकृष्णगतिर्देवो यो बिभर्ति हुताशनम्
अकल्मषः कल्मषाणां कर्ता क्रोधाश्रितस्तु सः
Shuklakrishnagatirdevo yo bibharti hutashanam
Akalmashah kalmashanam karta krodhashritastu sah
211.21
कपिलं परमर्षिं च यं प्राहुर्यतयः सदा
अग्निः स कपिलो नाम सांख्ययोगप्रवर्तकः
Kapilam paramarshim cha yam prahuryatayah sada
Agnih sa kapilo nama sankhyayogapravartakah
211.22
अग्निर्यच्छति भूतानि येन भूतानि नित्यदा
कर्मस्विह विचित्रेषु सोऽग्रणीर्वह्निरुच्यते
Agniryachchhati bhutani yena bhutani nityada
Karmasviha vichitreshu sogranirvahniruchyate
211.23
इमानन्यान्समसृजत्पावकान्प्रथितान्भुवि
अग्निहोत्रस्य दुष्टस्य प्रायश्चित्तार्थमुल्बणान्
Imananyansamasrijatpavakanprathitanbhuvi
Agnihotrasya dushtasya prayashchittarthamulbanan
211.24
संस्पृशेयुर्यदान्योन्यं कथंचिद्वायुनाग्नयः
इष्टिरष्टाकपालेन कार्या वै शुचयेऽग्नये
Sansprisheyuryadanyonyam kathanchidvayunagnayah
Ishtirashtakapalena karya vai shuchayegnaye
211.25
दक्षिणाग्निर्यदा द्वाभ्यां संसृजेत तदा किल
इष्टिरष्टाकपालेन कार्या वै वीतयेऽग्नये
Dakshinagniryada dvabhyam sansrijeta tada kila
Ishtirashtakapalena karya vai vitayegnaye
211.26
यद्यग्नयो हि स्पृश्येयुर्निवेशस्था दवाग्निना
इष्टिरष्टाकपालेन कार्या तु शुचयेऽग्नये
Yadyagnayo hi sprishyeyurniveshastha davagnina
Ishtirashtakapalena karya tu shuchayegnaye
211.27
अग्निं रजस्वला चेत्स्त्री संस्पृशेदग्निहोत्रिकम्
इष्टिरष्टाकपालेन कार्या दस्युमतेऽग्नये
Agnim rajasvala chetstri sansprishedagnihotrikam
Ishtirashtakapalena karya dasyumategnaye
211.28
मृतः श्रूयेत यो जीवन्परेयुः पशवो यथा
इष्टिरष्टाकपालेन कर्तव्याभिमतेऽग्नये
Mritah shruyeta yo jivanpareyuh pashavo yatha
Ishtirashtakapalena kartavyabhimategnaye
211.29
आर्तो न जुहुयादग्निं त्रिरात्रं यस्तु ब्राह्मणः
इष्टिरष्टाकपालेन कार्या स्यादुत्तराग्नये
Arto na juhuyadagnim triratram yastu brahmanah
Ishtirashtakapalena karya syaduttaragnaye
211.30
दर्शं च पौर्णमासं च यस्य तिष्ठेत्प्रतिष्ठितम्
इष्टिरष्टाकपालेन कार्या पथिकृतेऽग्नये
Darsham cha paurnamasam cha yasya tishthetpratishthitam
Ishtirashtakapalena karya pathikritegnaye
211.31
सूतिकाग्निर्यदा चाग्निं संस्पृशेदग्निहोत्रिकम्
इष्टिरष्टाकपालेन कार्या चाग्निमतेऽग्नये
Sutikagniryada chagnim sansprishedagnihotrikam
Ishtirashtakapalena karya chagnimategnaye