Utshovঅধ্যায় 212
212.1
মার্কণ্ডেয় উবাচ
আপস্য মুদিতা ভার্যা সহস্য পরমা প্রিয়া
ভূপতির্ভুবভর্তা চ জনয়ত্পাবকং পরম্
212.2
ভূতানাং চাপি সর্বেষাং যং প্রাহুঃ পাবকং পতিম্
আত্মা ভুবনভর্তেতি সান্বয়েষু দ্বিজাতিষু
212.3
মহতাং চৈব ভূতানাং সর্বেষামিহ যঃ পতিঃ
ভগবান্স মহাতেজা নিত্যং চরতি পাবকঃ
212.4
অগ্নির্গৃহপতির্নাম নিত্যং যজ্ঞেষু পূজ্যতে
হুতং বহতি যো হব্যমস্য লোকস্য পাবকঃ
212.5
অপাং গর্ভো মহাভাগঃ সহপুত্রো মহাদ্ভুতঃ
ভূপতির্ভুবভর্তা চ মহতঃ পতিরুচ্যতে
212.6
দহন্মৃতানি ভূতানি তস্যাগ্নির্ভরতোঽভবৎ
অগ্নিষ্টোমে চ নিয়তঃ ক্রতুশ্রেষ্ঠো ভরস্য তু
212.7
আয়ান্তং নিয়তং দৃষ্ট্বা প্রবিবেশার্ণবং ভয়াৎ
দেবাস্তং নাধিগচ্ছন্তি মার্গমাণা যথাদিশম্
212.8
দৃষ্ট্বা ত্বগ্নিরথর্বাণং ততো বচনমব্রবীৎ
দেবানাং বহ হব্যং ত্বমহং বীর সুদুর্বলঃ
অথর্বন্গচ্ছ মধ্বক্ষং প্রিয়মেতত্কুরুষ্ব মে
212.9
প্রেষ্য চাগ্নিরথর্বাণমন্যং দেশং ততোঽগমৎ
মত্স্যাস্তস্য সমাচখ্যুঃ ক্রুদ্ধস্তানগ্নিরব্রবীৎ
212.10
ভক্ষ্যা বৈ বিবিধৈর্ভাবৈর্ভবিষ্যথ শরীরিণাম্
অথর্বাণং তথা চাপি হব্যবাহোঽব্রবীদ্বচঃ
212.11
অনুনীয়মানোঽপি ভৃশং দেববাক্যাদ্ধি তেন সঃ
নৈচ্ছদ্বোঢুং হবিঃ সর্বং শরীরং চ সমত্যজৎ
212.12
স তচ্ছরীরং সংত্যজ্য প্রবিবেশ ধরাং তদা
ভূমিং স্পৃষ্ট্বাসৃজদ্ধাতূন্পৃথক্পৃথগতীব হি
212.13
আস্যাত্সুগন্ধি তেজশ্চ অস্থিভ্যো দেবদারু চ
শ্লেষ্মণঃ স্ফটিকং তস্য পিত্তান্মরকতং তথা
212.14
যকৃত্কৃষ্ণায়সং তস্য ত্রিভিরেব বভুঃ প্রজাঃ
নখাস্তস্যাভ্রপটলং শিরাজালানি বিদ্রুমম্
শরীরাদ্বিবিধাশ্চান্যে ধাতবোঽস্যাভবন্নৃপ
212.15
এবং ত্যক্ত্বা শরীরং তু পরমে তপসি স্থিতঃ
ভৃগ্বঙ্গিরাদিভির্ভূয়স্তপসোত্থাপিতস্তদা
212.16
ভৃশং জজ্বাল তেজস্বী তপসাপ্যায়িতঃ শিখী
দৃষ্ট্বা ঋষীন্ভয়াচ্চাপি প্রবিবেশ মহার্ণবম্
212.17
তস্মিন্নষ্টে জগদ্ভীতমথর্বাণমথাশ্রিতম্
অর্চয়ামাসুরেবৈনমথর্বাণং সুরর্ষয়ঃ
212.18
অথর্বা ত্বসৃজল্লোকানাত্মনালোক্য পাবকম্
মিষতাং সর্বভূতানামুন্মমাথ মহার্ণবম্
212.19
এবমগ্নির্ভগবতা নষ্টঃ পূর্বমথর্বণা
আহূতঃ সর্বভূতানাং হব্যং বহতি সর্বদা
212.20
এবং ত্বজনয়দ্ধিষ্ণ্যান্বেদোক্তান্বিবুধান্বহূন্
বিচরন্বিবিধান্দেশান্ভ্রমমাণস্তু তত্র বৈ
212.21
সিন্ধুবর্জং পঞ্চ নদ্যো দেবিকাথ সরস্বতী
গঙ্গা চ শতকুম্ভা চ শরয়ূর্গণ্ডসাহ্বয়া
212.22
চর্মণ্বতী মহী চৈব মেধ্যা মেধাতিথিস্তথা
তাম্রাবতী বেত্রবতী নদ্যস্তিস্রোঽথ কৌশিকী
212.23
তমসা নর্মদা চৈব নদী গোদাবরী তথা
বেণ্ণা প্রবেণী ভীমা চ মেদ্রথা চৈব ভারত
212.24
ভারতী সুপ্রয়োগা চ কাবেরী মুর্মুরা তথা
কৃষ্ণা চ কৃষ্ণবেণ্ণা চ কপিলা শোণ এব চ
এতা নদ্যস্তু ধিষ্ণ্যানাং মাতরো যাঃ প্রকীর্তিতাঃ
212.25
অদ্ভুতস্য প্রিয়া ভার্যা তস্যাঃ পুত্রো বিডূরথঃ
যাবন্তঃ পাবকাঃ প্রোক্তাঃ সোমাস্তাবন্ত এব চ
212.26
অত্রেশ্চাপ্যন্বয়ে জাতা ব্রহ্মণো মানসাঃ প্রজাঃ
অত্রিঃ পুত্রান্স্রষ্টুকামস্তানেবাত্মন্যধারয়ৎ
তস্য তদ্ব্রহ্মণঃ কায়ান্নির্হরন্তি হুতাশনাঃ
212.27
এবমেতে মহাত্মানঃ কীর্তিতাস্তেঽগ্নয়ো ময়া
অপ্রমেয়া যথোত্পন্নাঃ শ্রীমন্তস্তিমিরাপহাঃ
212.28
অদ্ভুতস্য তু মাহাত্ম্যং যথা বেদেষু কীর্তিতম্
তাদৃশং বিদ্ধি সর্বেষামেকো হ্যেষ হুতাশনঃ
212.29
এক এবৈষ ভগবান্বিজ্ঞেয়ঃ প্রথমোঽঙ্গিরাঃ
বহুধা নিঃসৃতঃ কায়াজ্জ্যোতিষ্টোমঃ ক্রতুর্যথা
212.30
ইত্যেষ বংশঃ সুমহানগ্নীনাং কীর্তিতো ময়া
পাবিতো বিবিধৈর্মন্ত্রৈর্হব্যং বহতি দেহিনাম্