Utshovঅধ্যায় 213
213.1
মার্কণ্ডেয় উবাচ
অগ্নীনাং বিবিধো বংশঃ কীর্তিতস্তে ময়ানঘ
শৃণু জন্ম তু কৌরব্য কার্ত্তিকেয়স্য ধীমতঃ
213.2
অদ্ভুতস্যাদ্ভুতং পুত্রং প্রবক্ষ্যাম্যমিতৌজসম্
জাতং সপ্তর্ষিভার্যাভির্ব্রহ্মণ্যং কীর্তিবর্ধনম্
213.3
দেবাসুরাঃ পুরা যত্তা বিনিঘ্নন্তঃ পরস্পরম্
তত্রাজয়ন্সদা দেবান্দানবা ঘোররূপিণঃ
213.4
বধ্যমানং বলং দৃষ্ট্বা বহুশস্তৈঃ পুরংদরঃ
স্বসৈন্যনায়কার্থায় চিন্তামাপ ভৃশং তদা
213.5
দেবসেনাং দানবৈর্যো ভগ্নাং দৃষ্ট্বা মহাবলঃ
পালয়েদ্বীর্যমাশ্রিত্য স জ্ঞেয়ঃ পুরুষো ময়া
213.6
স শৈলং মানসং গত্বা ধ্যায়ন্নর্থমিমং ভৃশম্
শুশ্রাবার্তস্বরং ঘোরমথ মুক্তং স্ত্রিয়া তদা
213.7
অভিধাবতু মা কশ্চিত্পুরুষস্ত্রাতু চৈব হ
পতিং চ মে প্রদিশতু স্বয়ং বা পতিরস্তু মে
213.8
পুরংদরস্তু তামাহ মা ভৈর্নাস্তি ভয়ং তব
এবমুক্ত্বা ততোঽপশ্যত্কেশিনং স্থিতমগ্রতঃ
213.9
কিরীটিনং গদাপাণিং ধাতুমন্তমিবাচলম্
হস্তে গৃহীত্বা তাং কন্যামথৈনং বাসবোঽব্রবীৎ
213.10
অনার্যকর্মন্কস্মাত্ত্বমিমাং কন্যাং জিহীর্ষসি
বজ্রিণং মাং বিজানীহি বিরমাস্যাঃ প্রবাধনাৎ
213.11
কেশ্যুবাচ
বিসৃজস্ব ত্বমেবৈনাং শক্রৈষা প্রার্থিতা ময়া
ক্ষমং তে জীবতো গন্তুং স্বপুরং পাকশাসন
213.12
মার্কণ্ডেয় উবাচ
এবমুক্ত্বা গদাং কেশী চিক্ষেপেন্দ্রবধায় বৈ
তামাপতন্তীং চিচ্ছেদ মধ্যে বজ্রেণ বাসবঃ
213.13
অথাস্য শৈলশিখরং কেশী ক্রুদ্ধো ব্যবাসৃজৎ
তদাপতন্তং সংপ্রেক্ষ্য শৈলশৃঙ্গং শতক্রতুঃ
বিভেদ রাজন্বজ্রেণ ভুবি তন্নিপপাত হ
213.14
পততা তু তদা কেশী তেন শৃঙ্গেণ তাডিতঃ
হিত্বা কন্যাং মহাভাগাং প্রাদ্রবদ্ভৃশপীডিতঃ
213.15
অপয়াতেঽসুরে তস্মিংস্তাং কন্যাং বাসবোঽব্রবীৎ
কাসি কস্যাসি কিং চেহ কুরুষে ত্বং শুভাননে
213.16
কন্যোবাচ
অহং প্রজাপতেঃ কন্যা দেবসেনেতি বিশ্রুতা
ভগিনী দৈত্যসেনা মে সা পূর্বং কেশিনা হৃতা
213.17
সহৈবাবাং ভগিন্যৌ তু সখীভিঃ সহ মানসম্
আগচ্ছাবেহ রত্যর্থমনুজ্ঞাপ্য প্রজাপতিম্
213.18
নিত্যং চাবাং প্রার্থয়তে হর্তুং কেশী মহাসুরঃ
ইচ্ছত্যেনং দৈত্যসেনা ন ত্বহং পাকশাসন
213.19
সা হৃতা তেন ভগবন্মুক্তাহং ত্বদ্বলেন তু
ত্বয়া দেবেন্দ্র নির্দিষ্টং পতিমিচ্ছামি দুর্জয়ম্
213.20
ইন্দ্র উবাচ
মম মাতৃষ্বসেয়া ত্বং মাতা দাক্ষায়ণী মম
আখ্যাতং ত্বহমিচ্ছামি স্বয়মাত্মবলং ত্বয়া
213.21
কন্যোবাচ
অবলাহং মহাবাহো পতিস্তু বলবান্মম
বরদানাত্পিতুর্ভাবী সুরাসুরনমস্কৃতঃ
213.22
ইন্দ্র উবাচ
কীদৃশং বৈ বলং দেবি পত্যুস্তব ভবিষ্যতি
এতদিচ্ছাম্যহং শ্রোতুং তব বাক্যমনিন্দিতে
213.23
কন্যোবাচ
দেবদানবয়ক্ষাণাং কিংনরোরগরক্ষসাম্
জেতা স দৃষ্টো দুষ্টানাং মহাবীর্যো মহাবলঃ
213.24
যস্তু সর্বাণি ভূতানি ত্বয়া সহ বিজেষ্যতি
স হি মে ভবিতা ভর্তা ব্রহ্মণ্যঃ কীর্তিবর্ধনঃ
213.25
মার্কণ্ডেয় উবাচ
ইন্দ্রস্তস্যা বচঃ শ্রুত্বা দুঃখিতোঽচিন্তয়দ্ভৃশম্
অস্যা দেব্যাঃ পতির্নাস্তি যাদৃশং সংপ্রভাষতে
213.26
অথাপশ্যত্স উদয়ে ভাস্করং ভাস্করদ্যুতিঃ
সোমং চৈব মহাভাগং বিশমানং দিবাকরম্
213.27
অমাবাস্যাং সংপ্রবৃত্তং মুহূর্তং রৌদ্রমেব চ
দেবাসুরং চ সংগ্রামং সোঽপশ্যদুদয়ে গিরৌ
213.28
লোহিতৈশ্চ ঘনৈর্যুক্তাং পূর্বাং সংধ্যাং শতক্রতুঃ
অপশ্যল্লোহিতোদং চ ভগবান্বরুণালয়ম্
213.29
ভৃগুভিশ্চাঙ্গিরোভিশ্চ হুতং মন্ত্রৈঃ পৃথগ্বিধৈঃ
হব্যং গৃহীত্বা বহ্নিং চ প্রবিশন্তং দিবাকরম্
213.30
পর্ব চৈব চতুর্বিংশং তদা সূর্যমুপস্থিতম্
তথা ধর্মগতং রৌদ্রং সোমং সূর্যগতং চ তম্
213.31
সমালোক্যৈকতামেব শশিনো ভাস্করস্য চ
সমবায়ং তু তং রৌদ্রং দৃষ্ট্বা শক্রো ব্যচিন্তয়ৎ
213.32
এষ রৌদ্রশ্চ সংঘাতো মহান্যুক্তশ্চ তেজসা
সোমস্য বহ্নিসূর্যাভ্যামদ্ভুতোঽয়ং সমাগমঃ
জনয়েদ্যং সুতং সোমঃ সোঽস্যা দেব্যাঃ পতির্ভবেৎ
213.33
অগ্নিশ্চৈতৈর্গুণৈর্যুক্তঃ সর্বৈরগ্নিশ্চ দেবতা
এষ চেজ্জনয়েদ্গর্ভং সোঽস্যা দেব্যাঃ পতির্ভবেৎ
213.34
এবং সংচিন্ত্য ভগবান্ব্রহ্মলোকং তদা গতঃ
গৃহীত্বা দেবসেনাং তামবন্দত্স পিতামহম্
উবাচ চাস্যা দেব্যাস্ত্বং সাধু শূরং পতিং দিশ
213.35
ব্রহ্মোবাচ
যথৈতচ্চিন্তিতং কার্যং ত্বয়া দানবসূদন
তথা স ভবিতা গর্ভো বলবানুরুবিক্রমঃ
213.36
স ভবিষ্যতি সেনানীস্ত্বয়া সহ শতক্রতো
অস্যা দেব্যাঃ পতিশ্চৈব স ভবিষ্যতি বীর্যবান্
213.37
মার্কণ্ডেয় উবাচ
এতচ্ছ্রুত্বা নমস্তস্মৈ কৃত্বাসৌ সহ কন্যয়া
তত্রাভ্যগচ্ছদ্দেবেন্দ্রো যত্র দেবর্ষয়োঽভবন্
বসিষ্ঠপ্রমুখা মুখ্যা বিপ্রেন্দ্রাঃ সুমহাব্রতাঃ
213.38
ভাগার্থং তপসোপাত্তং তেষাং সোমং তথাধ্বরে
পিপাসবো যয়ুর্দেবাঃ শতক্রতুপুরোগমাঃ
213.39
ইষ্টিং কৃত্বা যথান্যায়ং সুসমিদ্ধে হুতাশনে
জুহুবুস্তে মহাত্মানো হব্যং সর্বদিবৌকসাম্
213.40
সমাহূতো হুতবহঃ সোঽদ্ভুতঃ সূর্যমণ্ডলাৎ
বিনিঃসৃত্যায়য়ৌ বহ্নির্বাগ্যতো বিধিবত্প্রভুঃ
আগম্যাহবনীয়ং বৈ তৈর্দ্বিজৈর্মন্ত্রতো হুতম্
213.41
স তত্র বিবিধং হব্যং প্রতিগৃহ্য হুতাশনঃ
ঋষিভ্যো ভরতশ্রেষ্ঠ প্রায়চ্ছত দিবৌকসাম্
213.42
নিষ্ক্রামংশ্চাপ্যপশ্যত্স পত্নীস্তেষাং মহাত্মনাম্
স্বেষ্বাশ্রমেষূপবিষ্টাঃ স্নায়ন্তীশ্চ যথাসুখম্
213.43
রুক্মবেদিনিভাস্তাস্তু চন্দ্রলেখা ইবামলাঃ
হুতাশনার্চিপ্রতিমাঃ সর্বাস্তারা ইবাদ্ভুতাঃ
213.44
স তদ্গতেন মনসা বভূব ক্ষুভিতেন্দ্রিয়ঃ
পত্নীর্দৃষ্ট্বা দ্বিজেন্দ্রাণাং বহ্নিঃ কামবশং যয়ৌ
213.45
স ভূয়শ্চিন্তয়ামাস ন ন্যায্যং ক্ষুভিতোঽস্মি যৎ
সাধ্বীঃ পত্নীর্দ্বিজেন্দ্রাণামকামাঃ কাময়াম্যহম্
213.46
নৈতাঃ শক্যা ময়া দ্রষ্টুং স্প্রষ্টুং বাপ্যনিমিত্ততঃ
গার্হপত্যং সমাবিশ্য তস্মাত্পশ্যাম্যভীক্ষ্ণশঃ
213.47
সংস্পৃশন্নিব সর্বাস্তাঃ শিখাভিঃ কাঞ্চনপ্রভাঃ
পশ্যমানশ্চ মুমুদে গার্হপত্যং সমাশ্রিতঃ
213.48
নিরুষ্য তত্র সুচিরমেবং বহ্নির্বশং গতঃ
মনস্তাসু বিনিক্ষিপ্য কাময়ানো বরাঙ্গনাঃ
213.49
কামসংতপ্তহৃদয়ো দেহত্যাগে সুনিশ্চিতঃ
অলাভে ব্রাহ্মণস্ত্রীণামগ্নির্বনমুপাগতঃ
213.50
স্বাহা তং দক্ষদুহিতা প্রথমং কাময়ত্তদা
সা তস্য ছিদ্রমন্বৈচ্ছচ্চিরাত্প্রভৃতি ভামিনী
অপ্রমত্তস্য দেবস্য ন চাপশ্যদনিন্দিতা
213.51
সা তং জ্ঞাত্বা যথাবত্তু বহ্নিং বনমুপাগতম্
তত্ত্বতঃ কামসংতপ্তং চিন্তয়ামাস ভামিনী
213.52
অহং সপ্তর্ষিপত্নীনাং কৃত্বা রূপাণি পাবকম্
কাময়িষ্যামি কামার্তং তাসাং রূপেণ মোহিতম্
এবং কৃতে প্রীতিরস্য কামাবাপ্তিশ্চ মে ভবেৎ