Utshovঅধ্যায় 214
214.1
মার্কণ্ডেয় উবাচ
শিবা ভার্যা ত্বঙ্গিরসঃ শীলরূপগুণান্বিতা
তস্যাঃ সা প্রথমং রূপং কৃত্বা দেবী জনাধিপ
জগাম পাবকাভ্যাশং তং চোবাচ বরাঙ্গনা
214.2
মামগ্নে কামসংতপ্তাং ত্বং কাময়িতুমর্হসি
করিষ্যসি ন চেদেবং মৃতাং মামুপধারয়
214.3
অহমঙ্গিরসো ভার্যা শিবা নাম হুতাশন
সখীভিঃ সহিতা প্রাপ্তা মন্ত্রয়িত্বা বিনিশ্চয়ম্
214.4
অগ্নিরুবাচ
কথং মাং ত্বং বিজানীষে কামার্তমিতরাঃ কথম্
যাস্ত্বয়া কীর্তিতাঃ সর্বাঃ সপ্তর্ষীণাং প্রিয়াঃ স্ত্রিয়ঃ
214.5
শিবোবাচ
অস্মাকং ত্বং প্রিয়ো নিত্যং বিভীমস্তু বয়ং তব
ত্বচ্চিত্তমিঙ্গিতৈর্জ্ঞাত্বা প্রেষিতাস্মি তবান্তিকম্
214.6
মৈথুনায়েহ সংপ্রাপ্তা কামং প্রাপ্তং দ্রুতং চর
মাতরো মাং প্রতীক্ষন্তে গমিষ্যামি হুতাশন
214.7
মার্কণ্ডেয় উবাচ
ততোঽগ্নিরুপয়েমে তাং শিবাং প্রীতিমুদায়ুতঃ
প্রীত্যা দেবী চ সংয়ুক্তা শুক্রং জগ্রাহ পাণিনা
214.8
অচিন্তয়ন্মমেদং যে রূপং দ্রক্ষ্যন্তি কাননে
তে ব্রাহ্মণীনামনৃতং দোষং বক্ষ্যন্তি পাবকে
214.9
তস্মাদেতদ্রক্ষ্যমাণা গরুডী সংভবাম্যহম্
বনান্নির্গমনং চৈব সুখং মম ভবিষ্যতি
214.10
সুপর্ণী সা তদা ভূত্বা নির্জগাম মহাবনাৎ
অপশ্যত্পর্বতং শ্বেতং শরস্তম্বৈঃ সুসংবৃতম্
214.11
দৃষ্টীবিষৈঃ সপ্তশীর্ষৈর্গুপ্তং ভোগিভিরদ্ভুতৈঃ
রক্ষোভিশ্চ পিশাচৈশ্চ রৌদ্রৈর্ভূতগণৈস্তথা
রাক্ষসীভিশ্চ সংপূর্ণমনেকৈশ্চ মৃগদ্বিজৈঃ
214.12
সা তত্র সহসা গত্বা শৈলপৃষ্ঠং সুদুর্গমম্
প্রাক্ষিপত্কাঞ্চনে কুণ্ডে শুক্রং সা ত্বরিতা সতী
214.13
শিষ্টানামপি সা দেবী সপ্তর্ষীণাং মহাত্মনাম্
পত্নীসরূপতাং কৃত্বা কাময়ামাস পাবকম্
214.14
দিব্যরূপমরুন্ধত্যাঃ কর্তুং ন শকিতং তয়া
তস্যাস্তপঃপ্রভাবেণ ভর্তৃশুশ্রূষণেন চ
214.15
ষট্কৃত্বস্তত্তু নিক্ষিপ্তমগ্নে রেতঃ কুরূত্তম
তস্মিন্কুণ্ডে প্রতিপদি কামিন্যা স্বাহয়া তদা
214.16
তত্স্কন্নং তেজসা তত্র সংভৃতং জনয়ত্সুতম্
ঋষিভিঃ পূজিতং স্কন্নমনয়ত্স্কন্দতাং ততঃ
214.17
ষট্শিরা দ্বিগুণশ্রোত্রো দ্বাদশাক্ষিভুজক্রমঃ
একগ্রীবস্ত্বেককায়ঃ কুমারঃ সমপদ্যত
214.18
দ্বিতীয়ায়ামভিব্যক্তস্তৃতীয়ায়াং শিশুর্বভৌ
অঙ্গপ্রত্যঙ্গসংভূতশ্চতুর্থ্যামভবদ্গুহঃ
214.19
লোহিতাভ্রেণ মহতা সংবৃতঃ সহ বিদ্যুতা
লোহিতাভ্রে সুমহতি ভাতি সূর্য ইবোদিতঃ
214.20
গৃহীতং তু ধনুস্তেন বিপুলং লোমহর্ষণম্
ন্যস্তং যত্ত্রিপুরঘ্নেন সুরারিবিনিকৃন্তনম্
214.21
তদ্গৃহীত্বা ধনুঃশ্রেষ্ঠং ননাদ বলবাংস্তদা
সংমোহয়ন্নিবেমান্স ত্রীঁল্লোকান্সচরাচরান্
214.22
তস্য তং নিনদং শ্রুত্বা মহামেঘৌঘনিস্বনম্
উত্পেততুর্মহানাগৌ চিত্রশ্চৈরাবতশ্চ হ
214.23
তাবাপতন্তৌ সংপ্রেক্ষ্য স বালার্কসমদ্যুতিঃ
দ্বাভ্যাং গৃহীত্বা পাণিভ্যাং শক্তিং চান্যেন পাণিনা
অপরেণাগ্নিদায়াদস্তাম্রচূডং ভুজেন সঃ
214.24
মহাকায়মুপশ্লিষ্টং কুক্কুটং বলিনাং বরম্
গৃহীত্বা ব্যনদদ্ভীমং চিক্রীড চ মহাবলঃ
214.25
দ্বাভ্যাং ভুজাভ্যাং বলবান্গৃহীত্বা শঙ্খমুত্তমম্
প্রাধ্মাপয়ত ভূতানাং ত্রাসনং বলিনামপি
214.26
দ্বাভ্যাং ভুজাভ্যামাকাশং বহুশো নিজঘান সঃ
ক্রীডন্ভাতি মহাসেনস্ত্রীঁল্লোকান্বদনৈঃ পিবন্
পর্বতাগ্রেঽপ্রমেয়াত্মা রশ্মিমানুদয়ে যথা
214.27
স তস্য পর্বতস্যাগ্রে নিষণ্ণোঽদ্ভুতবিক্রমঃ
ব্যলোকয়দমেয়াত্মা মুখৈর্নানাবিধৈর্দিশঃ
স পশ্যন্বিবিধান্ভাবাংশ্চকার নিনদং পুনঃ
214.28
তস্য তং নিনদং শ্রুত্বা ন্যপতন্বহুধা জনাঃ
ভীতাশ্চোদ্বিগ্নমনসস্তমেব শরণং যয়ুঃ
214.29
যে তু তং সংশ্রিতা দেবং নানাবর্ণাস্তদা জনাঃ
তানপ্যাহুঃ পারিষদান্ব্রাহ্মণাঃ সুমহাবলান্
214.30
স তূত্থায় মহাবাহুরুপসান্ত্ব্য চ তাঞ্জনান্
ধনুর্বিকৃষ্য ব্যসৃজদ্বাণাঞ্শ্বেতে মহাগিরৌ
214.31
বিভেদ স শরৈঃ শৈলং ক্রৌঞ্চং হিমবতঃ সুতম্
তেন হংসাশ্চ গৃধ্রাশ্চ মেরুং গচ্ছন্তি পর্বতম্
214.32
স বিশীর্ণোঽপতচ্ছৈলো ভৃশমার্তস্বরান্রুবন্
তস্মিন্নিপতিতে ত্বন্যে নেদুঃ শৈলা ভৃশং ভয়াৎ
214.33
স তং নাদং ভৃশার্তানাং শ্রুত্বাপি বলিনাং বরঃ
ন প্রাব্যথদমেয়াত্মা শক্তিমুদ্যম্য চানদৎ
214.34
সা তদা বিপুলা শক্তিঃ ক্ষিপ্তা তেন মহাত্মনা
বিভেদ শিখরং ঘোরং শ্বেতস্য তরসা গিরেঃ
214.35
স তেনাভিহতো দীনো গিরিঃ শ্বেতোঽচলৈঃ সহ
উত্পপাত মহীং ত্যক্ত্বা ভীতস্তস্মান্মহাত্মনঃ
214.36
ততঃ প্রব্যথিতা ভূমির্ব্যশীর্যত সমন্ততঃ
আর্তা স্কন্দং সমাসাদ্য পুনর্বলবতী বভৌ
214.37
পর্বতাশ্চ নমস্কৃত্য তমেব পৃথিবীং গতাঃ
অথায়মভজল্লোকঃ স্কন্দং শুক্লস্য পঞ্চমীম্