অধ্যায় 215

215.1

মার্কণ্ডেয় উবাচ
ঋষয়স্তু মহাঘোরান্দৃষ্ট্বোত্পাতান্পৃথগ্বিধান্
অকুর্বঞ্শান্তিমুদ্বিগ্না লোকানাং লোকভাবনাঃ

নিবসন্তি বনে যে তু তস্মিংশ্চৈত্ররথে জনাঃ
তেঽব্রুবন্নেষ নোঽনর্থঃ পাবকেনাহৃতো মহান্
সংগম্য ষড্ভিঃ পত্নীভিঃ সপ্তর্ষীণামিতি স্ম হ

অপরে গরুডীমাহুস্ত্বয়ানর্থোঽয়মাহৃতঃ
যৈর্দৃষ্টা সা তদা দেবী তস্যা রূপেণ গচ্ছতী
ন তু তত্স্বাহয়া কর্ম কৃতং জানাতি বৈ জনঃ

সুপর্ণী তু বচঃ শ্রুত্বা মমায়ং তনয়স্ত্বিতি
উপগম্য শনৈঃ স্কন্দমাহাহং জননী তব

অথ সপ্তর্ষয়ঃ শ্রুত্বা জাতং পুত্রং মহৌজসম্
তত্যজুঃ ষট্তদা পত্নীর্বিনা দেবীমরুন্ধতীম্

ষড্ভিরেব তদা জাতমাহুস্তদ্বনবাসিনঃ
সপ্তর্ষীনাহ চ স্বাহা মম পুত্রোঽয়মিত্যুত
অহং জানে নৈতদেবমিতি রাজন্পুনঃ পুনঃ

বিশ্বামিত্রস্তু কৃত্বেষ্টিং সপ্তর্ষীণাং মহামুনিঃ
পাবকং কামসংতপ্তমদৃষ্টঃ পৃষ্ঠতোঽন্বগাৎ
তত্তেন নিখিলং সর্বমববুদ্ধং যথাতথম্

বিশ্বামিত্রস্তু প্রথমং কুমারং শরণং গতঃ
স্তবং দিব্যং সংপ্রচক্রে মহাসেনস্য চাপি সঃ

মঙ্গলানি চ সর্বাণি কৌমারাণি ত্রয়োদশ
জাতকর্মাদিকাস্তস্য ক্রিয়াশ্চক্রে মহামুনিঃ

ষড্বক্ত্রস্য তু মাহাত্ম্যং কুক্কুটস্য চ সাধনম্
শক্ত্যা দেব্যাঃ সাধনং চ তথা পারিষদামপি

বিশ্বামিত্রশ্চকারৈতত্কর্ম লোকহিতায় বৈ
তস্মাদৃষিঃ কুমারস্য বিশ্বামিত্রোঽভবত্প্রিয়ঃ

অন্বজানাচ্চ স্বাহায়া রূপান্যত্বং মহামুনিঃ
অব্রবীচ্চ মুনীন্সর্বান্নাপরাধ্যন্তি বৈ স্ত্রিয়ঃ
শ্রুত্বা তু তত্ত্বতস্তস্মাত্তে পত্নীঃ সর্বতোঽত্যজন্

স্কন্দং শ্রুত্বা ততো দেবা বাসবং সহিতাব্রুবন্
অবিষহ্যবলং স্কন্দং জহি শক্রাশু মাচিরম্

যদি বা ন নিহংস্যেনমদ্যেন্দ্রোঽয়ং ভবিষ্যতি
ত্রৈলোক্যং সংনিগৃহ্যাস্মাংস্ত্বাং চ শক্র মহাবলঃ

স তানুবাচ ব্যথিতো বালোঽয়ং সুমহাবলঃ
স্রষ্টারমপি লোকানাং যুধি বিক্রম্য নাশয়েৎ

সর্বাস্ত্বদ্যাভিগচ্ছন্তু স্কন্দং লোকস্য মাতরঃ
কামবীর্যা ঘ্নন্তু চৈনং তথেত্যুক্ত্বা চ তা যয়ুঃ

তমপ্রতিবলং দৃষ্ট্বা বিষণ্ণবদনাস্তু তাঃ
অশক্যোঽয়ং বিচিন্ত্যৈবং তমেব শরণং যয়ুঃ

ঊচুশ্চাপি ত্বমস্মাকং পুত্রোঽস্মাভির্ধৃতং জগৎ
অভিনন্দস্ব নঃ সর্বাঃ প্রস্নুতাঃ স্নেহবিক্লবাঃ

তাঃ সংপূজ্য মহাসেনঃ কামাংশ্চাসাং প্রদায় সঃ
অপশ্যদগ্নিমায়ান্তং পিতরং বলিনাং বলী

স তু সংপূজিতস্তেন সহ মাতৃগণেন হ
পরিবার্য মহাসেনং রক্ষমাণঃ স্থিতঃ স্থিরম্

সর্বাসাং যা তু মাতৄণাং নারী ক্রোধসমুদ্ভবা
ধাত্রী সা পুত্রবত্স্কন্দং শূলহস্তাভ্যরক্ষত

লোহিতস্যোদধেঃ কন্যা ক্রূরা লোহিতভোজনা
পরিষ্বজ্য মহাসেনং পুত্রবত্পর্যরক্ষত

অগ্নির্ভূত্বা নৈগমেয়শ্ছাগবক্ত্রো বহুপ্রজঃ
রময়ামাস শৈলস্থং বালং ক্রীডনকৈরিব