অধ্যায় 216

216.1

মার্কণ্ডেয় উবাচ
গ্রহাঃ সোপগ্রহাশ্চৈব ঋষয়ো মাতরস্তথা
হুতাশনমুখাশ্চাপি দীপ্তাঃ পারিষদাং গণাঃ

এতে চান্যে চ বহবো ঘোরাস্ত্রিদিববাসিনঃ
পরিবার্য মহাসেনং স্থিতা মাতৃগণৈঃ সহ

সংদিগ্ধং বিজয়ং দৃষ্ট্বা বিজয়েপ্সুঃ সুরেশ্বরঃ
আরুহ্যৈরাবতস্কন্ধং প্রয়য়ৌ দৈবতৈঃ সহ
বিজিঘাংসুর্মহাসেনমিন্দ্রস্তূর্ণতরং যয়ৌ

উগ্রং তচ্চ মহাবেগং দেবানীকং মহাপ্রভম্
বিচিত্রধ্বজসংনাহং নানাবাহনকার্মুকম্
প্রবরাম্বরসংবীতং শ্রিয়া জুষ্টমলংকৃতম্

বিজিঘাংসুং তদায়ান্তং কুমারঃ শক্রমভ্যয়াৎ
বিনদন্পথি শক্রস্তু দ্রুতং যাতি মহাবলঃ
সংহর্ষয়ন্দেবসেনাং জিঘাংসুঃ পাবকাত্মজম্

সংপূজ্যমানস্ত্রিদশৈস্তথৈব পরমর্ষিভিঃ
সমীপমুপসংপ্রাপ্তঃ কার্ত্তিকেয়স্য বাসবঃ

সিংহনাদং ততশ্চক্রে দেবেশঃ সহিতঃ সুরৈঃ
গুহোঽপি শব্দং তং শ্রুত্বা ব্যনদত্সাগরো যথা

তস্য শব্দেন মহতা সমুদ্ধূতোদধিপ্রভম্
বভ্রাম তত্র তত্রৈব দেবসৈন্যমচেতনম্

জিঘাংসূনুপসংপ্রাপ্তান্দেবান্দৃষ্ট্বা স পাবকিঃ
বিসসর্জ মুখাত্ক্রুদ্ধঃ প্রবৃদ্ধাঃ পাবকার্চিষঃ
তা দেবসৈন্যান্যদহন্বেষ্টমানানি ভূতলে

তে প্রদীপ্তশিরোদেহাঃ প্রদীপ্তায়ুধবাহনাঃ
প্রচ্যুতাঃ সহসা ভান্তি চিত্রাস্তারাগণা ইব

দহ্যমানাঃ প্রপন্নাস্তে শরণং পাবকাত্মজম্
দেবা বজ্রধরং ত্যক্ত্বা ততঃ শান্তিমুপাগতাঃ

ত্যক্তো দেবৈস্ততঃ স্কন্দে বজ্রং শক্রোঽভ্যবাসৃজৎ
তদ্বিসৃষ্টং জঘানাশু পার্শ্বং স্কন্দস্য দক্ষিণম্
বিভেদ চ মহারাজ পার্শ্বং তস্য মহাত্মনঃ

বজ্রপ্রহারাত্স্কন্দস্য সংজাতঃ পুরুষোঽপরঃ
যুবা কাঞ্চনসংনাহঃ শক্তিধৃগ্দিব্যকুণ্ডলঃ
যদ্বজ্রবিশনাজ্জাতো বিশাখস্তেন সোঽভবৎ

তং জাতমপরং দৃষ্ট্বা কালানলসমদ্যুতিম্
ভয়াদিন্দ্রস্ততঃ স্কন্দং প্রাঞ্জলিঃ শরণং গতঃ

তস্যাভয়ং দদৌ স্কন্দঃ সহসৈন্যস্য সত্তম
ততঃ প্রহৃষ্টাস্ত্রিদশা বাদিত্রাণ্যভ্যবাদয়ন্