UtshovChapter 207
207.1
वैशंपायन उवाच
श्रुत्वेमां धर्मसंयुक्तां धर्मराजः कथां शुभाम्
पुनः पप्रच्छ तमृषिं मार्कण्डेयं तपस्विनम्
Vaishampayana uvacha
Shrutvemam dharmasanyuktam dharmarajah katham shubham
Punah paprachchha tamrishim markandeyam tapasvinam
207.2
युधिष्ठिर उवाच
कथमग्निर्वनं यातः कथं चाप्यङ्गिराः पुरा
नष्टेऽग्नौ हव्यमवहदग्निर्भूत्वा महानृषिः
Yudhishthira uvacha
Kathamagnirvanam yatah katham chapyangirah pura
Nashtegnau havyamavahadagnirbhutva mahanrishih
207.3
अग्निर्यदा त्वेक एव बहुत्वं चास्य कर्मसु
दृश्यते भगवन्सर्वमेतदिच्छामि वेदितुम्
Agniryada tveka eva bahutvam chasya karmasu
Drishyate bhagavansarvametadichchhami veditum
207.4
कुमारश्च यथोत्पन्नो यथा चाग्नेः सुतोऽभवत्
यथा रुद्राच्च संभूतो गङ्गायां कृत्तिकासु च
Kumarashcha yathotpanno yatha chagneh sutobhavat
Yatha rudrachcha sambhuto gangayam krittikasu cha
207.5
एतदिच्छाम्यहं त्वत्तः श्रोतुं भार्गवनन्दन
कौतूहलसमाविष्टो यथातथ्यं महामुने
Etadichchhamyaham tvattah shrotum bhargavanandana
Kautuhalasamavishto yathatathyam mahamune
207.6
मार्कण्डेय उवाच
अत्राप्युदाहरन्तीममितिहासं पुरातनम्
यथा क्रुद्धो हुतवहस्तपस्तप्तुं वनं गतः
Markandeya uvacha
Atrapyudaharantimamitihasam puratanam
Yatha kruddho hutavahastapastaptum vanam gatah
207.7
यथा च भगवानग्निः स्वयमेवाङ्गिराभवत्
संतापयन्स्वप्रभया नाशयंस्तिमिराणि च
Yatha cha bhagavanagnih svayamevangirabhavat
Santapayansvaprabhaya nashayanstimirani cha
207.8
आश्रमस्थो महाभागो हव्यवाहं विशेषयन्
तथा स भूत्वा तु तदा जगत्सर्वं प्रकाशयन्
Ashramastho mahabhago havyavaham visheshayan
Tatha sa bhutva tu tada jagatsarvam prakashayan
207.9
तपश्चरंश्च हुतभुक्संतप्तस्तस्य तेजसा
भृशं ग्लानश्च तेजस्वी न स किंचित्प्रजज्ञिवान्
Tapashcharanshcha hutabhuksantaptastasya tejasa
Bhrisham glanashcha tejasvi na sa kinchitprajagyivan
207.10
अथ संचिन्तयामास भगवान्हव्यवाहनः
अन्योऽग्निरिह लोकानां ब्रह्मणा संप्रवर्तितः
अग्नित्वं विप्रनष्टं हि तप्यमानस्य मे तपः
Atha sanchintayamasa bhagavanhavyavahanah
Anyogniriha lokanam brahmana sampravartitah
Agnitvam vipranashtam hi tapyamanasya me tapah
207.11
कथमग्निः पुनरहं भवेयमिति चिन्त्य सः
अपश्यदग्निवल्लोकांस्तापयन्तं महामुनिम्
Kathamagnih punaraham bhaveyamiti chintya sah
Apashyadagnivallokanstapayantam mahamunim
207.12
सोपासर्पच्छनैर्भीतस्तमुवाच तदाङ्गिराः
शीघ्रमेव भवस्वाग्निस्त्वं पुनर्लोकभावनः
विज्ञातश्चासि लोकेषु त्रिषु संस्थानचारिषु
Sopasarpachchhanairbhitastamuvacha tadangirah
Shighrameva bhavasvagnistvam punarlokabhavanah
Vigyatashchasi lokeshu trishu sansthanacharishu
207.13
त्वमग्ने प्रथमः सृष्टो ब्रह्मणा तिमिरापहः
स्वस्थानं प्रतिपद्यस्व शीघ्रमेव तमोनुद
Tvamagne prathamah srishto brahmana timirapahah
Svasthanam pratipadyasva shighrameva tamonuda
207.14
अग्निरुवाच
नष्टकीर्तिरहं लोके भवाञ्जातो हुताशनः
भवन्तमेव ज्ञास्यन्ति पावकं न तु मां जनाः
Agniruvacha
Nashtakirtiraham loke bhavanjato hutashanah
Bhavantameva gyasyanti pavakam na tu mam janah
207.15
निक्षिपाम्यहमग्नित्वं त्वमग्निः प्रथमो भव
भविष्यामि द्वितीयोऽहं प्राजापत्यक एव च
Nikshipamyahamagnitvam tvamagnih prathamo bhava
Bhavishyami dvitiyoham prajapatyaka eva cha
207.16
अङ्गिरा उवाच
कुरु पुण्यं प्रजास्वर्ग्यं भवाग्निस्तिमिरापहः
मां च देव कुरुष्वाग्ने प्रथमं पुत्रमञ्जसा
Angira uvacha
Kuru punyam prajasvargyam bhavagnistimirapahah
Mam cha deva kurushvagne prathamam putramanjasa
207.17
मार्कण्डेय उवाच
तच्छ्रुत्वाङ्गिरसो वाक्यं जातवेदास्तथाकरोत्
राजन्बृहस्पतिर्नाम तस्याप्यङ्गिरसः सुतः
Markandeya uvacha
Tachchhrutvangiraso vakyam jatavedastathakarot
Rajanbrihaspatirnama tasyapyangirasah sutah
207.18
ज्ञात्वा प्रथमजं तं तु वह्नेराङ्गिरसं सुतम्
उपेत्य देवाः पप्रच्छुः कारणं तत्र भारत
Gyatva prathamajam tam tu vahnerangirasam sutam
Upetya devah paprachchhuh karanam tatra bharata
207.19
स तु पृष्टस्तदा देवैस्ततः कारणमब्रवीत्
प्रत्यगृह्णंस्तु देवाश्च तद्वचोऽङ्गिरसस्तदा
Sa tu prishtastada devaistatah karanamabravit
Pratyagrihnanstu devashcha tadvachongirasastada
207.20
अत्र नानाविधानग्नीन्प्रवक्ष्यामि महाप्रभान्
कर्मभिर्बहुभिः ख्यातान्नानात्वं ब्राह्मणेष्विह
Atra nanavidhanagninpravakshyami mahaprabhan
Karmabhirbahubhih khyatannanatvam brahmaneshviha