UtshovChapter 192
192.1
वैशंपायन उवाच
युधिष्ठिरो धर्मराजः पप्रच्छ भरतर्षभ
मार्कण्डेयं तपोवृद्धं दीर्घायुषमकल्मषम्
Vaishampayana uvacha
Yudhishthiro dharmarajah paprachchha bharatarshabha
Markandeyam tapovriddham dirghayushamakalmasham
192.2
विदितास्तव धर्मज्ञ देवदानवराक्षसाः
राजवंशाश्च विविधा ऋषिवंशाश्च शाश्वताः
न तेऽस्त्यविदितं किंचिदस्मिँल्लोके द्विजोत्तम
Viditastava dharmagya devadanavarakshasah
Rajavanshashcha vividha rishivanshashcha shashvatah
Na testyaviditam kinchidasminlloke dvijottama
192.3
कथां वेत्सि मुने दिव्यां मनुष्योरगरक्षसाम्
एतदिच्छाम्यहं श्रोतुं तत्त्वेन कथितं द्विज
Katham vetsi mune divyam manushyoragarakshasam
Etadichchhamyaham shrotum tattvena kathitam dvija
192.4
कुवलाश्व इति ख्यात इक्ष्वाकुरपराजितः
कथं नाम विपर्यासाद्धुन्धुमारत्वमागतः
Kuvalashva iti khyata ikshvakuraparajitah
Katham nama viparyasaddhundhumaratvamagatah
192.5
एतदिच्छामि तत्त्वेन ज्ञातुं भार्गवसत्तम
विपर्यस्तं यथा नाम कुवलाश्वस्य धीमतः
Etadichchhami tattvena gyatum bhargavasattama
Viparyastam yatha nama kuvalashvasya dhimatah
192.6
मार्कण्डेय उवाच
हन्त ते कथयिष्यामि शृणु राजन्युधिष्ठिर
धर्मिष्ठमिदमाख्यानं धुन्धुमारस्य तच्छृणु
Markandeya uvacha
Hanta te kathayishyami shrinu rajanyudhishthira
Dharmishthamidamakhyanam dhundhumarasya tachchhrinu
192.7
यथा स राजा इक्ष्वाकुः कुवलाश्वो महीपतिः
धुन्धुमारत्वमगमत्तच्छृणुष्व महीपते
Yatha sa raja ikshvakuh kuvalashvo mahipatih
Dhundhumaratvamagamattachchhrinushva mahipate
192.8
महर्षिर्विश्रुतस्तात उत्तङ्क इति भारत
मरुधन्वसु रम्येषु आश्रमस्तस्य कौरव
Maharshirvishrutastata uttanka iti bharata
Marudhanvasu ramyeshu ashramastasya kaurava
192.9
उत्तङ्कस्तु महाराज तपोऽतप्यत्सुदुश्चरम्
आरिराधयिषुर्विष्णुं बहून्वर्षगणान्विभो
Uttankastu maharaja tapotapyatsudushcharam
Ariradhayishurvishnum bahunvarshagananvibho
192.10
तस्य प्रीतः स भगवान्साक्षाद्दर्शनमेयिवान्
दृष्ट्वैव चर्षिः प्रह्वस्तं तुष्टाव विविधैः स्तवैः
Tasya pritah sa bhagavansakshaddarshanameyivan
Drishtvaiva charshih prahvastam tushtava vividhaih stavaih
192.11
त्वया देव प्रजाः सर्वाः सदेवासुरमानवाः
स्थावराणि च भूतानि जङ्गमानि तथैव च
ब्रह्म वेदाश्च वेद्यं च त्वया सृष्टं महाद्युते
Tvaya deva prajah sarvah sadevasuramanavah
Sthavarani cha bhutani jangamani tathaiva cha
Brahma vedashcha vedyam cha tvaya srishtam mahadyute
192.12
शिरस्ते गगनं देव नेत्रे शशिदिवाकरौ
निःश्वासः पवनश्चापि तेजोऽग्निश्च तवाच्युत
बाहवस्ते दिशः सर्वाः कुक्षिश्चापि महार्णवः
Shiraste gaganam deva netre shashidivakarau
Nihshvasah pavanashchapi tejognishcha tavachyuta
Bahavaste dishah sarvah kukshishchapi maharnavah
192.13
ऊरू ते पर्वता देव खं नाभिर्मधुसूदन
पादौ ते पृथिवी देवी रोमाण्योषधयस्तथा
Uru te parvata deva kham nabhirmadhusudana
Padau te prithivi devi romanyoshadhayastatha
192.14
इन्द्रसोमाग्निवरुणा देवासुरमहोरगाः
प्रह्वास्त्वामुपतिष्ठन्ति स्तुवन्तो विविधैः स्तवैः
Indrasomagnivaruna devasuramahoragah
Prahvastvamupatishthanti stuvanto vividhaih stavaih
192.15
त्वया व्याप्तानि सर्वाणि भूतानि भुवनेश्वर
योगिनः सुमहावीर्याः स्तुवन्ति त्वां महर्षयः
Tvaya vyaptani sarvani bhutani bhuvaneshvara
Yoginah sumahaviryah stuvanti tvam maharshayah
192.16
त्वयि तुष्टे जगत्स्वस्थं त्वयि क्रुद्धे महद्भयम्
भयानामपनेतासि त्वमेकः पुरुषोत्तम
Tvayi tushte jagatsvastham tvayi kruddhe mahadbhayam
Bhayanamapanetasi tvamekah purushottama
192.17
देवानां मानुषाणां च सर्वभूतसुखावहः
त्रिभिर्विक्रमणैर्देव त्रयो लोकास्त्वयाहृताः
असुराणां समृद्धानां विनाशश्च त्वया कृतः
Devanam manushanam cha sarvabhutasukhavahah
Tribhirvikramanairdeva trayo lokastvayahritah
Asuranam samriddhanam vinashashcha tvaya kritah
192.18
तव विक्रमणैर्देवा निर्वाणमगमन्परम्
पराभवं च दैत्येन्द्रास्त्वयि क्रुद्धे महाद्युते
Tava vikramanairdeva nirvanamagamanparam
Parabhavam cha daityendrastvayi kruddhe mahadyute
192.19
त्वं हि कर्ता विकर्ता च भूतानामिह सर्वशः
आराधयित्वा त्वां देवाः सुखमेधन्ति सर्वशः
Tvam hi karta vikarta cha bhutanamiha sarvashah
Aradhayitva tvam devah sukhamedhanti sarvashah
192.20
एवं स्तुतो हृषीकेश उत्तङ्केन महात्मना
उत्तङ्कमब्रवीद्विष्णुः प्रीतस्तेऽहं वरं वृणु
Evam stuto hrishikesha uttankena mahatmana
Uttankamabravidvishnuh pritasteham varam vrinu
192.21
उत्तङ्क उवाच
पर्याप्तो मे वरो ह्येष यदहं दृष्टवान्हरिम्
पुरुषं शाश्वतं दिव्यं स्रष्टारं जगतः प्रभुम्
Uttanka uvacha
Paryapto me varo hyesha yadaham drishtavanharim
Purusham shashvatam divyam srashtaram jagatah prabhum
192.22
विष्णुरुवाच
प्रीतस्तेऽहमलौल्येन भक्त्या च द्विजसत्तम
अवश्यं हि त्वया ब्रह्मन्मत्तो ग्राह्यो वरो द्विज
Vishnuruvacha
Pritastehamalaulyena bhaktya cha dvijasattama
Avashyam hi tvaya brahmanmatto grahyo varo dvija
192.23
एवं संछन्द्यमानस्तु वरेण हरिणा तदा
उत्तङ्कः प्राञ्जलिर्वव्रे वरं भरतसत्तम
Evam sanchhandyamanastu varena harina tada
Uttankah pranjalirvavre varam bharatasattama
192.24
यदि मे भगवान्प्रीतः पुण्डरीकनिभेक्षणः
धर्मे सत्ये दमे चैव बुद्धिर्भवतु मे सदा
अभ्यासश्च भवेद्भक्त्या त्वयि नित्यं महेश्वर
Yadi me bhagavanpritah pundarikanibhekshanah
Dharme satye dame chaiva buddhirbhavatu me sada
Abhyasashcha bhavedbhaktya tvayi nityam maheshvara
192.25
विष्णुरुवाच
सर्वमेतद्धि भविता मत्प्रसादात्तव द्विज
प्रतिभास्यति योगश्च येन युक्तो दिवौकसाम्
त्रयाणामपि लोकानां महत्कार्यं करिष्यसि
Vishnuruvacha
Sarvametaddhi bhavita matprasadattava dvija
Pratibhasyati yogashcha yena yukto divaukasam
Trayanamapi lokanam mahatkaryam karishyasi
192.26
उत्सादनार्थं लोकानां धुन्धुर्नाम महासुरः
तपस्यति तपो घोरं शृणु यस्तं हनिष्यति
Utsadanartham lokanam dhundhurnama mahasurah
Tapasyati tapo ghoram shrinu yastam hanishyati
192.27
बृहदश्व इति ख्यातो भविष्यति महीपतिः
तस्य पुत्रः शुचिर्दान्तः कुवलाश्व इति श्रुतः
Brihadashva iti khyato bhavishyati mahipatih
Tasya putrah shuchirdantah kuvalashva iti shrutah
192.28
स योगबलमास्थाय मामकं पार्थिवोत्तमः
शासनात्तव विप्रर्षे धुन्धुमारो भविष्यति
Sa yogabalamasthaya mamakam parthivottamah
Shasanattava viprarshe dhundhumaro bhavishyati
192.29
मार्कण्डेय उवाच
उत्तङ्कमेवमुक्त्वा तु विष्णुरन्तरधीयत
Markandeya uvacha
Uttankamevamuktva tu vishnurantaradhiyata