UtshovChapter 162
162.1
वैशंपायन उवाच
एतस्मिन्नेव काले तु सर्ववादित्रनिस्वनः
बभूव तुमुलः शब्दस्त्वन्तरिक्षे दिवौकसाम्
Vaishampayana uvacha
Etasminneva kale tu sarvavaditranisvanah
Babhuva tumulah shabdastvantarikshe divaukasam
162.2
रथनेमिस्वनश्चैव घण्टाशब्दश्च भारत
पृथग्व्यालमृगाणां च पक्षिणां चैव सर्वशः
Rathanemisvanashchaiva ghantashabdashcha bharata
Prithagvyalamriganam cha pakshinam chaiva sarvashah
162.3
तं समन्तादनुययुर्गन्धर्वाप्सरसस्तथा
विमानैः सूर्यसंकाशैर्देवराजमरिंदमम्
Tam samantadanuyayurgandharvapsarasastatha
Vimanaih suryasankashairdevarajamarindamam
162.4
ततः स हरिभिर्युक्तं जाम्बूनदपरिष्कृतम्
मेघनादिनमारुह्य श्रिया परमया ज्वलन्
Tatah sa haribhiryuktam jambunadaparishkritam
Meghanadinamaruhya shriya paramaya jvalan
162.5
पार्थानभ्याजगामाशु देवराजः पुरंदरः
आगत्य च सहस्राक्षो रथादवरुरोह वै
Parthanabhyajagamashu devarajah purandarah
Agatya cha sahasraksho rathadavaruroha vai
162.6
तं दृष्ट्वैव महात्मानं धर्मराजो युधिष्ठिरः
भ्रातृभिः सहितः श्रीमान्देवराजमुपागमत्
Tam drishtvaiva mahatmanam dharmarajo yudhishthirah
Bhratribhih sahitah shrimandevarajamupagamat
162.7
पूजयामास चैवाथ विधिवद्भूरिदक्षिणः
यथार्हममितात्मानं विधिदृष्टेन कर्मणा
Pujayamasa chaivatha vidhivadbhuridakshinah
Yatharhamamitatmanam vidhidrishtena karmana
162.8
धनंजयश्च तेजस्वी प्रणिपत्य पुरंदरम्
भृत्यवत्प्रणतस्तस्थौ देवराजसमीपतः
Dhananjayashcha tejasvi pranipatya purandaram
Bhrityavatpranatastasthau devarajasamipatah
162.9
आप्यायत महातेजाः कुन्तीपुत्रो युधिष्ठिरः
धनंजयमभिप्रेक्ष्य विनीतं स्थितमन्तिके
Apyayata mahatejah kuntiputro yudhishthirah
Dhananjayamabhiprekshya vinitam sthitamantike
162.10
जटिलं देवराजस्य तपोयुक्तमकल्मषम्
हर्षेण महताविष्टः फल्गुनस्याथ दर्शनात्
Jatilam devarajasya tapoyuktamakalmasham
Harshena mahatavishtah phalgunasyatha darshanat
162.11
तं तथादीनमनसं राजानं हर्षसंप्लुतम्
उवाच वचनं धीमान्देवराजः पुरंदरः
Tam tathadinamanasam rajanam harshasamplutam
Uvacha vachanam dhimandevarajah purandarah
162.12
त्वमिमां पृथिवीं राजन्प्रशासिष्यसि पाण्डव
स्वस्ति प्राप्नुहि कौन्तेय काम्यकं पुनराश्रमम्
Tvamimam prithivim rajanprashasishyasi pandava
Svasti prapnuhi kaunteya kamyakam punarashramam
162.13
अस्त्राणि लब्धानि च पाण्डवेन; सर्वाणि मत्तः प्रयतेन राजन्
कृतप्रियश्चास्मि धनंजयेन; जेतुं न शक्यस्त्रिभिरेष लोकैः
Astrani labdhani cha pandavena; sarvani mattah prayatena rajan
Kritapriyashchasmi dhananjayena; jetum na shakyastribhiresha lokaih
162.14
एवमुक्त्वा सहस्राक्षः कुन्तीपुत्रं युधिष्ठिरम्
जगाम त्रिदिवं हृष्टः स्तूयमानो महर्षिभिः
Evamuktva sahasrakshah kuntiputram yudhishthiram
Jagama tridivam hrishtah stuyamano maharshibhih
162.15
धनेश्वरगृहस्थानां पाण्डवानां समागमम्
शक्रेण य इमं विद्वानधीयीत समाहितः
Dhaneshvaragrihasthanam pandavanam samagamam
Shakrena ya imam vidvanadhiyita samahitah
162.16
संवत्सरं ब्रह्मचारी नियतः संशितव्रतः
स जीवेत निराबाधः सुसुखी शरदां शतम्
Sanvatsaram brahmachari niyatah sanshitavratah
Sa jiveta nirabadhah susukhi sharadam shatam