UtshovChapter 151
151.1
वैशंपायन उवाच
स गत्वा नलिनीं रम्यां राक्षसैरभिरक्षिताम्
कैलासशिखरे रम्ये ददर्श शुभकानने
Vaishampayana uvacha
Sa gatva nalinim ramyam rakshasairabhirakshitam
Kailasashikhare ramye dadarsha shubhakanane
151.2
कुबेरभवनाभ्याशे जातां पर्वतनिर्झरे
सुरम्यां विपुलच्छायां नानाद्रुमलतावृताम्
Kuberabhavanabhyashe jatam parvatanirjhare
Suramyam vipulachchhayam nanadrumalatavritam
151.3
हरिताम्बुजसंछन्नां दिव्यां कनकपुष्कराम्
पवित्रभूतां लोकस्य शुभामद्भुतदर्शनाम्
Haritambujasanchhannam divyam kanakapushkaram
Pavitrabhutam lokasya shubhamadbhutadarshanam
151.4
तत्रामृतरसं शीतं लघु कुन्तीसुतः शुभम्
ददर्श विमलं तोयं शिवं बहु च पाण्डवः
Tatramritarasam shitam laghu kuntisutah shubham
Dadarsha vimalam toyam shivam bahu cha pandavah
151.5
तां तु पुष्करिणीं रम्यां पद्मसौगन्धिकायुताम्
जातरूपमयैः पद्मैश्छन्नां परमगन्धिभिः
Tam tu pushkarinim ramyam padmasaugandhikayutam
Jatarupamayaih padmaishchhannam paramagandhibhih
151.6
वैडूर्यवरनालैश्च बहुचित्रैर्मनोहरैः
हंसकारण्डवोद्धूतैः सृजद्भिरमलं रजः
Vaiduryavaranalaishcha bahuchitrairmanoharaih
Hansakarandavoddhutaih srijadbhiramalam rajah
151.7
आक्रीडं यक्षराजस्य कुबेरस्य महात्मनः
गन्धर्वैरप्सरोभिश्च देवैश्च परमार्चिताम्
Akridam yaksharajasya kuberasya mahatmanah
Gandharvairapsarobhishcha devaishcha paramarchitam
151.8
सेवितामृषिभिर्दिव्यां यक्षैः किंपुरुषैस्तथा
राक्षसैः किंनरैश्चैव गुप्तां वैश्रवणेन च
Sevitamrishibhirdivyam yakshaih kimpurushaistatha
Rakshasaih kinnaraishchaiva guptam vaishravanena cha
151.9
तां च दृष्ट्वैव कौन्तेयो भीमसेनो महाबलः
बभूव परमप्रीतो दिव्यं संप्रेक्ष्य तत्सरः
Tam cha drishtvaiva kaunteyo bhimaseno mahabalah
Babhuva paramaprito divyam samprekshya tatsarah
151.10
तच्च क्रोधवशा नाम राक्षसा राजशासनात्
रक्षन्ति शतसाहस्राश्चित्रायुधपरिच्छदाः
Tachcha krodhavasha nama rakshasa rajashasanat
Rakshanti shatasahasrashchitrayudhaparichchhadah
151.11
ते तु दृष्ट्वैव कौन्तेयमजिनैः परिवारितम्
रुक्माङ्गदधरं वीरं भीमं भीमपराक्रमम्
Te tu drishtvaiva kaunteyamajinaih parivaritam
Rukmangadadharam viram bhimam bhimaparakramam
151.12
सायुधं बद्धनिस्त्रिंशमशङ्कितमरिंदमम्
पुष्करेप्सुमुपायान्तमन्योन्यमभिचुक्रुशुः
Sayudham baddhanistrinshamashankitamarindamam
Pushkarepsumupayantamanyonyamabhichukrushuh
151.13
अयं पुरुषशार्दूलः सायुधोऽजिनसंवृतः
यच्चिकीर्षुरिह प्राप्तस्तत्संप्रष्टुमिहार्हथ
Ayam purushashardulah sayudhojinasanvritah
Yachchikirshuriha praptastatsamprashtumiharhatha
151.14
ततः सर्वे महाबाहुं समासाद्य वृकोदरम्
तेजोयुक्तमपृच्छन्त कस्त्वमाख्यातुमर्हसि
Tatah sarve mahabahum samasadya vrikodaram
Tejoyuktamaprichchhanta kastvamakhyatumarhasi
151.15
मुनिवेषधरश्चासि चीरवासाश्च लक्ष्यसे
यदर्थमसि संप्राप्तस्तदाचक्ष्व महाद्युते
Muniveshadharashchasi chiravasashcha lakshyase
Yadarthamasi sampraptastadachakshva mahadyute