UtshovChapter 150
150.1
वैशंपायन उवाच
ततः संहृत्य विपुलं तद्वपुः कामवर्धितम्
भीमसेनं पुनर्दोर्भ्यां पर्यष्वजत वानरः
Vaishampayana uvacha
Tatah sanhritya vipulam tadvapuh kamavardhitam
Bhimasenam punardorbhyam paryashvajata vanarah
150.2
परिष्वक्तस्य तस्याशु भ्रात्रा भीमस्य भारत
श्रमो नाशमुपागच्छत्सर्वं चासीत्प्रदक्षिणम्
Parishvaktasya tasyashu bhratra bhimasya bharata
Shramo nashamupagachchhatsarvam chasitpradakshinam
150.3
ततः पुनरथोवाच पर्यश्रुनयनो हरिः
भीममाभाष्य सौहार्दाद्बाष्पगद्गदया गिरा
Tatah punarathovacha paryashrunayano harih
Bhimamabhashya sauhardadbashpagadgadaya gira
150.4
गच्छ वीर स्वमावासं स्मर्तव्योऽस्मि कथान्तरे
इहस्थश्च कुरुश्रेष्ठ न निवेद्योऽस्मि कस्यचित्
Gachchha vira svamavasam smartavyosmi kathantare
Ihasthashcha kurushreshtha na nivedyosmi kasyachit
150.5
धनदस्यालयाच्चापि विसृष्टानां महाबल
देशकाल इहायातुं देवगन्धर्वयोषिताम्
Dhanadasyalayachchapi visrishtanam mahabala
Deshakala ihayatum devagandharvayoshitam
150.6
ममापि सफलं चक्षुः स्मारितश्चास्मि राघवम्
मानुषं गात्रसंस्पर्शं गत्वा भीम त्वया सह
Mamapi saphalam chakshuh smaritashchasmi raghavam
Manusham gatrasansparsham gatva bhima tvaya saha
150.7
तदस्मद्दर्शनं वीर कौन्तेयामोघमस्तु ते
भ्रातृत्वं त्वं पुरस्कृत्य वरं वरय भारत
Tadasmaddarshanam vira kaunteyamoghamastu te
Bhratritvam tvam puraskritya varam varaya bharata
150.8
यदि तावन्मया क्षुद्रा गत्वा वारणसाह्वयम्
धार्तराष्ट्रा निहन्तव्या यावदेतत्करोम्यहम्
Yadi tavanmaya kshudra gatva varanasahvayam
Dhartarashtra nihantavya yavadetatkaromyaham
150.9
शिलया नगरं वा तन्मर्दितव्यं मया यदि
यावदद्य करोम्येतत्कामं तव महाबल
Shilaya nagaram va tanmarditavyam maya yadi
Yavadadya karomyetatkamam tava mahabala
150.10
भीमसेनस्तु तद्वाक्यं श्रुत्वा तस्य महात्मनः
प्रत्युवाच हनूमन्तं प्रहृष्टेनान्तरात्मना
Bhimasenastu tadvakyam shrutva tasya mahatmanah
Pratyuvacha hanumantam prahrishtenantaratmana
150.11
कृतमेव त्वया सर्वं मम वानरपुंगव
स्वस्ति तेऽस्तु महाबाहो क्षामये त्वां प्रसीद मे
Kritameva tvaya sarvam mama vanarapungava
Svasti testu mahabaho kshamaye tvam prasida me
150.12
सनाथाः पाण्डवाः सर्वे त्वया नाथेन वीर्यवन्
तवैव तेजसा सर्वान्विजेष्यामो वयं रिपून्
Sanathah pandavah sarve tvaya nathena viryavan
Tavaiva tejasa sarvanvijeshyamo vayam ripun
150.13
एवमुक्तस्तु हनुमान्भीमसेनमभाषत
भ्रातृत्वात्सौहृदाच्चापि करिष्यामि तव प्रियम्
Evamuktastu hanumanbhimasenamabhashata
Bhratritvatsauhridachchapi karishyami tava priyam
150.14
चमूं विगाह्य शत्रूणां शरशक्तिसमाकुलाम्
यदा सिंहरवं वीर करिष्यसि महाबल
तदाहं बृंहयिष्यामि स्वरवेण रवं तव
Chamum vigahya shatrunam sharashaktisamakulam
Yada sinharavam vira karishyasi mahabala
Tadaham brinhayishyami svaravena ravam tava
150.15
विजयस्य ध्वजस्थश्च नादान्मोक्ष्यामि दारुणान्
शत्रूणां ते प्राणहरानित्युक्त्वान्तरधीयत
Vijayasya dhvajasthashcha nadanmokshyami darunan
Shatrunam te pranaharanityuktvantaradhiyata
150.16
गते तस्मिन्हरिवरे भीमोऽपि बलिनां वरः
तेन मार्गेण विपुलं व्यचरद्गन्धमादनम्
Gate tasminharivare bhimopi balinam varah
Tena margena vipulam vyacharadgandhamadanam
150.17
अनुस्मरन्वपुस्तस्य श्रियं चाप्रतिमां भुवि
माहात्म्यमनुभावं च स्मरन्दाशरथेर्ययौ
Anusmaranvapustasya shriyam chapratimam bhuvi
Mahatmyamanubhavam cha smarandasharatheryayau
150.18
स तानि रमणीयानि वनान्युपवनानि च
विलोडयामास तदा सौगन्धिकवनेप्सया
Sa tani ramaniyani vananyupavanani cha
Vilodayamasa tada saugandhikavanepsaya
150.19
फुल्लपद्मविचित्राणि पुष्पितानि वनानि च
मत्तवारणयूथानि पङ्कक्लिन्नानि भारत
वर्षतामिव मेघानां वृन्दानि ददृशे तदा
Phullapadmavichitrani pushpitani vanani cha
Mattavaranayuthani pankaklinnani bharata
Varshatamiva meghanam vrindani dadrishe tada
150.20
हरिणैश्चञ्चलापाङ्गैर्हरिणीसहितैर्वने
सशष्पकवलैः श्रीमान्पथि दृष्टो द्रुतं ययौ
Harinaishchanchalapangairharinisahitairvane
Sashashpakavalaih shrimanpathi drishto drutam yayau
150.21
महिषैश्च वराहैश्च शार्दूलैश्च निषेवितम्
व्यपेतभीर्गिरिं शौर्याद्भीमसेनो व्यगाहत
Mahishaishcha varahaishcha shardulaishcha nishevitam
Vyapetabhirgirim shauryadbhimaseno vyagahata
150.22
कुसुमानतशाखैश्च ताम्रपल्लवकोमलैः
याच्यमान इवारण्ये द्रुमैर्मारुतकम्पितैः
Kusumanatashakhaishcha tamrapallavakomalaih
Yachyamana ivaranye drumairmarutakampitaih
150.23
कृतपद्माञ्जलिपुटा मत्तषट्पदसेविताः
प्रियतीर्थवना मार्गे पद्मिनीः समतिक्रमन्
Kritapadmanjaliputa mattashatpadasevitah
Priyatirthavana marge padminih samatikraman
150.24
सज्जमानमनोदृष्टिः फुल्लेषु गिरिसानुषु
द्रौपदीवाक्यपाथेयो भीमः शीघ्रतरं ययौ
Sajjamanamanodrishtih phulleshu girisanushu
Draupadivakyapatheyo bhimah shighrataram yayau
150.25
परिवृत्तेऽहनि ततः प्रकीर्णहरिणे वने
काञ्चनैर्विमलैः पद्मैर्ददर्श विपुलां नदीम्
Parivrittehani tatah prakirnaharine vane
Kanchanairvimalaih padmairdadarsha vipulam nadim
150.26
मत्तकारण्डवयुतां चक्रवाकोपशोभिताम्
रचितामिव तस्याद्रेर्मालां विमलपङ्कजाम्
Mattakarandavayutam chakravakopashobhitam
Rachitamiva tasyadrermalam vimalapankajam
150.27
तस्यां नद्यां महासत्त्वः सौगन्धिकवनं महत्
अपश्यत्प्रीतिजननं बालार्कसदृशद्युति
Tasyam nadyam mahasattvah saugandhikavanam mahat
Apashyatpritijananam balarkasadrishadyuti
150.28
तद्दृष्ट्वा लब्धकामः स मनसा पाण्डुनन्दनः
वनवासपरिक्लिष्टां जगाम मनसा प्रियाम्
Taddrishtva labdhakamah sa manasa pandunandanah
Vanavasapariklishtam jagama manasa priyam