UtshovChapter 138
138.1
लोमश उवाच
भरद्वाजस्तु कौन्तेय कृत्वा स्वाध्यायमाह्निकम्
समित्कलापमादाय प्रविवेश स्वमाश्रमम्
Lomasha uvacha
Bharadvajastu kaunteya kritva svadhyayamahnikam
Samitkalapamadaya pravivesha svamashramam
138.2
तं स्म दृष्ट्वा पुरा सर्वे प्रत्युत्तिष्ठन्ति पावकाः
न त्वेनमुपतिष्ठन्ति हतपुत्रं तदाग्नयः
Tam sma drishtva pura sarve pratyuttishthanti pavakah
Na tvenamupatishthanti hataputram tadagnayah
138.3
वैकृतं त्वग्निहोत्रे स लक्षयित्वा महातपाः
तमन्धं शूद्रमासीनं गृहपालमथाब्रवीत्
Vaikritam tvagnihotre sa lakshayitva mahatapah
Tamandham shudramasinam grihapalamathabravit
138.4
किं नु मे नाग्नयः शूद्र प्रतिनन्दन्ति दर्शनम्
त्वं चापि न यथापूर्वं कच्चित्क्षेममिहाश्रमे
Kim nu me nagnayah shudra pratinandanti darshanam
Tvam chapi na yathapurvam kachchitkshemamihashrame
138.5
कच्चिन्न रैभ्यं पुत्रो मे गतवानल्पचेतनः
एतदाचक्ष्व मे शीघ्रं न हि मे शुध्यते मनः
Kachchinna raibhyam putro me gatavanalpachetanah
Etadachakshva me shighram na hi me shudhyate manah
138.6
शूद्र उवाच
रैभ्यं गतो नूनमसौ सुतस्ते मन्दचेतनः
तथा हि निहतः शेते राक्षसेन बलीयसा
Shudra uvacha
Raibhyam gato nunamasau sutaste mandachetanah
Tatha hi nihatah shete rakshasena baliyasa
138.7
प्रकाल्यमानस्तेनायं शूलहस्तेन रक्षसा
अग्न्यागारं प्रति द्वारि मया दोर्भ्यां निवारितः
Prakalyamanastenayam shulahastena rakshasa
Agnyagaram prati dvari maya dorbhyam nivaritah
138.8
ततः स निहतो ह्यत्र जलकामोऽशुचिर्ध्रुवम्
संभावितो हि तूर्णेन शूलहस्तेन रक्षसा
Tatah sa nihato hyatra jalakamoshuchirdhruvam
Sambhavito hi turnena shulahastena rakshasa
138.9
लोमश उवाच
भरद्वाजस्तु शूद्रस्य तच्छ्रुत्वा विप्रियं वचः
गतासुं पुत्रमादाय विललाप सुदुःखितः
Lomasha uvacha
Bharadvajastu shudrasya tachchhrutva vipriyam vachah
Gatasum putramadaya vilalapa suduhkhitah
138.10
ब्राह्मणानां किलार्थाय ननु त्वं तप्तवांस्तपः
द्विजानामनधीता वै वेदाः संप्रतिभान्त्विति
Brahmananam kilarthaya nanu tvam taptavanstapah
Dvijanamanadhita vai vedah sampratibhantviti
138.11
तथा कल्याणशीलस्त्वं ब्राह्मणेषु महात्मसु
अनागाः सर्वभूतेषु कर्कशत्वमुपेयिवान्
Tatha kalyanashilastvam brahmaneshu mahatmasu
Anagah sarvabhuteshu karkashatvamupeyivan
138.12
प्रतिषिद्धो मया तात रैभ्यावसथदर्शनात्
गतवानेव तं क्षुद्रं कालान्तकयमोपमम्
Pratishiddho maya tata raibhyavasathadarshanat
Gatavaneva tam kshudram kalantakayamopamam
138.13
यः स जानन्महातेजा वृद्धस्यैकं ममात्मजम्
गतवानेव कोपस्य वशं परमदुर्मतिः
Yah sa jananmahateja vriddhasyaikam mamatmajam
Gatavaneva kopasya vasham paramadurmatih
138.14
पुत्रशोकमनुप्राप्य एष रैभ्यस्य कर्मणा
त्यक्ष्यामि त्वामृते पुत्र प्राणानिष्टतमान्भुवि
Putrashokamanuprapya esha raibhyasya karmana
Tyakshyami tvamrite putra prananishtatamanbhuvi
138.15
यथाहं पुत्रशोकेन देहं त्यक्ष्यामि किल्बिषी
तथा ज्येष्ठः सुतो रैभ्यं हिंस्याच्छीघ्रमनागसम्
Yathaham putrashokena deham tyakshyami kilbishi
Tatha jyeshthah suto raibhyam hinsyachchhighramanagasam
138.16
सुखिनो वै नरा येषां जात्या पुत्रो न विद्यते
ते पुत्रशोकमप्राप्य विचरन्ति यथासुखम्
Sukhino vai nara yesham jatya putro na vidyate
Te putrashokamaprapya vicharanti yathasukham
138.17
ये तु पुत्रकृताच्छोकाद्भृशं व्याकुलचेतसः
शपन्तीष्टान्सखीनार्तास्तेभ्यः पापतरो नु कः
Ye tu putrakritachchhokadbhrisham vyakulachetasah
Shapantishtansakhinartastebhyah papataro nu kah
138.18
परासुश्च सुतो दृष्टः शप्तश्चेष्टः सखा मया
ईदृशीमापदं को नु द्वितीयोऽनुभविष्यति
Parasushcha suto drishtah shaptashcheshtah sakha maya
Idrishimapadam ko nu dvitiyonubhavishyati
138.19
विलप्यैवं बहुविधं भरद्वाजोऽदहत्सुतम्
सुसमिद्धं ततः पश्चात्प्रविवेश हुताशनम्
Vilapyaivam bahuvidham bharadvajodahatsutam
Susamiddham tatah pashchatpravivesha hutashanam