UtshovChapter 136
136.1
यवक्रीरुवाच
प्रतिभास्यन्ति वै वेदा मम तातस्य चोभयोः
अति चान्यान्भविष्यावो वरा लब्धास्तथा मया
Yavakriruvacha
Pratibhasyanti vai veda mama tatasya chobhayoh
Ati chanyanbhavishyavo vara labdhastatha maya
136.2
भरद्वाज उवाच
दर्पस्ते भविता तात वराँल्लब्ध्वा यथेप्सितान्
स दर्पपूर्णः कृपणः क्षिप्रमेव विनश्यसि
Bharadvaja uvacha
Darpaste bhavita tata varanllabdhva yathepsitan
Sa darpapurnah kripanah kshiprameva vinashyasi
136.3
अत्राप्युदाहरन्तीमा गाथा देवैरुदाहृताः
ऋषिरासीत्पुरा पुत्र बालधिर्नाम वीर्यवान्
Atrapyudaharantima gatha devairudahritah
Rishirasitpura putra baladhirnama viryavan
136.4
स पुत्रशोकादुद्विग्नस्तपस्तेपे सुदुश्चरम्
भवेन्मम सुतोऽमर्त्य इति तं लब्धवांश्च सः
Sa putrashokadudvignastapastepe sudushcharam
Bhavenmama sutomartya iti tam labdhavanshcha sah
136.5
तस्य प्रसादो देवैश्च कृतो न त्वमरैः समः
नामर्त्यो विद्यते मर्त्यो निमित्तायुर्भविष्यति
Tasya prasado devaishcha krito na tvamaraih samah
Namartyo vidyate martyo nimittayurbhavishyati
136.6
बालधिरुवाच
यथेमे पर्वताः शश्वत्तिष्ठन्ति सुरसत्तमाः
अक्षयास्तन्निमित्तं मे सुतस्यायुर्भवेदिति
Baladhiruvacha
Yatheme parvatah shashvattishthanti surasattamah
Akshayastannimittam me sutasyayurbhavediti
136.7
भरद्वाज उवाच
तस्य पुत्रस्तदा जज्ञे मेधावी क्रोधनः सदा
स तच्छ्रुत्वाकरोद्दर्पमृषींश्चैवावमन्यत
Bharadvaja uvacha
Tasya putrastada jagye medhavi krodhanah sada
Sa tachchhrutvakaroddarpamrishinshchaivavamanyata
136.8
विकुर्वाणो मुनीनां तु चरमाणो महीमिमाम्
आससाद महावीर्यं धनुषाक्षं मनीषिणम्
Vikurvano muninam tu charamano mahimimam
Asasada mahaviryam dhanushaksham manishinam
136.9
तस्यापचक्रे मेधावी तं शशाप स वीर्यवान्
भव भस्मेति चोक्तः स न भस्म समपद्यत
Tasyapachakre medhavi tam shashapa sa viryavan
Bhava bhasmeti choktah sa na bhasma samapadyata
136.10
धनुषाक्षस्तु तं दृष्ट्वा मेधाविनमनामयम्
निमित्तमस्य महिषैर्भेदयामास वीर्यवान्
Dhanushakshastu tam drishtva medhavinamanamayam
Nimittamasya mahishairbhedayamasa viryavan
136.11
स निमित्ते विनष्टे तु ममार सहसा शिशुः
तं मृतं पुत्रमादाय विललाप ततः पिता
Sa nimitte vinashte tu mamara sahasa shishuh
Tam mritam putramadaya vilalapa tatah pita
136.12
लालप्यमानं तं दृष्ट्वा मुनयः पुनरार्तवत्
ऊचुर्वेदोक्तया पूर्वं गाथया तन्निबोध मे
Lalapyamanam tam drishtva munayah punarartavat
Uchurvedoktaya purvam gathaya tannibodha me
136.13
न दिष्टमर्थमत्येतुमीशो मर्त्यः कथंचन
महिषैर्भेदयामास धनुषाक्षो महीधरान्
Na dishtamarthamatyetumisho martyah kathanchana
Mahishairbhedayamasa dhanushaksho mahidharan
136.14
एवं लब्ध्वा वरान्बाला दर्पपूर्णास्तरस्विनः
क्षिप्रमेव विनश्यन्ति यथा न स्यात्तथा भवान्
Evam labdhva varanbala darpapurnastarasvinah
Kshiprameva vinashyanti yatha na syattatha bhavan
136.15
एष रैभ्यो महावीर्यः पुत्रौ चास्य तथाविधौ
तं यथा पुत्र नाभ्येषि तथा कुर्यास्त्वतन्द्रितः
Esha raibhyo mahaviryah putrau chasya tathavidhau
Tam yatha putra nabhyeshi tatha kuryastvatandritah
136.16
स हि क्रुद्धः समर्थस्त्वां पुत्र पीडयितुं रुषा
वैद्यश्चापि तपस्वी च कोपनश्च महानृषिः
Sa hi kruddhah samarthastvam putra pidayitum rusha
Vaidyashchapi tapasvi cha kopanashcha mahanrishih
136.17
यवक्रीरुवाच
एवं करिष्ये मा तापं तात कार्षीः कथंचन
यथा हि मे भवान्मान्यस्तथा रैभ्यः पिता मम
Yavakriruvacha
Evam karishye ma tapam tata karshih kathanchana
Yatha hi me bhavanmanyastatha raibhyah pita mama
136.18
लोमश उवाच
उक्त्वा स पितरं श्लक्ष्णं यवक्रीरकुतोभयः
विप्रकुर्वन्नृषीनन्यानतुष्यत्परया मुदा
Lomasha uvacha
Uktva sa pitaram shlakshnam yavakrirakutobhayah
Viprakurvannrishinanyanatushyatparaya muda