UtshovChapter 131
131.1
श्येन उवाच
धर्मात्मानं त्वाहुरेकं सर्वे राजन्महीक्षितः
स वै धर्मविरुद्धं त्वं कस्मात्कर्म चिकीर्षसि
Shyena uvacha
Dharmatmanam tvahurekam sarve rajanmahikshitah
Sa vai dharmaviruddham tvam kasmatkarma chikirshasi
131.2
विहितं भक्षणं राजन्पीड्यमानस्य मे क्षुधा
मा भाङ्क्षीर्धर्मलोभेन धर्ममुत्सृष्टवानसि
Vihitam bhakshanam rajanpidyamanasya me kshudha
Ma bhankshirdharmalobhena dharmamutsrishtavanasi
131.3
राजोवाच
संत्रस्तरूपस्त्राणार्थी त्वत्तो भीतो महाद्विज
मत्सकाशमनुप्राप्तः प्राणगृध्नुरयं द्विजः
Rajovacha
Santrastarupastranarthi tvatto bhito mahadvija
Matsakashamanupraptah pranagridhnurayam dvijah
131.4
एवमभ्यागतस्येह कपोतस्याभयार्थिनः
अप्रदाने परोऽधर्मः किं त्वं श्येन प्रपश्यसि
Evamabhyagatasyeha kapotasyabhayarthinah
Apradane parodharmah kim tvam shyena prapashyasi
131.5
प्रस्पन्दमानः संभ्रान्तः कपोतः श्येन लक्ष्यते
मत्सकाशं जीवितार्थी तस्य त्यागो विगर्हितः
Praspandamanah sambhrantah kapotah shyena lakshyate
Matsakasham jivitarthi tasya tyago vigarhitah
131.6
श्येन उवाच
आहारात्सर्वभूतानि संभवन्ति महीपते
आहारेण विवर्धन्ते तेन जीवन्ति जन्तवः
Shyena uvacha
Aharatsarvabhutani sambhavanti mahipate
Aharena vivardhante tena jivanti jantavah
131.7
शक्यते दुस्त्यजेऽप्यर्थे चिररात्राय जीवितुम्
न तु भोजनमुत्सृज्य शक्यं वर्तयितुं चिरम्
Shakyate dustyajepyarthe chiraratraya jivitum
Na tu bhojanamutsrijya shakyam vartayitum chiram
131.8
भक्ष्याद्विलोपितस्याद्य मम प्राणा विशां पते
विसृज्य कायमेष्यन्ति पन्थानमपुनर्भवम्
Bhakshyadvilopitasyadya mama prana visham pate
Visrijya kayameshyanti panthanamapunarbhavam
131.9
प्रमृते मयि धर्मात्मन्पुत्रदारं नशिष्यति
रक्षमाणः कपोतं त्वं बहून्प्राणान्नशिष्यसि
Pramrite mayi dharmatmanputradaram nashishyati
Rakshamanah kapotam tvam bahunpranannashishyasi
131.10
धर्मं यो बाधते धर्मो न स धर्मः कुधर्म तत्
अविरोधी तु यो धर्मः स धर्मः सत्यविक्रम
Dharmam yo badhate dharmo na sa dharmah kudharma tat
Avirodhi tu yo dharmah sa dharmah satyavikrama
131.11
विरोधिषु महीपाल निश्चित्य गुरुलाघवम्
न बाधा विद्यते यत्र तं धर्मं समुदाचरेत्
Virodhishu mahipala nishchitya gurulaghavam
Na badha vidyate yatra tam dharmam samudacharet
131.12
गुरुलाघवमाज्ञाय धर्माधर्मविनिश्चये
यतो भूयांस्ततो राजन्कुरु धर्मविनिश्चयम्
Gurulaghavamagyaya dharmadharmavinishchaye
Yato bhuyanstato rajankuru dharmavinishchayam
131.13
राजोवाच
बहुकल्याणसंयुक्तं भाषसे विहगोत्तम
सुपर्णः पक्षिराट्किं त्वं धर्मज्ञश्चास्यसंशयम्
तथा हि धर्मसंयुक्तं बहु चित्रं प्रभाषसे
Rajovacha
Bahukalyanasanyuktam bhashase vihagottama
Suparnah pakshiratkim tvam dharmagyashchasyasanshayam
Tatha hi dharmasanyuktam bahu chitram prabhashase
131.14
न तेऽस्त्यविदितं किंचिदिति त्वा लक्षयाम्यहम्
शरणैषिणः परित्यागं कथं साध्विति मन्यसे
Na testyaviditam kinchiditi tva lakshayamyaham
Sharanaishinah parityagam katham sadhviti manyase
131.15
आहारार्थं समारम्भस्तव चायं विहंगम
शक्यश्चाप्यन्यथा कर्तुमाहारोऽप्यधिकस्त्वया
Aharartham samarambhastava chayam vihangama
Shakyashchapyanyatha kartumaharopyadhikastvaya
131.16
गोवृषो वा वराहो वा मृगो वा महिषोऽपि वा
त्वदर्थमद्य क्रियतां यद्वान्यदभिकाङ्क्षसे
Govrisho va varaho va mrigo va mahishopi va
Tvadarthamadya kriyatam yadvanyadabhikankshase
131.17
श्येन उवाच
न वराहं न चोक्षाणं न मृगान्विविधांस्तथा
भक्षयामि महाराज किमन्नाद्येन तेन मे
Shyena uvacha
Na varaham na chokshanam na mriganvividhanstatha
Bhakshayami maharaja kimannadyena tena me
131.18
यस्तु मे दैवविहितो भक्षः क्षत्रियपुंगव
तमुत्सृज महीपाल कपोतमिममेव मे
Yastu me daivavihito bhakshah kshatriyapungava
Tamutsrija mahipala kapotamimameva me
131.19
श्येनाः कपोतान्खादन्ति स्थितिरेषा सनातनी
मा राजन्मार्गमाज्ञाय कदलीस्कन्धमारुह
Shyenah kapotankhadanti sthitiresha sanatani
Ma rajanmargamagyaya kadaliskandhamaruha
131.20
राजोवाच
राज्यं शिबीनामृद्धं वै शाधि पक्षिगणार्चित
यद्वा कामयसे किंचिच्छ्येन सर्वं ददानि ते
विनेमं पक्षिणं श्येन शरणार्थिनमागतम्
Rajovacha
Rajyam shibinamriddham vai shadhi pakshiganarchita
Yadva kamayase kinchichchhyena sarvam dadani te
Vinemam pakshinam shyena sharanarthinamagatam
131.21
येनेमं वर्जयेथास्त्वं कर्मणा पक्षिसत्तम
तदाचक्ष्व करिष्यामि न हि दास्ये कपोतकम्
Yenemam varjayethastvam karmana pakshisattama
Tadachakshva karishyami na hi dasye kapotakam
131.22
श्येन उवाच
उशीनर कपोते ते यदि स्नेहो नराधिप
आत्मनो मांसमुत्कृत्य कपोततुलया धृतम्
Shyena uvacha
Ushinara kapote te yadi sneho naradhipa
Atmano mansamutkritya kapotatulaya dhritam
131.23
यदा समं कपोतेन तव मांसं भवेन्नृप
तदा प्रदेयं तन्मह्यं सा मे तुष्टिर्भविष्यति
Yada samam kapotena tava mansam bhavennripa
Tada pradeyam tanmahyam sa me tushtirbhavishyati
131.24
राजोवाच
अनुग्रहमिमं मन्ये श्येन यन्माभियाचसे
तस्मात्तेऽद्य प्रदास्यामि स्वमांसं तुलया धृतम्
Rajovacha
Anugrahamimam manye shyena yanmabhiyachase
Tasmattedya pradasyami svamansam tulaya dhritam
131.25
लोमश उवाच
अथोत्कृत्य स्वमांसं तु राजा परमधर्मवित्
तुलयामास कौन्तेय कपोतेन सहाभिभो
Lomasha uvacha
Athotkritya svamansam tu raja paramadharmavit
Tulayamasa kaunteya kapotena sahabhibho
131.26
ध्रियमाणस्तु तुलया कपोतो व्यतिरिच्यते
पुनश्चोत्कृत्य मांसानि राजा प्रादादुशीनरः
Dhriyamanastu tulaya kapoto vyatirichyate
Punashchotkritya mansani raja pradadushinarah
131.27
न विद्यते यदा मांसं कपोतेन समं धृतम्
तत उत्कृत्तमांसोऽसावारुरोह स्वयं तुलाम्
Na vidyate yada mansam kapotena samam dhritam
Tata utkrittamansosavaruroha svayam tulam
131.28
श्येन उवाच
इन्द्रोऽहमस्मि धर्मज्ञ कपोतो हव्यवाडयम्
जिज्ञासमानौ धर्मे त्वां यज्ञवाटमुपागतौ
Shyena uvacha
Indrohamasmi dharmagya kapoto havyavadayam
Jigyasamanau dharme tvam yagyavatamupagatau
131.29
यत्ते मांसानि गात्रेभ्य उत्कृत्तानि विशां पते
एषा ते भास्वरी कीर्तिर्लोकानभिभविष्यति
Yatte mansani gatrebhya utkrittani visham pate
Esha te bhasvari kirtirlokanabhibhavishyati
131.30
यावल्लोके मनुष्यास्त्वां कथयिष्यन्ति पार्थिव
तावत्कीर्तिश्च लोकाश्च स्थास्यन्ति तव शाश्वताः
Yavalloke manushyastvam kathayishyanti parthiva
Tavatkirtishcha lokashcha sthasyanti tava shashvatah
131.31
लोमश उवाच
तत्पाण्डवेय सदनं राज्ञस्तस्य महात्मनः
पश्यस्वैतन्मया सार्धं पुण्यं पापप्रमोचनम्
Lomasha uvacha
Tatpandaveya sadanam ragyastasya mahatmanah
Pashyasvaitanmaya sardham punyam papapramochanam
131.32
अत्र वै सततं देवा मुनयश्च सनातनाः
दृश्यन्ते ब्राह्मणै राजन्पुण्यवद्भिर्महात्मभिः
Atra vai satatam deva munayashcha sanatanah
Drishyante brahmanai rajanpunyavadbhirmahatmabhih