Utshovঅধ্যায় 62
62.1
যুধিষ্ঠির উবাচ
কানি দানানি লোকেঽস্মিন্দাতুকামো মহীপতিঃ
গুণাধিকেভ্যো বিপ্রেভ্যো দদ্যাদ্ভরতসত্তম
62.2
কেন তুষ্যন্তি তে সদ্যস্তুষ্টাঃ কিং প্রদিশন্ত্যুত
শংস মে তন্মহাবাহো ফলং পুণ্যকৃতং মহৎ
62.3
দত্তং কিং ফলবদ্রাজন্নিহ লোকে পরত্র চ
ভবতঃ শ্রোতুমিচ্ছামি তন্মে বিস্তরতো বদ
62.4
ভীষ্ম উবাচ
ইমমর্থং পুরা পৃষ্টো নারদো দেবদর্শনঃ
যদুক্তবানসৌ তন্মে গদতঃ শৃণু ভারত
62.5
নারদ উবাচ
অন্নমেব প্রশংসন্তি দেবাঃ সর্ষিগণাঃ পুরা
লোকতন্ত্রং হি যজ্ঞাশ্চ সর্বমন্নে প্রতিষ্ঠিতম্
62.6
অন্নেন সদৃশং দানং ন ভূতং ন ভবিষ্যতি
তস্মাদন্নং বিশেষেণ দাতুমিচ্ছন্তি মানবাঃ
62.7
অন্নমূর্জস্করং লোকে প্রাণাশ্চান্নে প্রতিষ্ঠিতাঃ
অন্নেন ধার্যতে সর্বং বিশ্বং জগদিদং প্রভো
62.8
অন্নাদ্গৃহস্থা লোকেঽস্মিন্ভিক্ষবস্তত এব চ
অন্নাত্প্রভবতি প্রাণঃ প্রত্যক্ষং নাত্র সংশয়ঃ
62.9
কুটুম্বং পীডয়িত্বাপি ব্রাহ্মণায় মহাত্মনে
দাতব্যং ভিক্ষবে চান্নমাত্মনো ভূতিমিচ্ছতা
62.10
ব্রাহ্মণায়াভিরূপায় যো দদ্যাদন্নমর্থিনে
নিদধাতি নিধিং শ্রেষ্ঠং পারলৌকিকমাত্মনঃ
62.11
শ্রান্তমধ্বনি বর্তন্তং বৃদ্ধমর্হমুপস্থিতম্
অর্চয়েদ্ভূতিমন্বিচ্ছন্গৃহস্থো গৃহমাগতম্
62.12
ক্রোধমুত্পতিতং হিত্বা সুশীলো বীতমত্সরঃ
অন্নদঃ প্রাপ্নুতে রাজন্দিবি চেহ চ যত্সুখম্
62.13
নাবমন্যেদভিগতং ন প্রণুদ্যাত্কথংচন
অপি শ্বপাকে শুনি বা ন দানং বিপ্রণশ্যতি
62.14
যো দদ্যাদপরিক্লিষ্টমন্নমধ্বনি বর্ততে
শ্রান্তায়াদৃষ্টপূর্বায় স মহদ্ধর্মমাপ্নুয়াৎ
62.15
পিতৄন্দেবানৃষীন্বিপ্রানতিথীংশ্চ জনাধিপ
যো নরঃ প্রীণয়ত্যন্নৈস্তস্য পুণ্যফলং মহৎ
62.16
কৃত্বাপি পাপকং কর্ম যো দদ্যাদন্নমর্থিনে
ব্রাহ্মণায় বিশেষেণ ন স পাপেন যুজ্যতে
62.17
ব্রাহ্মণেষ্বক্ষয়ং দানমন্নং শূদ্রে মহাফলম্
অন্নদানং চ শূদ্রে চ ব্রাহ্মণে চ বিশিষ্যতে
62.18
ন পৃচ্ছেদ্গোত্রচরণং স্বাধ্যায়ং দেশমেব বা
ভিক্ষিতো ব্রাহ্মণেনেহ জন্ম বান্নং প্রয়াচিতঃ
62.19
অন্নদস্যান্নবৃক্ষাশ্চ সর্বকামফলান্বিতাঃ
ভবন্তীহাথ বামুত্র নৃপতে নাত্র সংশয়ঃ
62.20
আশংসন্তে হি পিতরঃ সুবৃষ্টিমিব কর্ষকাঃ
অস্মাকমপি পুত্রো বা পৌত্রো বান্নং প্রদাস্যতি
62.21
ব্রাহ্মণো হি মহদ্ভূতং স্বয়ং দেহীতি যাচতে
অকামো বা সকামো বা দত্ত্বা পুণ্যমবাপ্নুয়াৎ
62.22
ব্রাহ্মণঃ সর্বভূতানামতিথিঃ প্রসৃতাগ্রভুক্
বিপ্রা যমভিগচ্ছন্তি ভিক্ষমাণা গৃহং সদা
62.23
সত্কৃতাশ্চ নিবর্তন্তে তদতীব প্রবর্ধতে
মহাভোগে কুলে জন্ম প্রেত্য প্রাপ্নোতি ভারত
62.24
দত্ত্বা ত্বন্নং নরো লোকে তথা স্থানমনুত্তমম্
মৃষ্টমৃষ্টান্নদায়ী তু স্বর্গে বসতি সত্কৃতঃ
62.25
অন্নং প্রাণা নরাণাং হি সর্বমন্নে প্রতিষ্ঠিতম্
অন্নদঃ পশুমান্পুত্রী ধনবান্ভোগবানপি
62.26
প্রাণবাংশ্চাপি ভবতি রূপবাংশ্চ তথা নৃপ
অন্নদঃ প্রাণদো লোকে সর্বদঃ প্রোচ্যতে তু সঃ
62.27
অন্নং হি দত্ত্বাতিথয়ে ব্রাহ্মণায় যথাবিধি
প্রদাতা সুখমাপ্নোতি দেবৈশ্চাপ্যভিপূজ্যতে
62.28
ব্রাহ্মণো হি মহদ্ভূতং ক্ষেত্রং চরতি পাদবৎ
উপ্যতে তত্র যদ্বীজং তদ্ধি পুণ্যফলং মহৎ
62.29
প্রত্যক্ষং প্রীতিজননং ভোক্তৃদাত্রোর্ভবত্যুত
সর্বাণ্যন্যানি দানানি পরোক্ষফলবন্ত্যুত
62.30
অন্নাদ্ধি প্রসবং বিদ্ধি রতিমন্নাদ্ধি ভারত
ধর্মার্থাবন্নতো বিদ্ধি রোগনাশং তথান্নতঃ
62.31
অন্নং হ্যমৃতমিত্যাহ পুরাকল্পে প্রজাপতিঃ
অন্নং ভুবং দিবং খং চ সর্বমন্নে প্রতিষ্ঠিতম্
62.32
অন্নপ্রণাশে ভিদ্যন্তে শরীরে পঞ্চ ধাতবঃ
বলং বলবতোঽপীহ প্রণশ্যত্যন্নহানিতঃ
62.33
আবাহাশ্চ বিবাহাশ্চ যজ্ঞাশ্চান্নমৃতে তথা
ন বর্তন্তে নরশ্রেষ্ঠ ব্রহ্ম চাত্র প্রলীয়তে
62.34
অন্নতঃ সর্বমেতদ্ধি যত্কিংচিত্স্থাণু জঙ্গমম্
ত্রিষু লোকেষু ধর্মার্থমন্নং দেয়মতো বুধৈঃ
62.35
অন্নদস্য মনুষ্যস্য বলমোজো যশঃ সুখম্
কীর্তিশ্চ বর্ধতে শশ্বত্ত্রিষু লোকেষু পার্থিব
62.36
মেঘেষ্বম্ভঃ সংনিধত্তে প্রাণানাং পবনঃ শিবঃ
তচ্চ মেঘগতং বারি শক্রো বর্ষতি ভারত
62.37
আদত্তে চ রসং ভৌমমাদিত্যঃ স্বগভস্তিভিঃ
বায়ুরাদিত্যতস্তাংশ্চ রসান্দেবঃ প্রজাপতিঃ
62.38
তদ্যদা মেঘতো বারি পতিতং ভবতি ক্ষিতৌ
তদা বসুমতী দেবী স্নিগ্ধা ভবতি ভারত
62.39
ততঃ সস্যানি রোহন্তি যেন বর্তয়তে জগৎ
মাংসমেদোস্থিশুক্রাণাং প্রাদুর্ভাবস্ততঃ পুনঃ
62.40
সংভবন্তি ততঃ শুক্রাত্প্রাণিনঃ পৃথিবীপতে
অগ্নীষোমৌ হি তচ্ছুক্রং প্রজনঃ পুষ্যতশ্চ হ
62.41
এবমন্নং চ সূর্যশ্চ পবনঃ শুক্রমেব চ
এক এব স্মৃতো রাশির্যতো ভূতানি জজ্ঞিরে
62.42
প্রাণান্দদাতি ভূতানাং তেজশ্চ ভরতর্ষভ
গৃহমভ্যাগতায়াশু যো দদ্যাদন্নমর্থিনে
62.43
ভীষ্ম উবাচ
নারদেনৈবমুক্তোঽহমদামন্নং সদা নৃপ
অনসূয়ুস্ত্বমপ্যন্নং তস্মাদ্দেহি গতজ্বরঃ
62.44
দত্ত্বান্নং বিধিবদ্রাজন্বিপ্রেভ্যস্ত্বমপি প্রভো
যথাবদনুরূপেভ্যস্ততঃ স্বর্গমবাপ্স্যসি
62.45
অন্নদানাং হি যে লোকাস্তাংস্ত্বং শৃণু নরাধিপ
ভবনানি প্রকাশন্তে দিবি তেষাং মহাত্মনাম্
নানাসংস্থানরূপাণি নানাস্তম্ভান্বিতানি চ
62.46
চন্দ্রমণ্ডলশুভ্রাণি কিঙ্কিণীজালবন্তি চ
তরুণাদিত্যবর্ণানি স্থাবরাণি চরাণি চ
62.47
অনেকশতভৌমানি সান্তর্জলবনানি চ
বৈডূর্যার্কপ্রকাশানি রৌপ্যরুক্মময়ানি চ
62.48
সর্বকামফলাশ্চাপি বৃক্ষা ভবনসংস্থিতাঃ
বাপ্যো বীথ্যঃ সভাঃ কূপা দীর্ঘিকাশ্চৈব সর্বশঃ
62.49
ঘোষবন্তি চ যানানি যুক্তান্যথ সহস্রশঃ
ভক্ষ্যভোজ্যময়াঃ শৈলা বাসাংস্যাভরণানি চ
62.50
ক্ষীরং স্রবন্ত্যঃ সরিতস্তথা চৈবান্নপর্বতাঃ
প্রাসাদাঃ পাণ্ডুরাভ্রাভাঃ শয্যাশ্চ কনকোজ্জ্বলাঃ
তানন্নদাঃ প্রপদ্যন্তে তস্মাদন্নপ্রদো ভব
62.51
এতে লোকাঃ পুণ্যকৃতামন্নদানাং মহাত্মনাম্
তস্মাদন্নং বিশেষেণ দাতব্যং মানবৈর্ভুবি