Utshovঅধ্যায় 63
63.1
যুধিষ্ঠির উবাচ
শ্রুতং মে ভবতো বাক্যমন্নদানস্য যো বিধিঃ
নক্ষত্রয়োগস্যেদানীং দানকল্পং ব্রবীহি মে
63.2
ভীষ্ম উবাচ
অত্রাপ্যুদাহরন্তীমমিতিহাসং পুরাতনম্
দেবক্যাশ্চৈব সংবাদং দেবর্ষের্নারদস্য চ
63.3
দ্বারকামনুসংপ্রাপ্তং নারদং দেবদর্শনম্
পপ্রচ্ছৈনং ততঃ প্রশ্নং দেবকী ধর্মদর্শিনী
63.4
তস্যাঃ সংপৃচ্ছমানায়া দেবর্ষির্নারদস্তদা
আচষ্ট বিধিবত্সর্বং যত্তচ্ছৃণু বিশাং পতে
63.5
নারদ উবাচ
কৃত্তিকাসু মহাভাগে পায়সেন সসর্পিষা
সংতর্প্য ব্রাহ্মণান্সাধূঁল্লোকানাপ্নোত্যনুত্তমান্
63.6
রোহিণ্যাং প্রথিতৈর্মাংসৈর্মাষৈরন্নেন সর্পিষা
পয়োঽনুপানং দাতব্যমানৃণ্যার্থং দ্বিজাতয়ে
63.7
দোগ্ধ্রীং দত্ত্বা সবত্সাং তু নক্ষত্রে সোমদৈবতে
গচ্ছন্তি মানুষাল্লোকাত্স্বর্গলোকমনুত্তমম্
63.8
আর্দ্রায়াং কৃসরং দত্ত্বা তৈলমিশ্রমুপোষিতঃ
নরস্তরতি দুর্গাণি ক্ষুরধারাংশ্চ পর্বতান্
63.9
অপূপান্পুনর্বসৌ দত্ত্বা তথৈবান্নানি শোভনে
যশস্বী রূপসংপন্নো বহ্বন্নে জায়তে কুলে
63.10
পুষ্যে তু কনকং দত্ত্বা কৃতং চাকৃতমেব চ
অনালোকেষু লোকেষু সোমবত্স বিরাজতে
63.11
আশ্লেষায়াং তু যো রূপ্যমৃষভং বা প্রয়চ্ছতি
স সর্বভয়নির্মুক্তঃ শাত্রবানধিতিষ্ঠতি
63.12
মঘাসু তিলপূর্ণানি বর্ধমানানি মানবঃ
প্রদায় পুত্রপশুমানিহ প্রেত্য চ মোদতে
63.13
ফল্গুনীপূর্বসময়ে ব্রাহ্মণানামুপোষিতঃ
ভক্ষান্ফাণিতসংয়ুক্তান্দত্ত্বা সৌভাগ্যমৃচ্ছতি
63.14
ঘৃতক্ষীরসমায়ুক্তং বিধিবত্ষষ্টিকৌদনম্
উত্তরাবিষয়ে দত্ত্বা স্বর্গলোকে মহীয়তে
63.15
যদ্যত্প্রদীয়তে দানমুত্তরাবিষয়ে নরৈঃ
মহাফলমনন্তং চ ভবতীতি বিনিশ্চয়ঃ
63.16
হস্তে হস্তিরথং দত্ত্বা চতুর্যুক্তমুপোষিতঃ
প্রাপ্নোতি পরমাঁল্লোকান্পুণ্যকামসমন্বিতান্
63.17
চিত্রায়ামৃষভং দত্ত্বা পুণ্যান্গন্ধাংশ্চ ভারত
চরত্যপ্সরসাং লোকে রমতে নন্দনে তথা
63.18
স্বাতাবথ ধনং দত্ত্বা যদিষ্টতমমাত্মনঃ
প্রাপ্নোতি লোকান্স শুভানিহ চৈব মহদ্যশঃ
63.19
বিশাখায়ামনড্বাহং ধেনুং দত্ত্বা চ দুগ্ধদাম্
সপ্রাসঙ্গং চ শকটং সধান্যং বস্ত্রসংয়ুতম্
63.20
পিতৄন্দেবাংশ্চ প্রীণাতি প্রেত্য চানন্ত্যমশ্নুতে
ন চ দুর্গাণ্যবাপ্নোতি স্বর্গলোকং চ গচ্ছতি
63.21
দত্ত্বা যথোক্তং বিপ্রেভ্যো বৃত্তিমিষ্টাং স বিন্দতি
নরকাদীংশ্চ সংক্লেশান্নাপ্নোতীতি বিনিশ্চয়ঃ
63.22
অনুরাধাসু প্রাবারং বস্ত্রান্তরমুপোষিতঃ
দত্ত্বা যুগশতং চাপি নরঃ স্বর্গে মহীয়তে
63.23
কালশাকং তু বিপ্রেভ্যো দত্ত্বা মর্ত্যঃ সমূলকম্
জ্যেষ্ঠায়ামৃদ্ধিমিষ্টাং বৈ গতিমিষ্টাং চ বিন্দতি
63.24
মূলে মূলফলং দত্ত্বা ব্রাহ্মণেভ্যঃ সমাহিতঃ
পিতৄন্প্রীণয়তে চাপি গতিমিষ্টাং চ গচ্ছতি
63.25
অথ পূর্বাস্বষাঢাসু দধিপাত্রাণ্যুপোষিতঃ
কুলবৃত্তোপসংপন্নে ব্রাহ্মণে বেদপারগে
প্রদায় জায়তে প্রেত্য কুলে সুবহুগোকুলে
63.26
উদমন্থং সসর্পিষ্কং প্রভূতমধুফাণিতম্
দত্ত্বোত্তরাস্বষাঢাসু সর্বকামানবাপ্নুয়াৎ
63.27
দুগ্ধং ত্বভিজিতে যোগে দত্ত্বা মধুঘৃতাপ্লুতম্
ধর্মনিত্যো মনীষিভ্যঃ স্বর্গলোকে মহীয়তে
63.28
শ্রবণে কম্বলং দত্ত্বা বস্ত্রান্তরিতমেব চ
শ্বেতেন যাতি যানেন সর্বলোকানসংবৃতান্
63.29
গোপ্রয়ুক্তং ধনিষ্ঠাসু যানং দত্ত্বা সমাহিতঃ
বস্ত্ররশ্মিধরং সদ্যঃ প্রেত্য রাজ্যং প্রপদ্যতে
63.30
গন্ধাঞ্শতভিষগ্যোগে দত্ত্বা সাগুরুচন্দনান্
প্রাপ্নোত্যপ্সরসাং লোকান্প্রেত্য গন্ধাংশ্চ শাশ্বতান্
63.31
পূর্বভাদ্রপদায়োগে রাজমাষান্প্রদায় তু
সর্বভক্ষফলোপেতঃ স বৈ প্রেত্য সুখী ভবেৎ
63.32
ঔরভ্রমুত্তরায়োগে যস্তু মাংসং প্রয়চ্ছতি
স পিতৄন্প্রীণয়তি বৈ প্রেত্য চানন্ত্যমশ্নুতে
63.33
কাংস্যোপদোহনাং ধেনুং রেবত্যাং যঃ প্রয়চ্ছতি
সা প্রেত্য কামানাদায় দাতারমুপতিষ্ঠতি
63.34
রথমশ্বসমায়ুক্তং দত্ত্বাশ্বিন্যাং নরোত্তমঃ
হস্ত্যশ্বরথসংপন্নে বর্চস্বী জায়তে কুলে
63.35
ভরণীষু দ্বিজাতিভ্যস্তিলধেনুং প্রদায় বৈ
গাঃ সুপ্রভূতাঃ প্রাপ্নোতি নরঃ প্রেত্য যশস্তথা
63.36
ভীষ্ম উবাচ
ইত্যেষ লক্ষণোদ্দেশঃ প্রোক্তো নক্ষত্রয়োগতঃ
দেবক্যা নারদেনেহ সা স্নুষাভ্যোঽব্রবীদিদম্