অধ্যায় 64

64.1

ভীষ্ম উবাচ
সর্বান্কামান্প্রয়চ্ছন্তি যে প্রয়চ্ছন্তি কাঞ্চনম্
ইত্যেবং ভগবানত্রিঃ পিতামহসুতোঽব্রবীৎ

পবিত্রং শুচ্যথায়ুষ্যং পিতৄণামক্ষয়ং চ তৎ
সুবর্ণং মনুজেন্দ্রেণ হরিশ্চন্দ্রেণ কীর্তিতম্

পানীয়দানং পরমং দানানাং মনুরব্রবীৎ
তস্মাদ্বাপীশ্চ কূপাংশ্চ তডাগানি চ খানয়েৎ

অর্ধং পাপস্য হরতি পুরুষস্যেহ কর্মণঃ
কূপঃ প্রবৃত্তপানীয়ঃ সুপ্রবৃত্তশ্চ নিত্যশঃ

সর্বং তারয়তে বংশং যস্য খাতে জলাশয়ে
গাবঃ পিবন্তি বিপ্রাশ্চ সাধবশ্চ নরাঃ সদা

নিদাঘকালে পানীয়ং যস্য তিষ্ঠত্যবারিতম্
স দুর্গং বিষমং কৃচ্ছ্রং ন কদাচিদবাপ্নুতে

বৃহস্পতের্ভগবতঃ পূষ্ণশ্চৈব ভগস্য চ
অশ্বিনোশ্চৈব বহ্নেশ্চ প্রীতির্ভবতি সর্পিষা

পরমং ভেষজং হ্যেতদ্যজ্ঞানামেতদুত্তমম্
রসানামুত্তমং চৈতত্ফলানাং চৈতদুত্তমম্

ফলকামো যশস্কামঃ পুষ্টিকামশ্চ নিত্যদা
ঘৃতং দদ্যাদ্দ্বিজাতিভ্যঃ পুরুষঃ শুচিরাত্মবান্

ঘৃতং মাসে আশ্বয়ুজি বিপ্রেভ্যো যঃ প্রয়চ্ছতি
তস্মৈ প্রয়চ্ছতো রূপং প্রীতৌ দেবাবিহাশ্বিনৌ

পায়সং সর্পিষা মিশ্রং দ্বিজেভ্যো যঃ প্রয়চ্ছতি
গৃহং তস্য ন রক্ষাংসি ধর্ষয়ন্তি কদাচন

পিপাসয়া ন ম্রিয়তে সোপচ্ছন্দশ্চ দৃশ্যতে
ন প্রাপ্নুয়াচ্চ ব্যসনং করকান্যঃ প্রয়চ্ছতি

প্রয়তো ব্রাহ্মণাগ্রেভ্যঃ শ্রদ্ধয়া পরয়া যুতঃ
উপস্পর্শনষড্ভাগং লভতে পুরুষঃ সদা

যঃ সাধনার্থং কাষ্ঠানি ব্রাহ্মণেভ্যঃ প্রয়চ্ছতি
প্রতাপার্থং চ রাজেন্দ্র বৃত্তবদ্ভ্যঃ সদা নরঃ

সিধ্যন্ত্যর্থাঃ সদা তস্য কার্যাণি বিবিধানি চ
উপর্যুপরি শত্রূণাং বপুষা দীপ্যতে চ সঃ

ভগবাংশ্চাস্য সুপ্রীতো বহ্নির্ভবতি নিত্যশঃ
ন তং ত্যজন্তে পশবঃ সংগ্রামে চ জয়ত্যপি

পুত্রাঞ্ছ্রিয়ং চ লভতে যশ্ছত্রং সংপ্রয়চ্ছতি
চক্ষুর্ব্যাধিং ন লভতে যজ্ঞভাগমথাশ্নুতে

নিদাঘকালে বর্ষে বা যশ্ছত্রং সংপ্রয়চ্ছতি
নাস্য কশ্চিন্মনোদাহঃ কদাচিদপি জায়তে
কৃচ্ছ্রাত্স বিষমাচ্চৈব বিপ্র মোক্ষমবাপ্নুতে

প্রদানং সর্বদানানাং শকটস্য বিশিষ্যতে
এবমাহ মহাভাগঃ শাণ্ডিল্যো ভগবানৃষিঃ