Utshovঅধ্যায় 65
65.1
যুধিষ্ঠির উবাচ
দহ্যমানায় বিপ্রায় যঃ প্রয়চ্ছত্যুপানহৌ
যত্ফলং তস্য ভবতি তন্মে ব্রূহি পিতামহ
65.2
ভীষ্ম উবাচ
উপানহৌ প্রয়চ্ছেদ্যো ব্রাহ্মণেভ্যঃ সমাহিতঃ
মর্দতে কণ্টকান্সর্বান্বিষমান্নিস্তরত্যপি
স শত্রূণামুপরি চ সংতিষ্ঠতি যুধিষ্ঠির
65.3
যানং চাশ্বতরীয়ুক্তং তস্য শুভ্রং বিশাং পতে
উপতিষ্ঠতি কৌন্তেয় রূপ্যকাঞ্চনভূষণম্
শকটং দম্যসংয়ুক্তং দত্তং ভবতি চৈব হি
65.4
যুধিষ্ঠির উবাচ
যত্ফলং তিলদানে চ ভূমিদানে চ কীর্তিতম্
গোপ্রদানেঽন্নদানে চ ভূয়স্তদ্ব্রূহি কৌরব
65.5
ভীষ্ম উবাচ
শৃণুষ্ব মম কৌন্তেয় তিলদানস্য যত্ফলম্
নিশম্য চ যথান্যায়ং প্রয়চ্ছ কুরুসত্তম
65.6
পিতৄণাং প্রথমং ভোজ্যং তিলাঃ সৃষ্টাঃ স্বয়ংভুবা
তিলদানেন বৈ তস্মাত্পিতৃপক্ষঃ প্রমোদতে
65.7
মাঘমাসে তিলান্যস্তু ব্রাহ্মণেভ্যঃ প্রয়চ্ছতি
সর্বসত্ত্বসমাকীর্ণং নরকং স ন পশ্যতি
65.8
সর্বকামৈঃ স যজতে যস্তিলৈর্যজতে পিতৄন্
ন চাকামেন দাতব্যং তিলশ্রাদ্ধং কথংচন
65.9
মহর্ষেঃ কশ্যপস্যৈতে গাত্রেভ্যঃ প্রসৃতাস্তিলাঃ
ততো দিব্যং গতা ভাবং প্রদানেষু তিলাঃ প্রভো
65.10
পৌষ্টিকা রূপদাশ্চৈব তথা পাপবিনাশনাঃ
তস্মাত্সর্বপ্রদানেভ্যস্তিলদানং বিশিষ্যতে
65.11
আপস্তম্বশ্চ মেধাবী শঙ্খশ্চ লিখিতস্তথা
মহর্ষির্গৌতমশ্চাপি তিলদানৈর্দিবং গতাঃ
65.12
তিলহোমপরা বিপ্রাঃ সর্বে সংয়তমৈথুনাঃ
সমা গব্যেন হবিষা প্রবৃত্তিষু চ সংস্থিতাঃ
65.13
সর্বেষামেব দানানাং তিলদানং পরং স্মৃতম্
অক্ষয়ং সর্বদানানাং তিলদানমিহোচ্যতে
65.14
উত্পন্নে চ পুরা হব্যে কুশিকর্ষিঃ পরংতপ
তিলৈরগ্নিত্রয়ং হুত্বা প্রাপ্তবান্গতিমুত্তমাম্
65.15
ইতি প্রোক্তং কুরুশ্রেষ্ঠ তিলদানমনুত্তমম্
বিধানং যেন বিধিনা তিলানামিহ শস্যতে
65.16
অত ঊর্ধ্বং নিবোধেদং দেবানাং যষ্টুমিচ্ছতাম্
সমাগমং মহারাজ ব্রহ্মণা বৈ স্বয়ংভুবা
65.17
দেবাঃ সমেত্য ব্রহ্মাণং ভূমিভাগং যিয়ক্ষবঃ
শুভং দেশময়াচন্ত যজেম ইতি পার্থিব
65.18
দেবা ঊচুঃ
ভগবংস্ত্বং প্রভুর্ভূমেঃ সর্বস্য ত্রিদিবস্য চ
যজেমহি মহাভাগ যজ্ঞং ভবদনুজ্ঞয়া
নাননুজ্ঞাতভূমির্হি যজ্ঞস্য ফলমশ্নুতে
65.19
ত্বং হি সর্বস্য জগতঃ স্থাবরস্য চরস্য চ
প্রভুর্ভবসি তস্মাত্ত্বং সমনুজ্ঞাতুমর্হসি
65.20
ব্রহ্মোবাচ
দদামি মেদিনীভাগং ভবদ্ভ্যোঽহং সুরর্ষভাঃ
যস্মিন্দেশে করিষ্যধ্বং যজ্ঞং কাশ্যপনন্দনাঃ
65.21
দেবা ঊচুঃ
ভগবন্কৃতকামাঃ স্মো যক্ষ্যামস্ত্বাপ্তদক্ষিণৈঃ
ইমং তু দেশং মুনয়ঃ পর্যুপাসন্ত নিত্যদা
65.22
ভীষ্ম উবাচ
ততোঽগস্ত্যশ্চ কণ্বশ্চ ভৃগুরত্রির্বৃষাকপিঃ
অসিতো দেবলশ্চৈব দেবয়জ্ঞমুপাগমন্
65.23
ততো দেবা মহাত্মান ঈজিরে যজ্ঞমচ্যুত
তথা সমাপয়ামাসুর্যথাকালং সুরর্ষভাঃ
65.24
ত ইষ্টয়জ্ঞাস্ত্রিদশা হিমবত্যচলোত্তমে
ষষ্ঠমংশং ক্রতোস্তস্য ভূমিদানং প্রচক্রিরে
65.25
প্রাদেশমাত্রং ভূমেস্তু যো দদ্যাদনুপস্কৃতম্
ন সীদতি স কৃচ্ছ্রেষু ন চ দুর্গাণ্যবাপ্নুতে
65.26
শীতবাতাতপসহাং গৃহভূমিং সুসংস্কৃতাম্
প্রদায় সুরলোকস্থঃ পুণ্যান্তেঽপি ন চাল্যতে
65.27
মুদিতো বসতে প্রাজ্ঞঃ শক্রেণ সহ পার্থিব
প্রতিশ্রয়প্রদাতা চ সোঽপি স্বর্গে মহীয়তে
65.28
অধ্যাপককুলে জাতঃ শ্রোত্রিয়ো নিয়তেন্দ্রিয়ঃ
গৃহে যস্য বসেত্তুষ্টঃ প্রধানং লোকমশ্নুতে
65.29
তথা গবার্থে শরণং শীতবর্ষসহং মহৎ
আসপ্তমং তারয়তি কুলং ভরতসত্তম
65.30
ক্ষেত্রভূমিং দদল্লোকে পুত্র শ্রিয়মবাপ্নুয়াৎ
রত্নভূমিং প্রদত্ত্বা তু কুলবংশং বিবর্ধয়েৎ
65.31
ন চোষরাং ন নির্দগ্ধাং মহীং দদ্যাত্কথংচন
ন শ্মশানপরীতাং চ ন চ পাপনিষেবিতাম্
65.32
পারক্যে ভূমিদেশে তু পিতৄণাং নির্বপেত্তু যঃ
তদ্ভূমিস্বামিপিতৃভিঃ শ্রাদ্ধকর্ম বিহন্যতে
65.33
তস্মাত্ক্রীত্বা মহীং দদ্যাত্স্বল্পামপি বিচক্ষণঃ
পিণ্ডঃ পিতৃভ্যো দত্তো বৈ তস্যাং ভবতি শাশ্বতঃ
65.34
অটবীপর্বতাশ্চৈব নদীতীর্থানি যানি চ
সর্বাণ্যস্বামিকান্যাহুর্ন হি তত্র পরিগ্রহঃ
65.35
ইত্যেতদ্ভূমিদানস্য ফলমুক্তং বিশাং পতে
অতঃ পরং তু গোদানং কীর্তয়িষ্যামি তেঽনঘ
65.36
গাবোঽধিকাস্তপস্বিভ্যো যস্মাত্সর্বেভ্য এব চ
তস্মান্মহেশ্বরো দেবস্তপস্তাভিঃ সমাস্থিতঃ
65.37
ব্রহ্মলোকে বসন্ত্যেতাঃ সোমেন সহ ভারত
আসাং ব্রহ্মর্ষয়ঃ সিদ্ধাঃ প্রার্থয়ন্তি পরাং গতিম্
65.38
পয়সা হবিষা দধ্না শকৃতাপ্যথ চর্মণা
অস্থিভিশ্চোপকুর্বন্তি শৃঙ্গৈর্বালৈশ্চ ভারত
65.39
নাসাং শীতাতপৌ স্যাতাং সদৈতাঃ কর্ম কুর্বতে
ন বর্ষং বিষমং বাপি দুঃখমাসাং ভবত্যুত
65.40
ব্রাহ্মণৈঃ সহিতা যান্তি তস্মাত্পরতরং পদম্
একং গোব্রাহ্মণং তস্মাত্প্রবদন্তি মনীষিণঃ
65.41
রন্তিদেবস্য যজ্ঞে তাঃ পশুত্বেনোপকল্পিতাঃ
ততশ্চর্মণ্বতী রাজন্গোচর্মভ্যঃ প্রবর্তিতা
65.42
পশুত্বাচ্চ বিনির্মুক্তাঃ প্রদানায়োপকল্পিতাঃ
তা ইমা বিপ্রমুখ্যেভ্যো যো দদাতি মহীপতে
নিস্তরেদাপদং কৃচ্ছ্রাং বিষমস্থোঽপি পার্থিব
65.43
গবাং সহস্রদঃ প্রেত্য নরকং ন প্রপশ্যতি
সর্বত্র বিজয়ং চাপি লভতে মনুজাধিপ
65.44
অমৃতং বৈ গবাং ক্ষীরমিত্যাহ ত্রিদশাধিপঃ
তস্মাদ্দদাতি যো ধেনুমমৃতং স প্রয়চ্ছতি
65.45
অগ্নীনামব্যয়ং হ্যেতদ্ধৌম্যং বেদবিদো বিদুঃ
তস্মাদ্দদাতি যো ধেনুং স হৌম্যং সংপ্রয়চ্ছতি
65.46
স্বর্গো বৈ মূর্তিমানেষ বৃষভং যো গবাং পতিম্
বিপ্রে গুণয়ুতে দদ্যাত্স বৈ স্বর্গে মহীয়তে
65.47
প্রাণা বৈ প্রাণিনামেতে প্রোচ্যন্তে ভরতর্ষভ
তস্মাদ্দদাতি যো ধেনুং প্রাণান্বৈ স প্রয়চ্ছতি
65.48
গাবঃ শরণ্যা ভূতানামিতি বেদবিদো বিদুঃ
তস্মাদ্দদাতি যো ধেনুং শরণং সংপ্রয়চ্ছতি
65.49
ন বধার্থং প্রদাতব্যা ন কীনাশে ন নাস্তিকে
গোজীবিনে ন দাতব্যা তথা গৌঃ পুরুষর্ষভ
65.50
দদাতি তাদৃশানাং বৈ নরো গাঃ পাপকর্মণাম্
অক্ষয়ং নরকং যাতীত্যেবমাহুর্মনীষিণঃ
65.51
ন কৃশাং পাপবত্সাং বা বন্ধ্যাং রোগান্বিতাং তথা
ন ব্যঙ্গাং ন পরিশ্রান্তাং দদ্যাদ্গাং ব্রাহ্মণায় বৈ
65.52
দশগোসহস্রদঃ সম্যক্শক্রেণ সহ মোদতে
অক্ষয়াঁল্লভতে লোকান্নরঃ শতসহস্রদঃ
65.53
ইত্যেতদ্গোপ্রদানং চ তিলদানং চ কীর্তিতম্
তথা ভূমিপ্রদানং চ শৃণুষ্বান্নে চ ভারত
65.54
অন্নদানং প্রধানং হি কৌন্তেয় পরিচক্ষতে
অন্নস্য হি প্রদানেন রন্তিদেবো দিবং গতঃ
65.55
শ্রান্তায় ক্ষুধিতায়ান্নং যঃ প্রয়চ্ছতি ভূমিপ
স্বায়ংভুবং মহাভাগং স পশ্যতি নরাধিপ
65.56
ন হিরণ্যৈর্ন বাসোভির্নাশ্বদানেন ভারত
প্রাপ্নুবন্তি নরাঃ শ্রেয়ো যথেহান্নপ্রদাঃ প্রভো
65.57
অন্নং বৈ পরমং দ্রব্যমন্নং শ্রীশ্চ পরা মতা
অন্নাত্প্রাণঃ প্রভবতি তেজো বীর্যং বলং তথা
65.58
সদ্ভ্যো দদাতি যশ্চান্নং সদৈকাগ্রমনা নরঃ
ন স দুর্গাণ্যবাপ্নোতীত্যেবমাহ পরাশরঃ
65.59
অর্চয়িত্বা যথান্যায়ং দেবেভ্যোঽন্নং নিবেদয়েৎ
যদন্নো হি নরো রাজংস্তদন্নাস্তস্য দেবতাঃ
65.60
কৌমুদ্যাং শুক্লপক্ষে তু যোঽন্নদানং করোত্যুত
স সংতরতি দুর্গাণি প্রেত্য চানন্ত্যমশ্নুতে
65.61
অভুক্ত্বাতিথয়ে চান্নং প্রয়চ্ছেদ্যঃ সমাহিতঃ
স বৈ ব্রহ্মবিদাং লোকান্প্রাপ্নুয়াদ্ভরতর্ষভ
65.62
সুকৃচ্ছ্রামাপদং প্রাপ্তশ্চান্নদঃ পুরুষস্তরেৎ
পাপং তরতি চৈবেহ দুষ্কৃতং চাপকর্ষতি
65.63
ইত্যেতদন্নদানস্য তিলদানস্য চৈব হ
ভূমিদানস্য চ ফলং গোদানস্য চ কীর্তিতম্