অধ্যায় 66

66.1

যুধিষ্ঠির উবাচ
শ্রুতং দানফলং তাত যত্ত্বয়া পরিকীর্তিতম্
অন্নং তু তে বিশেষেণ প্রশস্তমিহ ভারত

পানীয়দানং পরমং কথং চেহ মহাফলম্
ইত্যেতচ্ছ্রোতুমিচ্ছামি বিস্তরেণ পিতামহ

ভীষ্ম উবাচ
হন্ত তে বর্তয়িষ্যামি যথাবদ্ভরতর্ষভ
গদতস্তন্মমাদ্যেহ শৃণু সত্যপরাক্রম
পানীয়দানাত্প্রভৃতি সর্বং বক্ষ্যামি তেঽনঘ

যদন্নং যচ্চ পানীয়ং সংপ্রদায়াশ্নুতে নরঃ
ন তস্মাত্পরমং দানং কিংচিদস্তীতি মে মতিঃ

অন্নাত্প্রাণভৃতস্তাত প্রবর্তন্তে হি সর্বশঃ
তস্মাদন্নং পরং লোকে সর্বদানেষু কথ্যতে

অন্নাদ্বলং চ তেজশ্চ প্রাণিনাং বর্ধতে সদা
অন্নদানমতস্তস্মাচ্ছ্রেষ্ঠমাহ প্রজাপতিঃ

সাবিত্র্যা হ্যপি কৌন্তেয় শ্রুতং তে বচনং শুভম্
যতশ্চৈতদ্যথা চৈতদ্দেবসত্রে মহামতে

অন্নে দত্তে নরেণেহ প্রাণা দত্তা ভবন্ত্যুত
প্রাণদানাদ্ধি পরমং ন দানমিহ বিদ্যতে

শ্রুতং হি তে মহাবাহো লোমশস্যাপি তদ্বচঃ
প্রাণান্দত্ত্বা কপোতায় যত্প্রাপ্তং শিবিনা পুরা

তাং গতিং লভতে দত্ত্বা দ্বিজস্যান্নং বিশাং পতে
গতিং বিশিষ্টাং গচ্ছন্তি প্রাণদা ইতি নঃ শ্রুতম্

অন্নং চাপি প্রভবতি পানীয়াত্কুরুসত্তম
নীরজাতেন হি বিনা ন কিংচিত্সংপ্রবর্ততে

নীরজাতশ্চ ভগবান্সোমো গ্রহগণেশ্বরঃ
অমৃতং চ সুধা চৈব স্বাহা চৈব বষট্তথা

অন্নৌষধ্যো মহারাজ বীরুধশ্চ জলোদ্ভবাঃ
যতঃ প্রাণভৃতাং প্রাণাঃ সংভবন্তি বিশাং পতে

দেবানামমৃতং চান্নং নাগানাং চ সুধা তথা
পিতৄণাং চ স্বধা প্রোক্তা পশূনাং চাপি বীরুধঃ

অন্নমেব মনুষ্যাণাং প্রাণানাহুর্মনীষিণঃ
তচ্চ সর্বং নরব্যাঘ্র পানীয়াত্সংপ্রবর্ততে

তস্মাত্পানীয়দানাদ্বৈ ন পরং বিদ্যতে ক্বচিৎ
তচ্চ দদ্যান্নরো নিত্যং য ইচ্ছেদ্ভূতিমাত্মনঃ

ধন্যং যশস্যমায়ুষ্যং জলদানং বিশাং পতে
শত্রূংশ্চাপ্যধি কৌন্তেয় সদা তিষ্ঠতি তোয়দঃ

সর্বকামানবাপ্নোতি কীর্তিং চৈবেহ শাশ্বতীম্
প্রেত্য চানন্ত্যমাপ্নোতি পাপেভ্যশ্চ প্রমুচ্যতে

তোয়দো মনুজব্যাঘ্র স্বর্গং গত্বা মহাদ্যুতে
অক্ষয়ান্সমবাপ্নোতি লোকানিত্যব্রবীন্মনুঃ