Utshovঅধ্যায় 67
67.1
যুধিষ্ঠির উবাচ
তিলানাং কীদৃশং দানমথ দীপস্য চৈব হ
অন্নানাং বাসসাং চৈব ভূয় এব ব্রবীহি মে
67.2
ভীষ্ম উবাচ
অত্রাপ্যুদাহরন্তীমমিতিহাসং পুরাতনম্
ব্রাহ্মণস্য চ সংবাদং যমস্য চ যুধিষ্ঠির
67.3
মধ্যদেশে মহান্গ্রামো ব্রাহ্মণানাং বভূব হ
গঙ্গায়মুনয়োর্মধ্যে যামুনস্য গিরেরধঃ
67.4
পর্ণশালেতি বিখ্যাতো রমণীয়ো নরাধিপ
বিদ্বাংসস্তত্র ভূয়িষ্ঠা ব্রাহ্মণাশ্চাবসংস্তদা
67.5
অথ প্রাহ যমঃ কংচিত্পুরুষং কৃষ্ণবাসসম্
রক্তাক্ষমূর্ধ্বরোমাণং কাকজঙ্ঘাক্ষিনাসিকম্
67.6
গচ্ছ ত্বং ব্রাহ্মণগ্রামং ততো গত্বা তমানয়
অগস্ত্যং গোত্রতশ্চাপি নামতশ্চাপি শর্মিণম্
67.7
শমে নিবিষ্টং বিদ্বাংসমধ্যাপকমনাদৃতম্
মা চান্যমানয়েথাস্ত্বং সগোত্রং তস্য পার্শ্বতঃ
67.8
স হি তাদৃগ্গুণস্তেন তুল্যোঽধ্যয়নজন্মনা
অপত্যেষু তথা বৃত্তে সমস্তেনৈব ধীমতা
তমানয় যথোদ্দিষ্টং পূজা কার্যা হি তস্য মে
67.9
স গত্বা প্রতিকূলং তচ্চকার যমশাসনম্
তমাক্রম্যানয়ামাস প্রতিষিদ্ধো যমেন যঃ
67.10
তস্মৈ যমঃ সমুত্থায় পূজাং কৃত্বা চ বীর্যবান্
প্রোবাচ নীয়তামেষ সোঽন্য আনীয়তামিতি
67.11
এবমুক্তে তু বচনে ধর্মরাজেন স দ্বিজঃ
উবাচ ধর্মরাজানং নির্বিণ্ণোঽধ্যয়নেন বৈ
যো মে কালো ভবেচ্ছেষস্তং বসেয়মিহাচ্যুত
67.12
যম উবাচ
নাহং কালস্য বিহিতং প্রাপ্নোমীহ কথংচন
যো হি ধর্মং চরতি বৈ তং তু জানামি কেবলম্
67.13
গচ্ছ বিপ্র ত্বমদ্যৈব আলয়ং স্বং মহাদ্যুতে
ব্রূহি বা ত্বং যথা স্বৈরং করবাণি কিমিত্যুত
67.14
ব্রাহ্মণ উবাচ
যত্তত্র কৃত্বা সুমহত্পুণ্যং স্যাত্তদ্ব্রবীহি মে
সর্বস্য হি প্রমাণং ত্বং ত্রৈলোক্যস্যাপি সত্তম
67.15
যম উবাচ
শৃণু তত্ত্বেন বিপ্রর্ষে প্রদানবিধিমুত্তমম্
তিলাঃ পরমকং দানং পুণ্যং চৈবেহ শাশ্বতম্
67.16
তিলাশ্চ সংপ্রদাতব্যা যথাশক্তি দ্বিজর্ষভ
নিত্যদানাত্সর্বকামাংস্তিলা নির্বর্তয়ন্ত্যুত
67.17
তিলাঞ্শ্রাদ্ধে প্রশংসন্তি দানমেতদ্ধ্যনুত্তমম্
তান্প্রয়চ্ছস্ব বিপ্রেভ্যো বিধিদৃষ্টেন কর্মণা
67.18
তিলা ভক্ষয়িতব্যাশ্চ সদা ত্বালভনং চ তৈঃ
কার্যং সততমিচ্ছদ্ভিঃ শ্রেয়ঃ সর্বাত্মনা গৃহে
67.19
তথাপঃ সর্বদা দেয়াঃ পেয়াশ্চৈব ন সংশয়ঃ
পুষ্করিণ্যস্তডাগানি কূপাংশ্চৈবাত্র খানয়েৎ
67.20
এতত্সুদুর্লভতরমিহ লোকে দ্বিজোত্তম
আপো নিত্যং প্রদেয়াস্তে পুণ্যং হ্যেতদনুত্তমম্
67.21
প্রপাশ্চ কার্যাঃ পানার্থং নিত্যং তে দ্বিজসত্তম
ভুক্তেঽপ্যথ প্রদেয়ং তে পানীয়ং বৈ বিশেষতঃ
67.22
ইত্যুক্তে স তদা তেন যমদূতেন বৈ গৃহান্
নীতশ্চকার চ তথা সর্বং তদ্যমশাসনম্
67.23
নীত্বা তং যমদূতোঽপি গৃহীত্বা শর্মিণং তদা
যয়ৌ স ধর্মরাজায় ন্যবেদয়ত চাপি তম্
67.24
তং ধর্মরাজো ধর্মজ্ঞং পূজয়িত্বা প্রতাপবান্
কৃত্বা চ সংবিদং তেন বিসসর্জ যথাগতম্
67.25
তস্যাপি চ যমঃ সর্বমুপদেশং চকার হ
প্রত্যেত্য চ স তত্সর্বং চকারোক্তং যমেন তৎ
67.26
তথা প্রশংসতে দীপান্যমঃ পিতৃহিতেপ্সয়া
তস্মাদ্দীপপ্রদো নিত্যং সংতারয়তি বৈ পিতৄন্
67.27
দাতব্যাঃ সততং দীপাস্তস্মাদ্ভরতসত্তম
দেবানাং চ পিতৄণাং চ চক্ষুষ্যাস্তে মতাঃ প্রভো
67.28
রত্নদানং চ সুমহত্পুণ্যমুক্তং জনাধিপ
তানি বিক্রীয় যজতে ব্রাহ্মণো হ্যভয়ংকরঃ
67.29
যদ্বৈ দদাতি বিপ্রেভ্যো ব্রাহ্মণঃ প্রতিগৃহ্য বৈ
উভয়োঃ স্যাত্তদক্ষয্যং দাতুরাদাতুরেব চ
67.30
যো দদাতি স্থিতঃ স্থিত্যাং তাদৃশায় প্রতিগ্রহম্
উভয়োরক্ষয়ং ধর্মং তং মনুঃ প্রাহ ধর্মবিৎ
67.31
বাসসাং তু প্রদানেন স্বদারনিরতো নরঃ
সুবস্ত্রশ্চ সুবেষশ্চ ভবতীত্যনুশুশ্রুম
67.32
গাবঃ সুবর্ণং চ তথা তিলাশ্চৈবানুবর্ণিতাঃ
বহুশঃ পুরুষব্যাঘ্র বেদপ্রামাণ্যদর্শনাৎ
67.33
বিবাহাংশ্চৈব কুর্বীত পুত্রানুত্পাদয়েত চ
পুত্রলাভো হি কৌরব্য সর্বলাভাদ্বিশিষ্যতে