অধ্যায় 68

68.1

যুধিষ্ঠির উবাচ
ভূয় এব কুরুশ্রেষ্ঠ দানানাং বিধিমুত্তমম্
কথয়স্ব মহাপ্রাজ্ঞ ভূমিদানং বিশেষতঃ

পৃথিবীং ক্ষত্রিয়ো দদ্যাদ্ব্রাহ্মণস্তাং স্বকর্মণা
বিধিবত্প্রতিগৃহ্ণীয়ান্ন ত্বন্যো দাতুমর্হতি

সর্ববর্ণৈস্তু যচ্ছক্যং প্রদাতুং ফলকাঙ্ক্ষিভিঃ
বেদে বা যত্সমাম্নাতং তন্মে ব্যাখ্যাতুমর্হসি

ভীষ্ম উবাচ
তুল্যনামানি দেয়ানি ত্রীণি তুল্যফলানি চ
সর্বকামফলানীহ গাবঃ পৃথ্বী সরস্বতী

যো ব্রূয়াচ্চাপি শিষ্যায় ধর্ম্যাং ব্রাহ্মীং সরস্বতীম্
পৃথিবীগোপ্রদানাভ্যাং স তুল্যং ফলমশ্নুতে

তথৈব গাঃ প্রশংসন্তি ন চ দেয়ং ততঃ পরম্
সংনিকৃষ্টফলাস্তা হি লঘ্বর্থাশ্চ যুধিষ্ঠির
মাতরঃ সর্বভূতানাং গাবঃ সর্বসুখপ্রদাঃ

বৃদ্ধিমাকাঙ্ক্ষতা নিত্যং গাবঃ কার্যাঃ প্রদক্ষিণাঃ
মঙ্গলায়তনং দেব্যস্তস্মাত্পূজ্যাঃ সদৈব হি

প্রচোদনং দেবকৃতং গবাং কর্মসু বর্ততাম্
পূর্বমেবাক্ষরং নান্যদভিধেয়ং কথংচন

প্রচারে বা নিপানে বা বুধো নোদ্বেজয়েত গাঃ
তৃষিতা হ্যভিবীক্ষন্ত্যো নরং হন্যুঃ সবান্ধবম্

পিতৃসদ্মানি সততং দেবতায়তনানি চ
পূয়ন্তে শকৃতা যাসাং পূতং কিমধিকং ততঃ

গ্রাসমুষ্টিং পরগবে দদ্যাত্সংবত্সরং তু যঃ
অকৃত্বা স্বয়মাহারং ব্রতং তত্সার্বকামিকম্

স হি পুত্রান্যশোর্থং চ শ্রিয়ং চাপ্যধিগচ্ছতি
নাশয়ত্যশুভং চৈব দুঃস্বপ্নং চ ব্যপোহতি

যুধিষ্ঠির উবাচ
দেয়াঃ কিংলক্ষণা গাবঃ কাশ্চাপি পরিবর্জয়েৎ
কীদৃশায় প্রদাতব্যা ন দেয়াঃ কীদৃশায় চ

ভীষ্ম উবাচ
অসদ্বৃত্তায় পাপায় লুব্ধায়ানৃতবাদিনে
হব্যকব্যব্যপেতায় ন দেয়া গৌঃ কথংচন

ভিক্ষবে বহুপুত্রায় শ্রোত্রিয়ায়াহিতাগ্নয়ে
দত্ত্বা দশগবাং দাতা লোকানাপ্নোত্যনুত্তমান্

যং চৈব ধর্মং কুরুতে তস্য পুণ্যফলং চ যৎ
সর্বস্যৈবাংশভাগ্দাতা তন্নিমিত্তং প্রবৃত্তয়ঃ

যশ্চৈনমুত্পাদয়তি যশ্চৈনং ত্রায়তে ভয়াৎ
যশ্চাস্য কুরুতে বৃত্তিং সর্বে তে পিতরস্ত্রয়ঃ

কল্মষং গুরুশুশ্রূষা হন্তি মানো মহদ্যশঃ
অপুত্রতাং ত্রয়ঃ পুত্রা অবৃত্তিং দশ ধেনবঃ

বেদান্তনিষ্ঠস্য বহুশ্রুতস্য; প্রজ্ঞানতৃপ্তস্য জিতেন্দ্রিয়স্য
শিষ্টস্য দান্তস্য যতস্য চৈব; ভূতেষু নিত্যং প্রিয়বাদিনশ্চ

যঃ ক্ষুদ্ভয়াদ্বৈ ন বিকর্ম কুর্যা;ন্মৃদুর্দান্তশ্চাতিথেয়শ্চ নিত্যম্
বৃত্তিং বিপ্রায়াতিসৃজেত তস্মৈ; যস্তুল্যশীলশ্চ সপুত্রদারঃ

শুভে পাত্রে যে গুণা গোপ্রদানে; তাবান্দোষো ব্রাহ্মণস্বাপহারে
সর্বাবস্থং ব্রাহ্মণস্বাপহারো; দারাশ্চৈষাং দূরতো বর্জনীয়াঃ