Utshovঅধ্যায় 69
69.1
ভীষ্ম উবাচ
অত্রৈব কীর্ত্যতে সদ্ভির্ব্রাহ্মণস্বাভিমর্শনে
নৃগেণ সুমহত্কৃচ্ছ্রং যদবাপ্তং কুরূদ্বহ
69.2
নিবিশন্ত্যাং পুরা পার্থ দ্বারবত্যামিতি শ্রুতিঃ
অদৃশ্যত মহাকূপস্তৃণবীরুত্সমাবৃতঃ
69.3
প্রয়ত্নং তত্র কুর্বাণাস্তস্মাত্কূপাজ্জলার্থিনঃ
শ্রমেণ মহতা যুক্তাস্তস্মিংস্তোয়ে সুসংবৃতে
69.4
দদৃশুস্তে মহাকায়ং কৃকলাসমবস্থিতম্
তস্য চোদ্ধরণে যত্নমকুর্বংস্তে সহস্রশঃ
69.5
প্রগ্রহৈশ্চর্মপট্টৈশ্চ তং বদ্ধ্বা পর্বতোপমম্
নাশক্নুবন্সমুদ্ধর্তুং ততো জগ্মুর্জনার্দনম্
69.6
খমাবৃত্যোদপানস্য কৃকলাসঃ স্থিতো মহান্
তস্য নাস্তি সমুদ্ধর্তেত্যথ কৃষ্ণে ন্যবেদয়ন্
69.7
স বাসুদেবেন সমুদ্ধৃতশ্চ; পৃষ্টশ্চ কামান্নিজগাদ রাজা
নৃগস্তদাত্মানমথো ন্যবেদয়;ত্পুরাতনং যজ্ঞসহস্রয়াজিনম্
69.8
তথা ব্রুবাণং তু তমাহ মাধবঃ; শুভং ত্বয়া কর্ম কৃতং ন পাপকম্
কথং ভবান্দুর্গতিমীদৃশীং গতো; নরেন্দ্র তদ্ব্রূহি কিমেতদীদৃশম্
69.9
শতং সহস্রাণি শতং গবাং পুনঃ; পুনঃ শতান্যষ্ট শতায়ুতানি
ত্বয়া পুরা দত্তমিতীহ শুশ্রুম; নৃপ দ্বিজেভ্যঃ ক্ব নু তদ্গতং তব
69.10
নৃগস্ততোঽব্রবীত্কৃষ্ণং ব্রাহ্মণস্যাগ্নিহোত্রিণঃ
প্রোষিতস্য পরিভ্রষ্টা গৌরেকা মম গোধনে
69.11
গবাং সহস্রে সংখ্যাতা তদা সা পশুপৈর্মম
সা ব্রাহ্মণায় মে দত্তা প্রেত্যার্থমভিকাঙ্ক্ষতা
69.12
অপশ্যত্পরিমার্গংশ্চ তাং যাং পরগৃহে দ্বিজঃ
মমেয়মিতি চোবাচ ব্রাহ্মণো যস্য সাভবৎ
69.13
তাবুভৌ সমনুপ্রাপ্তৌ বিবদন্তৌ ভৃশজ্বরৌ
ভবান্দাতা ভবান্হর্তেত্যথ তৌ মাং তদোচতুঃ
69.14
শতেন শতসংখ্যেন গবাং বিনিময়েন বৈ
যাচে প্রতিগ্রহীতারং স তু মামব্রবীদিদম্
69.15
দেশকালোপসংপন্না দোগ্ধ্রী ক্ষান্তাতিবত্সলা
স্বাদুক্ষীরপ্রদা ধন্যা মম নিত্যং নিবেশনে
69.16
কৃশং চ ভরতে যা গৌর্মম পুত্রমপস্তনম্
ন সা শক্যা ময়া হাতুমিত্যুক্ত্বা স জগাম হ
69.17
ততস্তমপরং বিপ্রং যাচে বিনিময়েন বৈ
গবাং শতসহস্রং বৈ তত্কৃতে গৃহ্যতামিতি
69.18
ব্রাহ্মণ উবাচ
ন রাজ্ঞাং প্রতিগৃহ্ণামি শক্তোঽহং স্বস্য মার্গণে
সৈব গৌর্দীয়তাং শীঘ্রং মমেতি মধুসূদন
69.19
রুক্মমশ্বাংশ্চ দদতো রজতং স্যন্দনাংস্তথা
ন জগ্রাহ যয়ৌ চাপি তদা স ব্রাহ্মণর্ষভঃ
69.20
এতস্মিন্নেব কালে তু চোদিতঃ কালধর্মণা
পিতৃলোকমহং প্রাপ্য ধর্মরাজমুপাগমম্
69.21
যমস্তু পূজয়িত্বা মাং ততো বচনমব্রবীৎ
নান্তঃ সংখ্যায়তে রাজংস্তব পুণ্যস্য কর্মণঃ
69.22
অস্তি চৈব কৃতং পাপমজ্ঞানাত্তদপি ত্বয়া
চরস্ব পাপং পশ্চাদ্বা পূর্বং বা ত্বং যথেচ্ছসি
69.23
রক্ষিতাস্মীতি চোক্তং তে প্রতিজ্ঞা চানৃতা তব
ব্রাহ্মণস্বস্য চাদানং ত্রিবিধস্তে ব্যতিক্রমঃ
69.24
পূর্বং কৃচ্ছ্রং চরিষ্যেঽহং পশ্চাচ্ছুভমিতি প্রভো
ধর্মরাজং ব্রুবন্নেবং পতিতোঽস্মি মহীতলে
69.25
অশ্রৌষং প্রচ্যুতশ্চাহং যমস্যোচ্চৈঃ প্রভাষতঃ
বাসুদেবঃ সমুদ্ধর্তা ভবিতা তে জনার্দনঃ
69.26
পূর্ণে বর্ষসহস্রান্তে ক্ষীণে কর্মণি দুষ্কৃতে
প্রাপ্স্যসে শাশ্বতাঁল্লোকাঞ্জিতান্স্বেনৈব কর্মণা
69.27
কূপেঽঽত্মানমধঃশীর্ষমপশ্যং পতিতং চ হ
তির্যগ্যোনিমনুপ্রাপ্তং ন তু মামজহাত্স্মৃতিঃ
69.28
ত্বয়া তু তারিতোঽস্ম্যদ্য কিমন্যত্র তপোবলাৎ
অনুজানীহি মাং কৃষ্ণ গচ্ছেয়ং দিবমদ্য বৈ
69.29
অনুজ্ঞাতঃ স কৃষ্ণেন নমস্কৃত্য জনার্দনম্
বিমানং দিব্যমাস্থায় যয়ৌ দিবমরিংদম
69.30
ততস্তস্মিন্দিবং প্রাপ্তে নৃগে ভরতসত্তম
বাসুদেব ইমং শ্লোকং জগাদ কুরুনন্দন
69.31
ব্রাহ্মণস্বং ন হর্তব্যং পুরুষেণ বিজানতা
ব্রাহ্মণস্বং হৃতং হন্তি নৃগং ব্রাহ্মণগৌরিব
69.32
সতাং সমাগমঃ সদ্ভির্নাফলঃ পার্থ বিদ্যতে
বিমুক্তং নরকাত্পশ্য নৃগং সাধুসমাগমাৎ
69.33
প্রদানং ফলবত্তত্র দ্রোহস্তত্র তথাফলঃ
অপচারং গবাং তস্মাদ্বর্জয়েত যুধিষ্ঠির