Utshovঅধ্যায় 70
70.1
যুধিষ্ঠির উবাচ
দত্তানাং ফলসংপ্রাপ্তিং গবাং প্রব্রূহি মেঽনঘ
বিস্তরেণ মহাবাহো ন হি তৃপ্যামি কথ্যতাম্
70.2
ভীষ্ম উবাচ
অত্রাপ্যুদাহরন্তীমমিতিহাসং পুরাতনম্
ঋষেরুদ্দালকের্বাক্যং নাচিকেতস্য চোভয়োঃ
70.3
ঋষিরুদ্দালকির্দীক্ষামুপগম্য ততঃ সুতম্
ত্বং মামুপচরস্বেতি নাচিকেতমভাষত
সমাপ্তে নিয়মে তস্মিন্মহর্ষিঃ পুত্রমব্রবীৎ
70.4
উপস্পর্শনসক্তস্য স্বাধ্যায়নিরতস্য চ
ইধ্মা দর্ভাঃ সুমনসঃ কলশশ্চাভিতো জলম্
বিস্মৃতং মে তদাদায় নদীতীরাদিহাব্রজ
70.5
গত্বানবাপ্য তত্সর্বং নদীবেগসমাপ্লুতম্
ন পশ্যামি তদিত্যেবং পিতরং সোঽব্রবীন্মুনিঃ
70.6
ক্ষুত্পিপাসাশ্রমাবিষ্টো মুনিরুদ্দালকিস্তদা
যমং পশ্যেতি তং পুত্রমশপত্স মহাতপাঃ
70.7
তথা স পিত্রাভিহতো বাগ্বজ্রেণ কৃতাঞ্জলিঃ
প্রসীদেতি ব্রুবন্নেব গতসত্ত্বোঽপতদ্ভুবি
70.8
নাচিকেতং পিতা দৃষ্ট্বা পতিতং দুঃখমূর্ছিতঃ
কিং ময়া কৃতমিত্যুক্ত্বা নিপপাত মহীতলে
70.9
তস্য দুঃখপরীতস্য স্বং পুত্রমুপগূহতঃ
ব্যতীতং তদহঃশেষং সা চোগ্রা তত্র শর্বরী
70.10
পিত্র্যেণাশ্রুপ্রপাতেন নাচিকেতঃ কুরূদ্বহ
প্রাস্পন্দচ্ছয়নে কৌশ্যে বৃষ্ট্যা সস্যমিবাপ্লুতম্
70.11
স পর্যপৃচ্ছত্তং পুত্রং শ্লাঘ্যং প্রত্যাগতং পুনঃ
দিব্যৈর্গন্ধৈঃ সমাদিগ্ধং ক্ষীণস্বপ্নমিবোত্থিতম্
70.12
অপি পুত্র জিতা লোকাঃ শুভাস্তে স্বেন কর্মণা
দিষ্ট্যা চাসি পুনঃ প্রাপ্তো ন হি তে মানুষং বপুঃ
70.13
প্রত্যক্ষদর্শী সর্বস্য পিত্রা পৃষ্টো মহাত্মনা
অন্বর্থং তং পিতুর্মধ্যে মহর্ষীণাং ন্যবেদয়ৎ
70.14
কুর্বন্ভবচ্ছাসনমাশু যাতো; হ্যহং বিশালাং রুচিরপ্রভাবাম্
বৈবস্বতীং প্রাপ্য সভামপশ্যং; সহস্রশো যোজনহৈমভৌমাম্
70.15
দৃষ্ট্বৈব মামভিমুখমাপতন্তং; গৃহং নিবেদ্যাসনমাদিদেশ
বৈবস্বতোঽর্ঘ্যাদিভিরর্হণৈশ্চ; ভবত্কৃতে পূজয়ামাস মাং সঃ
70.16
ততস্ত্বহং তং শনকৈরবোচং; বৃতং সদস্যৈরভিপূজ্যমানম্
প্রাপ্তোঽস্মি তে বিষয়ং ধর্মরাজ; লোকানর্হে যান্স্ম তান্মে বিধত্স্ব
70.17
যমোঽব্রবীন্মাং ন মৃতোঽসি সৌম্য; যমং পশ্যেত্যাহ তু ত্বাং তপস্বী
পিতা প্রদীপ্তাগ্নিসমানতেজা; ন তচ্ছক্যমনৃতং বিপ্র কর্তুম্
70.18
দৃষ্টস্তেঽহং প্রতিগচ্ছস্ব তাত; শোচত্যসৌ তব দেহস্য কর্তা
দদামি কিং চাপি মনঃপ্রণীতং; প্রিয়াতিথে তব কামান্বৃণীষ্ব
70.19
তেনৈবমুক্তস্তমহং প্রত্যবোচং; প্রাপ্তোঽস্মি তে বিষয়ং দুর্নিবর্ত্যম্
ইচ্ছাম্যহং পুণ্যকৃতাং সমৃদ্ধাঁ;ল্লোকান্দ্রষ্টুং যদি তেঽহং বরার্হঃ
70.20
যানং সমারোপ্য তু মাং স দেবো; বাহৈর্যুক্তং সুপ্রভং ভানুমন্তম্
সংদর্শয়ামাস তদা স্ম লোকা;ন্সর্বাংস্তদা পুণ্যকৃতাং দ্বিজেন্দ্র
70.21
অপশ্যং তত্র বেশ্মানি তৈজসানি কৃতাত্মনাম্
নানাসংস্থানরূপাণি সর্বরত্নময়ানি চ
70.22
চন্দ্রমণ্ডলশুভ্রাণি কিঙ্কিণীজালবন্তি চ
অনেকশতভৌমানি সান্তর্জলবনানি চ
70.23
বৈডূর্যার্কপ্রকাশানি রূপ্যরুক্মময়ানি চ
তরুণাদিত্যবর্ণানি স্থাবরাণি চরাণি চ
70.24
ভক্ষ্যভোজ্যময়াঞ্শৈলান্বাসাংসি শয়নানি চ
সর্বকামফলাংশ্চৈব বৃক্ষান্ভবনসংস্থিতান্
70.25
নদ্যো বীথ্যঃ সভা বাপী দীর্ঘিকাশ্চৈব সর্বশঃ
ঘোষবন্তি চ যানানি যুক্তান্যেব সহস্রশঃ
70.26
ক্ষীরস্রবা বৈ সরিতো গিরীংশ্চ; সর্পিস্তথা বিমলং চাপি তোয়ম্
বৈবস্বতস্যানুমতাংশ্চ দেশা;নদৃষ্টপূর্বান্সুবহূনপশ্যম্
70.27
সর্বং দৃষ্ট্বা তদহং ধর্মরাজ;মবোচং বৈ প্রভবিষ্ণুং পুরাণম্
ক্ষীরস্যৈতাঃ সর্পিষশ্চৈব নদ্যঃ; শশ্বত্স্রোতাঃ কস্য ভোজ্যাঃ প্রদিষ্টাঃ
70.28
যমোঽব্রবীদ্বিদ্ধি ভোজ্যাস্ত্বমেতা; যে দাতারঃ সাধবো গোরসানাম্
অন্যে লোকাঃ শাশ্বতা বীতশোকাঃ; সমাকীর্ণা গোপ্রদানে রতানাম্
70.29
ন ত্বেবাসাং দানমাত্রং প্রশস্তং; পাত্রং কালো গোবিশেষো বিধিশ্চ
জ্ঞাত্বা দেয়া বিপ্র গবান্তরং হি; দুঃখং জ্ঞাতুং পাবকাদিত্যভূতম্
70.30
স্বাধ্যায়াঢ্যো যোঽতিমাত্রং তপস্বী; বৈতানস্থো ব্রাহ্মণঃ পাত্রমাসাম্
কৃচ্ছ্রোত্সৃষ্টাঃ পোষণাভ্যাগতাশ্চ; দ্বারৈরেতৈর্গোবিশেষাঃ প্রশস্তাঃ
70.31
তিস্রো রাত্রীরদ্ভিরুপোষ্য ভূমৌ; তৃপ্তা গাবস্তর্পিতেভ্যঃ প্রদেয়াঃ
বত্সৈঃ প্রীতাঃ সুপ্রজাঃ সোপচারা;স্ত্র্যহং দত্ত্বা গোরসৈর্বর্তিতব্যম্
70.32
দত্ত্বা ধেনুং সুব্রতাং কাংস্যদোহাং; কল্যাণবত্সামপলায়িনীং চ
যাবন্তি লোমানি ভবন্তি তস্যা;স্তাবদ্বর্ষাণ্যশ্নুতে স্বর্গলোকম্
70.33
তথানড্বাহং ব্রাহ্মণায় প্রদায়; দান্তং ধুর্যং বলবন্তং যুবানম্
কুলানুজীবং বীর্যবন্তং বৃহন্তং; ভুঙ্ক্তে লোকান্সংমিতান্ধেনুদস্য
70.34
গোষু ক্ষান্তং গোশরণ্যং কৃতজ্ঞং; বৃত্তিগ্লানং তাদৃশং পাত্রমাহুঃ
বৃত্তিগ্লানে সংভ্রমে বা মহার্থে; কৃষ্যর্থে বা হোমহেতোঃ প্রসূত্যাম্
70.35
গুর্বর্থে বা বালপুষ্ট্যাভিষঙ্গা;দ্গাবো দাতুং দেশকালোঽবিশিষ্টঃ
অন্তর্জাতাঃ সুক্রয়জ্ঞানলব্ধাঃ; প্রাণক্রীতা নির্জিতাশ্চৌদকাশ্চ
70.36
নাচিকেত উবাচ
শ্রুত্বা বৈবস্বতবচস্তমহং পুনরব্রুবম্
অগোমী গোপ্রদাতৄণাং কথং লোকান্নিগচ্ছতি
70.37
ততো যমোঽব্রবীদ্ধীমান্গোপ্রদানে পরাং গতিম্
গোপ্রদানানুকল্পং তু গামৃতে সন্তি গোপ্রদাঃ
70.38
অলাভে যো গবাং দদ্যাদ্ঘৃতধেনুং যতব্রতঃ
তস্যৈতা ঘৃতবাহিন্যঃ ক্ষরন্তে বত্সলা ইব
70.39
ঘৃতালাভে চ যো দদ্যাত্তিলধেনুং যতব্রতঃ
স দুর্গাত্তারিতো ধেন্বা ক্ষীরনদ্যাং প্রমোদতে
70.40
তিলালাভে চ যো দদ্যাজ্জলধেনুং যতব্রতঃ
স কামপ্রবহাং শীতাং নদীমেতামুপাশ্নুতে
70.41
এবমাদীনি মে তত্র ধর্মরাজো ন্যদর্শয়ৎ
দৃষ্ট্বা চ পরমং হর্ষমবাপমহমচ্যুত
70.42
নিবেদয়ে চাপি প্রিয়ং ভবত্সু; ক্রতুর্মহানল্পধনপ্রচারঃ
প্রাপ্তো ময়া তাত স মত্প্রসূতঃ; প্রপত্স্যতে বেদবিধিপ্রবৃত্তঃ
70.43
শাপো হ্যয়ং ভবতোঽনুগ্রহায়; প্রাপ্তো ময়া যত্র দৃষ্টো যমো মে
দানব্যুষ্টিং তত্র দৃষ্ট্বা মহার্থাং; নিঃসংদিগ্ধং দানধর্মাংশ্চরিষ্যে
70.44
ইদং চ মামব্রবীদ্ধর্মরাজঃ; পুনঃ পুনঃ সংপ্রহৃষ্টো দ্বিজর্ষে
দানেন তাত প্রয়তোঽভূঃ সদৈব; বিশেষতো গোপ্রদানং চ কুর্যাঃ
70.45
শুদ্ধো হ্যর্থো নাবমন্যঃ স্বধর্মা;ত্পাত্রে দেয়ং দেশকালোপপন্নে
তস্মাদ্গাবস্তে নিত্যমেব প্রদেয়া; মা ভূচ্চ তে সংশয়ঃ কশ্চিদত্র
70.46
এতাঃ পুরা অদদন্নিত্যমেব; শান্তাত্মানো দানপথে নিবিষ্টাঃ
তপাংস্যুগ্রাণ্যপ্রতিশঙ্কমানা;স্তে বৈ দানং প্রদদুশ্চাপি শক্ত্যা
70.47
কালে শক্ত্যা মত্সরং বর্জয়িত্বা; শুদ্ধাত্মানঃ শ্রদ্ধিনঃ পুণ্যশীলাঃ
দত্ত্বা তপ্ত্বা লোকমমুং প্রপন্না; দেদীপ্যন্তে পুণ্যশীলাশ্চ নাকে
70.48
এতদ্দানং ন্যায়লব্ধং দ্বিজেভ্যঃ; পাত্রে দত্তং প্রাপণীয়ং পরীক্ষ্য
কাম্যাষ্টম্যাং বর্তিতব্যং দশাহং; রসৈর্গবাং শকৃতা প্রস্নবৈর্বা
70.49
বেদব্রতী স্যাদ্বৃষভপ্রদাতা; বেদাবাপ্তির্গোয়ুগস্য প্রদানে
তীর্থাবাপ্তির্গোপ্রয়ুক্তপ্রদানে; পাপোত্সর্গঃ কপিলায়াঃ প্রদানে
70.50
গামপ্যেকাং কপিলাং সংপ্রদায়; ন্যায়োপেতাং কল্মষাদ্বিপ্রমুচ্যেৎ
গবাং রসাত্পরমং নাস্তি কিংচি;দ্গবাং দানং সুমহত্তদ্বদন্তি
70.51
গাবো লোকান্ধারয়ন্তি ক্ষরন্ত্যো; গাবশ্চান্নং সংজনয়ন্তি লোকে
যস্তজ্জানন্ন গবাং হার্দমেতি; স বৈ গন্তা নিরয়ং পাপচেতাঃ
70.52
যত্তে দাতুং গোসহস্রং শতং বা; শতার্ধং বা দশ বা সাধুবত্সাঃ
অপ্যেকাং বা সাধবে ব্রাহ্মণায়; সাস্যামুষ্মিন্পুণ্যতীর্থা নদী বৈ
70.53
প্রাপ্ত্যা পুষ্ট্যা লোকসংরক্ষণেন; গাবস্তুল্যাঃ সূর্যপাদৈঃ পৃথিব্যাম্
শব্দশ্চৈকঃ সংততিশ্চোপভোগ;স্তস্মাদ্গোদঃ সূর্য ইবাভিভাতি
70.54
গুরুং শিষ্যো বরয়েদ্গোপ্রদানে; স বৈ বক্তা নিয়তং স্বর্গদাতা
বিধিজ্ঞানাং সুমহানেষ ধর্মো; বিধিং হ্যাদ্যং বিধয়ঃ সংশ্রয়ন্তি
70.55
এতদ্দানং ন্যায়লব্ধং দ্বিজেভ্যঃ; পাত্রে দত্ত্বা প্রাপয়েথাঃ পরীক্ষ্য
ত্বয্যাশংসন্ত্যমরা মানবাশ্চ; বয়ং চাপি প্রসৃতে পুণ্যশীলাঃ
70.56
ইত্যুক্তোঽহং ধর্মরাজ্ঞা মহর্ষে; ধর্মাত্মানং শিরসাভিপ্রণম্য
অনুজ্ঞাতস্তেন বৈবস্বতেন; প্রত্যাগমং ভগবত্পাদমূলম্