Utshovঅধ্যায় 71
71.1
যুধিষ্ঠির উবাচ
উক্তং বৈ গোপ্রদানং তে নাচিকেতমৃষিং প্রতি
মাহাত্ম্যমপি চৈবোক্তমুদ্দেশেন গবাং প্রভো
71.2
নৃগেণ চ যথা দুঃখমনুভূতং মহাত্মনা
একাপরাধাদজ্ঞানাত্পিতামহ মহামতে
71.3
দ্বারবত্যাং যথা চাসৌ নিবিশন্ত্যাং সমুদ্ধৃতঃ
মোক্ষহেতুরভূত্কৃষ্ণস্তদপ্যবধৃতং ময়া
71.4
কিং ত্বস্তি মম সংদেহো গবাং লোকং প্রতি প্রভো
তত্ত্বতঃ শ্রোতুমিচ্ছামি গোদা যত্র বিশন্ত্যুত
71.5
ভীষ্ম উবাচ
অত্রাপ্যুদাহরন্তীমমিতিহাসং পুরাতনম্
যথাপৃচ্ছত্পদ্ময়োনিমেতদেব শতক্রতুঃ
71.6
শক্র উবাচ
স্বর্লোকবাসিনাং লক্ষ্মীমভিভূয় স্বয়া ত্বিষা
গোলোকবাসিনঃ পশ্যে ব্রজতঃ সংশয়োঽত্র মে
71.7
কীদৃশা ভগবঁল্লোকা গবাং তদ্ব্রূহি মেঽনঘ
যানাবসন্তি দাতার এতদিচ্ছামি বেদিতুম্
71.8
কীদৃশাঃ কিংফলাঃ কঃ স্বিত্পরমস্তত্র বৈ গুণঃ
কথং চ পুরুষাস্তত্র গচ্ছন্তি বিগতজ্বরাঃ
71.9
কিয়ত্কালং প্রদানস্য দাতা চ ফলমশ্নুতে
কথং বহুবিধং দানং স্যাদল্পমপি বা কথম্
71.10
বহ্বীনাং কীদৃশং দানমল্পানাং বাপি কীদৃশম্
অদত্ত্বা গোপ্রদাঃ সন্তি কেন বা তচ্চ শংস মে
71.11
কথং চ বহুদাতা স্যাদল্পদাত্রা সমঃ প্রভো
অল্পপ্রদাতা বহুদঃ কথং চ স্যাদিহেশ্বর
71.12
কীদৃশী দক্ষিণা চৈব গোপ্রদানে বিশিষ্যতে
এতত্তথ্যেন ভগবন্মম শংসিতুমর্হসি