UtshovChapter 71
71.1
युधिष्ठिर उवाच
उक्तं वै गोप्रदानं ते नाचिकेतमृषिं प्रति
माहात्म्यमपि चैवोक्तमुद्देशेन गवां प्रभो
Yudhishthira uvacha
Uktam vai gopradanam te nachiketamrishim prati
Mahatmyamapi chaivoktamuddeshena gavam prabho
71.2
नृगेण च यथा दुःखमनुभूतं महात्मना
एकापराधादज्ञानात्पितामह महामते
Nrigena cha yatha duhkhamanubhutam mahatmana
Ekaparadhadagyanatpitamaha mahamate
71.3
द्वारवत्यां यथा चासौ निविशन्त्यां समुद्धृतः
मोक्षहेतुरभूत्कृष्णस्तदप्यवधृतं मया
Dvaravatyam yatha chasau nivishantyam samuddhritah
Mokshaheturabhutkrishnastadapyavadhritam maya
71.4
किं त्वस्ति मम संदेहो गवां लोकं प्रति प्रभो
तत्त्वतः श्रोतुमिच्छामि गोदा यत्र विशन्त्युत
Kim tvasti mama sandeho gavam lokam prati prabho
Tattvatah shrotumichchhami goda yatra vishantyuta
71.5
भीष्म उवाच
अत्राप्युदाहरन्तीममितिहासं पुरातनम्
यथापृच्छत्पद्मयोनिमेतदेव शतक्रतुः
Bhishma uvacha
Atrapyudaharantimamitihasam puratanam
Yathaprichchhatpadmayonimetadeva shatakratuh
71.6
शक्र उवाच
स्वर्लोकवासिनां लक्ष्मीमभिभूय स्वया त्विषा
गोलोकवासिनः पश्ये व्रजतः संशयोऽत्र मे
Shakra uvacha
Svarlokavasinam lakshmimabhibhuya svaya tvisha
Golokavasinah pashye vrajatah sanshayotra me
71.7
कीदृशा भगवँल्लोका गवां तद्ब्रूहि मेऽनघ
यानावसन्ति दातार एतदिच्छामि वेदितुम्
Kidrisha bhagavanlloka gavam tadbruhi menagha
Yanavasanti datara etadichchhami veditum
71.8
कीदृशाः किंफलाः कः स्वित्परमस्तत्र वै गुणः
कथं च पुरुषास्तत्र गच्छन्ति विगतज्वराः
Kidrishah kimphalah kah svitparamastatra vai gunah
Katham cha purushastatra gachchhanti vigatajvarah
71.9
कियत्कालं प्रदानस्य दाता च फलमश्नुते
कथं बहुविधं दानं स्यादल्पमपि वा कथम्
Kiyatkalam pradanasya data cha phalamashnute
Katham bahuvidham danam syadalpamapi va katham
71.10
बह्वीनां कीदृशं दानमल्पानां वापि कीदृशम्
अदत्त्वा गोप्रदाः सन्ति केन वा तच्च शंस मे
Bahvinam kidrisham danamalpanam vapi kidrisham
Adattva gopradah santi kena va tachcha shansa me
71.11
कथं च बहुदाता स्यादल्पदात्रा समः प्रभो
अल्पप्रदाता बहुदः कथं च स्यादिहेश्वर
Katham cha bahudata syadalpadatra samah prabho
Alpapradata bahudah katham cha syadiheshvara
71.12
कीदृशी दक्षिणा चैव गोप्रदाने विशिष्यते
एतत्तथ्येन भगवन्मम शंसितुमर्हसि
Kidrishi dakshina chaiva gopradane vishishyate
Etattathyena bhagavanmama shansitumarhasi