Utshovঅধ্যায় 72
72.1
ব্রহ্মোবাচ
যোঽয়ং প্রশ্নস্ত্বয়া পৃষ্টো গোপ্রদানাধিকারবান্
নাস্য প্রষ্টাস্তি লোকেঽস্মিংস্ত্বত্তোঽন্যো হি শতক্রতো
72.2
সন্তি নানাবিধা লোকা যাংস্ত্বং শক্র ন পশ্যসি
পশ্যামি যানহং লোকানেকপত্ন্যশ্চ যাঃ স্ত্রিয়ঃ
72.3
কর্মভিশ্চাপি সুশুভৈঃ সুব্রতা ঋষয়স্তথা
সশরীরা হি তান্যান্তি ব্রাহ্মণাঃ শুভবৃত্তয়ঃ
72.4
শরীরন্যাসমোক্ষেণ মনসা নির্মলেন চ
স্বপ্নভূতাংশ্চ তাঁল্লোকান্পশ্যন্তীহাপি সুব্রতাঃ
72.5
তে তু লোকাঃ সহস্রাক্ষ শৃণু যাদৃগ্গুণান্বিতাঃ
ন তত্র ক্রমতে কালো ন জরা ন চ পাপকম্
তথান্যন্নাশুভং কিংচিন্ন ব্যাধিস্তত্র ন ক্লমঃ
72.6
যদ্যচ্চ গাবো মনসা তস্মিন্বাঞ্ছন্তি বাসব
তত্সর্বং প্রাপয়ন্তি স্ম মম প্রত্যক্ষদর্শনাৎ
কামগাঃ কামচারিণ্যঃ কামাত্কামাংশ্চ ভুঞ্জতে
72.7
বাপ্যঃ সরাংসি সরিতো বিবিধানি বনানি চ
গৃহাণি পর্বতাশ্চৈব যাবদ্দ্রব্যং চ কিংচন
72.8
মনোজ্ঞং সর্বভূতেভ্যঃ সর্বং তত্র প্রদৃশ্যতে
ঈদৃশান্বিদ্ধি তাঁল্লোকান্নাস্তি লোকস্ততোঽধিকঃ
72.9
তত্র সর্বসহাঃ ক্ষান্তা বত্সলা গুরুবর্তিনঃ
অহংকারৈর্বিরহিতা যান্তি শক্র নরোত্তমাঃ
72.10
যঃ সর্বমাংসানি ন ভক্ষয়ীত; পুমান্সদা যাবদন্তায় যুক্তঃ
মাতাপিত্রোরর্চিতা সত্যয়ুক্তঃ; শুশ্রূষিতা ব্রাহ্মণানামনিন্দ্যঃ
72.11
অক্রোধনো গোষু তথা দ্বিজেষু; ধর্মে রতো গুরুশুশ্রূষকশ্চ
যাবজ্জীবং সত্যবৃত্তে রতশ্চ; দানে রতো যঃ ক্ষমী চাপরাধে
72.12
মৃদুর্দান্তো দেবপরায়ণশ্চ; সর্বাতিথিশ্চাপি তথা দয়াবান্
ঈদৃগ্গুণো মানবঃ সংপ্রয়াতি; লোকং গবাং শাশ্বতং চাব্যয়ং চ
72.13
ন পারদারী পশ্যতি লোকমেনং; ন বৈ গুরুঘ্নো ন মৃষাপ্রলাপী
সদাপবাদী ব্রাহ্মণঃ শান্তবেদো; দোষৈরন্যৈর্যশ্চ যুক্তো দুরাত্মা
72.14
ন মিত্রধ্রুঙ্নৈকৃতিকঃ কৃতঘ্নঃ; শঠোঽনৃজুর্ধর্মবিদ্বেষকশ্চ
ন ব্রহ্মহা মনসাপি প্রপশ্যে;দ্গবাং লোকং পুণ্যকৃতাং নিবাসম্
72.15
এতত্তে সর্বমাখ্যাতং নৈপুণেন সুরেশ্বর
গোপ্রদানরতানাং তু ফলং শৃণু শতক্রতো
72.16
দায়াদ্যলব্ধৈরর্থৈর্যো গাঃ ক্রীত্বা সংপ্রয়চ্ছতি
ধর্মার্জিতধনক্রীতান্স লোকানশ্নুতেঽক্ষয়ান্
72.17
যো বৈ দ্যূতে ধনং জিত্বা গাঃ ক্রীত্বা সংপ্রয়চ্ছতি
স দিব্যময়ুতং শক্র বর্ষাণাং ফলমশ্নুতে
72.18
দায়াদ্যা যস্য বৈ গাবো ন্যায়পূর্বৈরুপার্জিতাঃ
প্রদত্তাস্তাঃ প্রদাতৄণাং সংভবন্ত্যক্ষয়া ধ্রুবাঃ
72.19
প্রতিগৃহ্য চ যো দদ্যাদ্গাঃ সুশুদ্ধেন চেতসা
তস্যাপীহাক্ষয়াঁল্লোকান্ধ্রুবান্বিদ্ধি শচীপতে
72.20
জন্মপ্রভৃতি সত্যং চ যো ব্রূয়ান্নিয়তেন্দ্রিয়ঃ
গুরুদ্বিজসহঃ ক্ষান্তস্তস্য গোভিঃ সমা গতিঃ
72.21
ন জাতু ব্রাহ্মণো বাচ্যো যদবাচ্যং শচীপতে
মনসা গোষু ন দ্রুহ্যেদ্গোবৃত্তির্গোনুকম্পকঃ
72.22
সত্যে ধর্মে চ নিরতস্তস্য শক্র ফলং শৃণু
গোসহস্রেণ সমিতা তস্য ধেনুর্ভবত্যুত
72.23
ক্ষত্রিয়স্য গুণৈরেভিরন্বিতস্য ফলং শৃণু
তস্যাপি শততুল্যা গৌর্ভবতীতি বিনিশ্চয়ঃ
72.24
বৈশ্যস্যৈতে যদি গুণাস্তস্য পঞ্চাশতং ভবেৎ
শূদ্রস্যাপি বিনীতস্য চতুর্ভাগফলং স্মৃতম্
72.25
এতচ্চৈবং যোঽনুতিষ্ঠেত যুক্তঃ; সত্যেন যুক্তো গুরুশুশ্রূষয়া চ
দান্তঃ ক্ষান্তো দেবতার্চী প্রশান্তঃ; শুচির্বুদ্ধো ধর্মশীলোঽনহংবাক্
72.26
মহত্ফলং প্রাপ্নুতে স দ্বিজায়; দত্ত্বা দোগ্ধ্রীং বিধিনানেন ধেনুম্
নিত্যং দদ্যাদেকভক্তঃ সদা চ; সত্যে স্থিতো গুরুশুশ্রূষিতা চ
72.27
বেদাধ্যায়ী গোষু যো ভক্তিমাংশ্চ; নিত্যং দৃষ্ট্বা যোঽভিনন্দেত গাশ্চ
আ জাতিতো যশ্চ গবাং নমেত; ইদং ফলং শক্র নিবোধ তস্য
72.28
যত্স্যাদিষ্ট্বা রাজসূয়ে ফলং তু; যত্স্যাদিষ্ট্বা বহুনা কাঞ্চনেন
এতত্তুল্যং ফলমস্যাহুরগ্র্যং; সর্বে সন্তস্ত্বৃষয়ো যে চ সিদ্ধাঃ
72.29
যোঽগ্রং ভক্তান্কিংচিদপ্রাশ্য দদ্যা;দ্গোভ্যো নিত্যং গোব্রতী সত্যবাদী
শান্তো বুদ্ধো গোসহস্রস্য পুণ্যং; সংবত্সরেণাপ্নুয়াত্পুণ্যশীলঃ
72.30
য একং ভক্তমশ্নীয়াদ্দদ্যাদেকং গবাং চ যৎ
দশ বর্ষাণ্যনন্তানি গোব্রতী গোনুকম্পকঃ
72.31
একেনৈব চ ভক্তেন যঃ ক্রীত্বা গাং প্রয়চ্ছতি
যাবন্তি তস্য প্রোক্তানি দিবসানি শতক্রতো
তাবচ্ছতানাং স গবাং ফলমাপ্নোতি শাশ্বতম্
72.32
ব্রাহ্মণস্য ফলং হীদং ক্ষত্রিয়েঽভিহিতং শৃণু
পঞ্চবার্ষিকমেতত্তু ক্ষত্রিয়স্য ফলং স্মৃতম্
ততোঽর্ধেন তু বৈশ্যস্য শূদ্রো বৈশ্যার্ধতঃ স্মৃতঃ
72.33
যশ্চাত্মবিক্রয়ং কৃত্বা গাঃ ক্রীত্বা সংপ্রয়চ্ছতি
যাবতীঃ স্পর্শয়েদ্গা বৈ তাবত্তু ফলমশ্নুতে
লোম্নি লোম্নি মহাভাগ লোকাশ্চাস্যাক্ষয়াঃ স্মৃতাঃ
72.34
সংগ্রামেষ্বর্জয়িত্বা তু যো বৈ গাঃ সংপ্রয়চ্ছতি
আত্মবিক্রয়তুল্যাস্তাঃ শাশ্বতা বিদ্ধি কৌশিক
72.35
অলাভে যো গবাং দদ্যাত্তিলধেনুং যতব্রতঃ
দুর্গাত্স তারিতো ধেন্বা ক্ষীরনদ্যাং প্রমোদতে
72.36
ন ত্বেবাসাং দানমাত্রং প্রশস্তং; পাত্রং কালো গোবিশেষো বিধিশ্চ
কালজ্ঞানং বিপ্র গবান্তরং হি; দুঃখং জ্ঞাতুং পাবকাদিত্যভূতম্
72.37
স্বাধ্যায়াঢ্যং শুদ্ধয়োনিং প্রশান্তং; বৈতানস্থং পাপভীরুং কৃতজ্ঞম্
গোষু ক্ষান্তং নাতিতীক্ষ্ণং শরণ্যং; বৃত্তিগ্লানং তাদৃশং পাত্রমাহুঃ
72.38
বৃত্তিগ্লানে সীদতি চাতিমাত্রং; কৃষ্যর্থং বা হোমহেতোঃ প্রসূত্যাম্
গুর্বর্থং বা বালসংবৃদ্ধয়ে বা; ধেনুং দদ্যাদ্দেশকালে বিশিষ্টে
72.39
অন্তর্জাতাঃ সুক্রয়জ্ঞানলব্ধাঃ; প্রাণক্রীতা নির্জিতাশ্চৌকজাশ্চ
কৃচ্ছ্রোত্সৃষ্টাঃ পোষণাভ্যাগতাশ্চ; দ্বারৈরেতৈর্গোবিশেষাঃ প্রশস্তাঃ
72.40
বলান্বিতাঃ শীলবয়োপপন্নাঃ; সর্বাঃ প্রশংসন্তি সুগন্ধবত্যঃ
যথা হি গঙ্গা সরিতাং বরিষ্ঠা; তথার্জুনীনাং কপিলা বরিষ্ঠা
72.41
তিস্রো রাত্রীস্ত্বদ্ভিরুপোষ্য ভূমৌ; তৃপ্তা গাবস্তর্পিতেভ্যঃ প্রদেয়াঃ
বত্সৈঃ পুষ্টৈঃ ক্ষীরপৈঃ সুপ্রচারা;স্ত্র্যহং দত্ত্বা গোরসৈর্বর্তিতব্যম্
72.42
দত্ত্বা ধেনুং সুব্রতাং সাধুবত্সাং; কল্যাণবৃত্তামপলায়িনীং চ
যাবন্তি লোমানি ভবন্তি তস্যা;স্তাবন্তি বর্ষাণি বসত্যমুত্র
72.43
তথানড্বাহং ব্রাহ্মণায়াথ ধুর্যং; দত্ত্বা যুবানং বলিনং বিনীতম্
হলস্য বোঢারমনন্তবীর্যং; প্রাপ্নোতি লোকান্দশধেনুদস্য
72.44
কান্তারে ব্রাহ্মণান্গাশ্চ যঃ পরিত্রাতি কৌশিক
ক্ষেমেণ চ বিমুচ্যেত তস্য পুণ্যফলং শৃণু
অশ্বমেধক্রতোস্তুল্যং ফলং ভবতি শাশ্বতম্
72.45
মৃত্যুকালে সহস্রাক্ষ যাং বৃত্তিমনুকাঙ্ক্ষতে
লোকান্বহুবিধান্দিব্যান্যদ্বাস্য হৃদি বর্ততে
72.46
তত্সর্বং সমবাপ্নোতি কর্মণা তেন মানবঃ
গোভিশ্চ সমনুজ্ঞাতঃ সর্বত্র স মহীয়তে
72.47
যস্ত্বেতেনৈব বিধিনা গাং বনেষ্বনুগচ্ছতি
তৃণগোময়পর্ণাশী নিঃস্পৃহো নিয়তঃ শুচিঃ
72.48
অকামং তেন বস্তব্যং মুদিতেন শতক্রতো
মম লোকে সুরৈঃ সার্ধং লোকে যত্রাপি চেচ্ছতি