অধ্যায় 73

73.1

ইন্দ্র উবাচ
জানন্যো গামপহরেদ্বিক্রীয়াদ্বার্থকারণাৎ
এতদ্বিজ্ঞাতুমিচ্ছামি কা নু তস্য গতির্ভবেৎ

ব্রহ্মোবাচ
ভক্ষার্থং বিক্রয়ার্থং বা যেঽপহারং হি কুর্বতে
দানার্থং বা ব্রাহ্মণায় তত্রেদং শ্রূয়তাং ফলম্

বিক্রয়ার্থং হি যো হিংস্যাদ্ভক্ষয়েদ্বা নিরঙ্কুশঃ
ঘাতয়ানং হি পুরুষং যেঽনুমন্যেয়ুরর্থিনঃ

ঘাতকঃ খাদকো বাপি তথা যশ্চানুমন্যতে
যাবন্তি তস্যা লোমানি তাবদ্বর্ষাণি মজ্জতি

যে দোষা যাদৃশাশ্চৈব দ্বিজয়জ্ঞোপঘাতকে
বিক্রয়ে চাপহারে চ তে দোষা বৈ স্মৃতাঃ প্রভো

অপহৃত্য তু যো গাং বৈ ব্রাহ্মণায় প্রয়চ্ছতি
যাবদ্দানে ফলং তস্যাস্তাবন্নিরয়মৃচ্ছতি

সুবর্ণং দক্ষিণামাহুর্গোপ্রদানে মহাদ্যুতে
সুবর্ণং পরমং হ্যুক্তং দক্ষিণার্থমসংশয়ম্

গোপ্রদানং তারয়তে সপ্ত পূর্বাংস্তথা পরান্
সুবর্ণং দক্ষিণাং দত্ত্বা তাবদ্দ্বিগুণমুচ্যতে

সুবর্ণং পরমং দানং সুবর্ণং দক্ষিণা পরা
সুবর্ণং পাবনং শক্র পাবনানাং পরং স্মৃতম্

কুলানাং পাবনং প্রাহুর্জাতরূপং শতক্রতো
এষা মে দক্ষিণা প্রোক্তা সমাসেন মহাদ্যুতে

ভীষ্ম উবাচ
এতত্পিতামহেনোক্তমিন্দ্রায় ভরতর্ষভ
ইন্দ্রো দশরথায়াহ রামায়াহ পিতা তথা

রাঘবোঽপি প্রিয়ভ্রাত্রে লক্ষ্মণায় যশস্বিনে
ঋষিভ্যো লক্ষ্মণেনোক্তমরণ্যে বসতা বিভো

পারংপর্যাগতং চেদমৃষয়ঃ সংশিতব্রতাঃ
দুর্ধরং ধারয়ামাসূ রাজানশ্চৈব ধার্মিকাঃ
উপাধ্যায়েন গদিতং মম চেদং যুধিষ্ঠির

য ইদং ব্রাহ্মণো নিত্যং বদেদ্ব্রাহ্মণসংসদি
যজ্ঞেষু গোপ্রদানেষু দ্বয়োরপি সমাগমে

তস্য লোকাঃ কিলাক্ষয্যা দৈবতৈঃ সহ নিত্যদা
ইতি ব্রহ্মা স ভগবানুবাচ পরমেশ্বরঃ