Utshovঅধ্যায় 74
74.1
যুধিষ্ঠির উবাচ
বিস্রম্ভিতোঽহং ভবতা ধর্মান্প্রবদতা বিভো
প্রবক্ষ্যামি তু সংদেহং তন্মে ব্রূহি পিতামহ
74.2
ব্রতানাং কিং ফলং প্রোক্তং কীদৃশং বা মহাদ্যুতে
নিয়মানাং ফলং কিং চ স্বধীতস্য চ কিং ফলম্
74.3
দমস্যেহ ফলং কিং চ বেদানাং ধারণে চ কিম্
অধ্যাপনে ফলং কিং চ সর্বমিচ্ছামি বেদিতুম্
74.4
অপ্রতিগ্রাহকে কিং চ ফলং লোকে পিতামহ
তস্য কিং চ ফলং দৃষ্টং শ্রুতং যঃ সংপ্রয়চ্ছতি
74.5
স্বকর্মনিরতানাং চ শূরাণাং চাপি কিং ফলম্
সত্যে চ কিং ফলং প্রোক্তং ব্রহ্মচর্যে চ কিং ফলম্
74.6
পিতৃশুশ্রূষণে কিং চ মাতৃশুশ্রূষণে তথা
আচার্যগুরুশুশ্রূষাস্বনুক্রোশানুকম্পনে
74.7
এতত্সর্বমশেষেণ পিতামহ যথাতথম্
বেত্তুমিচ্ছামি ধর্মজ্ঞ পরং কৌতূহলং হি মে
74.8
ভীষ্ম উবাচ
যো ব্রতং বৈ যথোদ্দিষ্টং তথা সংপ্রতিপদ্যতে
অখণ্ডং সম্যগারব্ধং তস্য লোকাঃ সনাতনাঃ
74.9
নিয়মানাং ফলং রাজন্প্রত্যক্ষমিহ দৃশ্যতে
নিয়মানাং ক্রতূনাং চ ত্বয়াবাপ্তমিদং ফলম্
74.10
স্বধীতস্যাপি চ ফলং দৃশ্যতেঽমুত্র চেহ চ
ইহলোকেঽর্থবান্নিত্যং ব্রহ্মলোকে চ মোদতে
74.11
দমস্য তু ফলং রাজঞ্শৃণু ত্বং বিস্তরেণ মে
দান্তাঃ সর্বত্র সুখিনো দান্তাঃ সর্বত্র নির্বৃতাঃ
74.12
যত্রেচ্ছাগামিনো দান্তাঃ সর্বশত্রুনিষূদনাঃ
প্রার্থয়ন্তি চ যদ্দান্তা লভন্তে তন্ন সংশয়ঃ
74.13
যুজ্যন্তে সর্বকামৈর্হি দান্তাঃ সর্বত্র পাণ্ডব
স্বর্গে তথা প্রমোদন্তে তপসা বিক্রমেণ চ
74.14
দানৈর্যজ্ঞৈশ্চ বিবিধৈর্যথা দান্তাঃ ক্ষমান্বিতাঃ
দাতা কুপ্যতি নো দান্তস্তস্মাদ্দানাত্পরো দমঃ
74.15
যস্তু দদ্যাদকুপ্যন্হি তস্য লোকাঃ সনাতনাঃ
ক্রোধো হন্তি হি যদ্দানং তস্মাদ্দানাত্পরো দমঃ
74.16
অদৃশ্যানি মহারাজ স্থানান্যয়ুতশো দিবি
ঋষীণাং সর্বলোকেষু যানীতো যান্তি দেবতাঃ
74.17
দমেন যানি নৃপতে গচ্ছন্তি পরমর্ষয়ঃ
কাময়ানা মহত্স্থানং তস্মাদ্দানাত্পরো দমঃ
74.18
অধ্যাপকঃ পরিক্লেশাদক্ষয়ং ফলমশ্নুতে
বিধিবত্পাবকং হুত্বা ব্রহ্মলোকে নরাধিপ
74.19
অধীত্যাপি হি যো বেদান্ন্যায়বিদ্ভ্যঃ প্রয়চ্ছতি
গুরুকর্মপ্রশংসী চ সোঽপি স্বর্গে মহীয়তে
74.20
ক্ষত্রিয়োঽধ্যয়নে যুক্তো যজনে দানকর্মণি
যুদ্ধে যশ্চ পরিত্রাতা সোঽপি স্বর্গে মহীয়তে
74.21
বৈশ্যঃ স্বকর্মনিরতঃ প্রদানাল্লভতে মহৎ
শূদ্রঃ স্বকর্মনিরতঃ স্বর্গং শুশ্রূষয়ার্চ্ছতি
74.22
শূরা বহুবিধাঃ প্রোক্তাস্তেষামর্থাংশ্চ মে শৃণু
শূরান্বয়ানাং নির্দিষ্টং ফলং শূরস্য চৈব হ
74.23
যজ্ঞশূরা দমে শূরাঃ সত্যশূরাস্তথাপরে
যুদ্ধশূরাস্তথৈবোক্তা দানশূরাশ্চ মানবাঃ
74.24
বুদ্ধিশূরাস্তথৈবান্যে ক্ষমাশূরাস্তথাপরে
আর্জবে চ তথা শূরাঃ শমে বর্তন্তি মানবাঃ
74.25
তৈস্তৈস্তু নিয়মৈঃ শূরা বহবঃ সন্তি চাপরে
বেদাধ্যয়নশূরাশ্চ শূরাশ্চাধ্যাপনে রতাঃ
74.26
গুরুশুশ্রূষয়া শূরাঃ পিতৃশুশ্রূষয়াপরে
মাতৃশুশ্রূষয়া শূরা ভৈক্ষ্যশূরাস্তথাপরে
74.27
সাংখ্যশূরাশ্চ বহবো যোগশূরাস্তথাপরে
অরণ্যে গৃহবাসে চ শূরাশ্চাতিথিপূজনে
সর্বে যান্তি পরাঁল্লোকান্স্বকর্মফলনির্জিতান্
74.28
ধারণং সর্ববেদানাং সর্বতীর্থাবগাহনম্
সত্যং চ ব্রুবতো নিত্যং সমং বা স্যান্ন বা সমম্
74.29
অশ্বমেধসহস্রং চ সত্যং চ তুলয়া ধৃতম্
অশ্বমেধসহস্রাদ্ধি সত্যমেব বিশিষ্যতে
74.30
সত্যেন সূর্যস্তপতি সত্যেনাগ্নিঃ প্রদীপ্যতে
সত্যেন মারুতো বাতি সর্বং সত্যে প্রতিষ্ঠিতম্
74.31
সত্যেন দেবান্প্রীণাতি পিতৄন্বৈ ব্রাহ্মণাংস্তথা
সত্যমাহুঃ পরং ধর্মং তস্মাত্সত্যং ন লঙ্ঘয়েৎ
74.32
মুনয়ঃ সত্যনিরতা মুনয়ঃ সত্যবিক্রমাঃ
মুনয়ঃ সত্যশপথাস্তস্মাত্সত্যং বিশিষ্যতে
সত্যবন্তঃ স্বর্গলোকে মোদন্তে ভরতর্ষভ
74.33
দমঃ সত্যফলাবাপ্তিরুক্তা সর্বাত্মনা ময়া
অসংশয়ং বিনীতাত্মা সর্বঃ স্বর্গে মহীয়তে
74.34
ব্রহ্মচর্যস্য তু গুণাঞ্শৃণু মে বসুধাধিপ
আ জন্মমরণাদ্যস্তু ব্রহ্মচারী ভবেদিহ
ন তস্য কিংচিদপ্রাপ্যমিতি বিদ্ধি জনাধিপ
74.35
বহ্ব্যঃ কোট্যস্ত্বৃষীণাং তু ব্রহ্মলোকে বসন্ত্যুত
সত্যে রতানাং সততং দান্তানামূর্ধ্বরেতসাম্
74.36
ব্রহ্মচর্যং দহেদ্রাজন্সর্বপাপান্যুপাসিতম্
ব্রাহ্মণেন বিশেষেণ ব্রাহ্মণো হ্যগ্নিরুচ্যতে
74.37
প্রত্যক্ষং চ তবাপ্যেতদ্ব্রাহ্মণেষু তপস্বিষু
বিভেতি হি যথা শক্রো ব্রহ্মচারিপ্রধর্ষিতঃ
তদ্ব্রহ্মচর্যস্য ফলমৃষীণামিহ দৃশ্যতে
74.38
মাতাপিত্রোঃ পূজনে যো ধর্মস্তমপি মে শৃণু
শুশ্রূষতে যঃ পিতরং ন চাসূয়েত্কথংচন
মাতরং বানহংবাদী গুরুমাচার্যমেব চ
74.39
তস্য রাজন্ফলং বিদ্ধি স্বর্লোকে স্থানমুত্তমম্
ন চ পশ্যেত নরকং গুরুশুশ্রূষুরাত্মবান্