Utshovঅধ্যায় 75
75.1
যুধিষ্ঠির উবাচ
বিধিং গবাং পরমহং শ্রোতুমিচ্ছামি তত্ত্বতঃ
যেন তাঞ্শাশ্বতাঁল্লোকানখিলানশ্নুবীমহি
75.2
ভীষ্ম উবাচ
ন গোদানাত্পরং কিংচিদ্বিদ্যতে বসুধাধিপ
গৌর্হি ন্যায়াগতা দত্তা সদ্যস্তারয়তে কুলম্
75.3
সতামর্থে সম্যগুত্পাদিতো যঃ; স বৈ কৢপ্তঃ সম্যগিষ্টঃ প্রজাভ্যঃ
তস্মাত্পূর্বং হ্যাদিকালে প্রবৃত্তং; গবাং দানে শৃণু রাজন্বিধিং মে
75.4
পুরা গোষূপনীতাসু গোষু সংদিগ্ধদর্শিনা
মান্ধাত্রা প্রকৃতং প্রশ্নং বৃহস্পতিরভাষত
75.5
দ্বিজাতিমভিসত্কৃত্য শ্বঃ কালমভিবেদ্য চ
প্রদানার্থে নিয়ুঞ্জীত রোহিণীং নিয়তব্রতঃ
75.6
আহ্বানং চ প্রয়ুঞ্জীত সমঙ্গে বহুলেতি চ
প্রবিশ্য চ গবাং মধ্যমিমাং শ্রুতিমুদাহরেৎ
75.7
গৌর্মে মাতা গোবৃষভঃ পিতা মে; দিবং শর্ম জগতী মে প্রতিষ্ঠা
প্রপদ্যৈবং শর্বরীমুষ্য গোষু; মুনির্বাণীমুত্সৃজেদ্গোপ্রদানে
75.8
স তামেকাং নিশাং গোভিঃ সমসখ্যঃ সমব্রতঃ
ঐকাত্ম্যগমনাত্সদ্যঃ কল্মষাদ্বিপ্রমুচ্যতে
75.9
উত্সৃষ্টবৃষবত্সা হি প্রদেয়া সূর্যদর্শনে
ত্রিবিধং প্রতিপত্তব্যমর্থবাদাশিষঃ স্তবাঃ
75.10
ঊর্জস্বিন্য ঊর্জমেধাশ্চ যজ্ঞো; গর্ভোঽমৃতস্য জগতশ্চ প্রতিষ্ঠা
ক্ষিতৌ রাধঃপ্রভবঃ শশ্বদেব; প্রাজাপত্যাঃ সর্বমিত্যর্থবাদঃ
75.11
গাবো মমৈনঃ প্রণুদন্তু সৌর্যা;স্তথা সৌম্যাঃ স্বর্গয়ানায় সন্তু
আম্নাতা মে দদতীরাশ্রয়ং তু; তথানুক্তাঃ সন্তু সর্বাশিষো মে
75.12
শেষোত্সর্গে কর্মভির্দেহমোক্ষে; সরস্বত্যঃ শ্রেয়সি সংপ্রবৃত্তাঃ
যূয়ং নিত্যং পুণ্যকর্মোপবাহ্যা; দিশধ্বং মে গতিমিষ্টাং প্রপন্নাঃ
75.13
যা বৈ যূয়ং সোঽহমদ্যৈকভাবো; যুষ্মান্দত্ত্বা চাহমাত্মপ্রদাতা
মনশ্চ্যুতা মনএবোপপন্নাঃ; সংধুক্ষধ্বং সৌম্যরূপোগ্ররূপাঃ
75.14
এবং তস্যাগ্রে পূর্বমর্ধং বদেত; গবাং দাতা বিধিবত্পূর্বদৃষ্টম্
প্রতিব্রূয়াচ্ছেষমর্ধং দ্বিজাতিঃ; প্রতিগৃহ্ণন্বৈ গোপ্রদানে বিধিজ্ঞঃ
75.15
গাং দদানীতি বক্তব্যমর্ঘ্যবস্ত্রবসুপ্রদঃ
ঊধস্যা ভরিতব্যা চ বৈষ্ণবীতি চ চোদয়েৎ
75.16
নাম সংকীর্তয়েত্তস্যা যথাসংখ্যোত্তরং স বৈ
ফলং ষড্বিংশদষ্টৌ চ সহস্রাণি চ বিংশতিঃ
75.17
এবমেতান্গুণান্বৃদ্ধান্গবাদীনাং যথাক্রমম্
গোপ্রদাতা সমাপ্নোতি সমস্তানষ্টমে ক্রমে
75.18
গোদঃ শীলী নির্ভয়শ্চার্ঘদাতা; ন স্যাদ্দুঃখী বসুদাতা চ কামী
ঊধস্যোঢা ভারত যশ্চ বিদ্বা;ন্ব্যাখ্যাতাস্তে বৈষ্ণবাশ্চন্দ্রলোকাঃ
75.19
গা বৈ দত্ত্বা গোব্রতী স্যাত্ত্রিরাত্রং; নিশাং চৈকাং সংবসেতেহ তাভিঃ
কাম্যাষ্টম্যাং বর্তিতব্যং ত্রিরাত্রং; রসৈর্বা গোঃ শকৃতা প্রস্নবৈর্বা
75.20
বেদব্রতী স্যাদ্বৃষভপ্রদাতা; বেদাবাপ্তির্গোয়ুগস্য প্রদানে
তথা গবাং বিধিমাসাদ্য যজ্বা; লোকানগ্র্যান্বিন্দতে নাবিধিজ্ঞঃ
75.21
কামান্সর্বান্পার্থিবানেকসংস্থা;ন্যো বৈ দদ্যাত্কামদুঘাং চ ধেনুম্
সম্যক্তাঃ স্যুর্হব্যকব্যৌঘবত্য;স্তাসামুক্ষ্ণাং জ্যায়সাং সংপ্রদানম্
75.22
ন চাশিষ্যায়াব্রতায়োপকুর্যা;ন্নাশ্রদ্দধানায় ন বক্রবুদ্ধয়ে
গুহ্যো হ্যয়ং সর্বলোকস্য ধর্মো; নেমং ধর্মং যত্র তত্র প্রজল্পেৎ
75.23
সন্তি লোকে শ্রদ্দধানা মনুষ্যাঃ; সন্তি ক্ষুদ্রা রাক্ষসা মানুষেষু
যেষাং দানং দীয়মানং হ্যনিষ্টং; নাস্তিক্যং চাপ্যাশ্রয়ন্তে হ্যপুণ্যাঃ
75.24
বার্হস্পত্যং বাক্যমেতন্নিশম্য; যে রাজানো গোপ্রদানানি কৃত্বা
লোকান্প্রাপ্তাঃ পুণ্যশীলাঃ সুবৃত্তা;স্তান্মে রাজন্কীর্ত্যমানান্নিবোধ
75.25
উশীনরো বিষ্বগশ্বো নৃগশ্চ; ভগীরথো বিশ্রুতো যৌবনাশ্বঃ
মান্ধাতা বৈ মুচুকুন্দশ্চ রাজা; ভূরিদ্যুম্নো নৈষধঃ সোমকশ্চ
75.26
পুরূরবা ভরতশ্চক্রবর্তী; যস্যান্বয়ে ভারতাঃ সর্ব এব
তথা বীরো দাশরথিশ্চ রামো; যে চাপ্যন্যে বিশ্রুতাঃ কীর্তিমন্তঃ
75.27
তথা রাজা পৃথুকর্মা দিলীপো; দিবং প্রাপ্তো গোপ্রদানে বিধিজ্ঞঃ
যজ্ঞৈর্দানৈস্তপসা রাজধর্মৈ;র্মান্ধাতাভূদ্গোপ্রদানৈশ্চ যুক্তঃ
75.28
তস্মাত্পার্থ ত্বমপীমাং ময়োক্তাং; বার্হস্পতীং ভারতীং ধারয়স্ব
দ্বিজাগ্র্যেভ্যঃ সংপ্রয়চ্ছ প্রতীতো; গাঃ পুণ্যা বৈ প্রাপ্য রাজ্যং কুরূণাম্
75.29
বৈশংপায়ন উবাচ
তথা সর্বং কৃতবান্ধর্মরাজো; ভীষ্মেণোক্তো বিধিবদ্গোপ্রদানে
স মান্ধাতুর্দেবদেবোপদিষ্টং; সম্যগ্ধর্মং ধারয়ামাস রাজা
75.30
ইতি নৃপ সততং গবাং প্রদানে; যবশকলান্সহ গোময়ৈঃ পিবানঃ
ক্ষিতিতলশয়নঃ শিখী যতাত্মা; বৃষ ইব রাজবৃষস্তদা বভূব
75.31
স নৃপতিরভবত্সদৈব তাভ্যঃ; প্রয়তমনা হ্যভিসংস্তুবংশ্চ গা বৈ
নৃপধুরি চ ন গাময়ুঙ্ক্ত ভূয়;স্তুরগবরৈরগমচ্চ যত্র তত্র