Utshovঅধ্যায় 76
76.1
বৈশংপায়ন উবাচ
ততো যুধিষ্ঠিরো রাজা ভূয়ঃ শাংতনবং নৃপ
গোদানে বিস্তরং ধীমান্পপ্রচ্ছ বিনয়ান্বিতঃ
76.2
যুধিষ্ঠির উবাচ
গোপ্রদানে গুণান্সম্যক্পুনঃ প্রব্রূহি ভারত
ন হি তৃপ্যাম্যহং বীর শৃণ্বানোঽমৃতমীদৃশম্
76.3
ইত্যুক্তো ধর্মরাজেন তদা শাংতনবো নৃপ
সম্যগাহ গুণাংস্তস্মৈ গোপ্রদানস্য কেবলান্
76.4
ভীষ্ম উবাচ
বত্সলাং গুণসংপন্নাং তরুণীং বস্ত্রসংবৃতাম্
দত্ত্বেদৃশীং গাং বিপ্রায় সর্বপাপৈঃ প্রমুচ্যতে
76.5
অসুর্যা নাম তে লোকা গাং দত্ত্বা তত্র গচ্ছতি
পীতোদকাং জগ্ধতৃণাং নষ্টদুগ্ধাং নিরিন্দ্রিয়াম্
76.6
জরোগ্রামুপয়ুক্তার্থাং জীর্ণাং কূপমিবাজলম্
দত্ত্বা তমঃ প্রবিশতি দ্বিজং ক্লেশেন যোজয়েৎ
76.7
দুষ্টা রুষ্টা ব্যাধিতা দুর্বলা বা; ন দাতব্যা যাশ্চ মূল্যৈরদত্তৈঃ
ক্লেশৈর্বিপ্রং যোঽফলৈঃ সংয়ুনক্তি; তস্যাবীর্যাশ্চাফলাশ্চৈব লোকাঃ
76.8
বলান্বিতাঃ শীলবয়োপপন্নাঃ; সর্বাঃ প্রশংসন্তি সুগন্ধবত্যঃ
যথা হি গঙ্গা সরিতাং বরিষ্ঠা; তথার্জুনীনাং কপিলা বরিষ্ঠা
76.9
যুধিষ্ঠির উবাচ
কস্মাত্সমানে বহুলাপ্রদানে; সদ্ভিঃ প্রশস্তং কপিলাপ্রদানম্
বিশেষমিচ্ছামি মহানুভাব; শ্রোতুং সমর্থো হি ভবান্প্রবক্তুম্
76.10
ভীষ্ম উবাচ
বৃদ্ধানাং ব্রুবতাং তাত শ্রুতং মে যত্প্রভাষসে
বক্ষ্যামি তদশেষেণ রোহিণ্যো নির্মিতা যথা
76.11
প্রজাঃ সৃজেতি ব্যাদিষ্টঃ পূর্বং দক্ষঃ স্বয়ংভুবা
অসৃজদ্বৃত্তিমেবাগ্রে প্রজানাং হিতকাম্যয়া
76.12
যথা হ্যমৃতমাশ্রিত্য বর্তয়ন্তি দিবৌকসঃ
তথা বৃত্তিং সমাশ্রিত্য বর্তয়ন্তি প্রজা বিভো
76.13
অচরেভ্যশ্চ ভূতেভ্যশ্চরাঃ শ্রেষ্ঠাস্ততো নরাঃ
ব্রাহ্মণাশ্চ ততঃ শ্রেষ্ঠাস্তেষু যজ্ঞাঃ প্রতিষ্ঠিতাঃ
76.14
যজ্ঞৈরাপ্যায়তে সোমঃ স চ গোষু প্রতিষ্ঠিতঃ
সর্বে দেবাঃ প্রমোদন্তে পূর্ববৃত্তাস্ততঃ প্রজাঃ
76.15
এতান্যেব তু ভূতানি প্রাক্রোশন্বৃত্তিকাঙ্ক্ষয়া
বৃত্তিদং চান্বপদ্যন্ত তৃষিতাঃ পিতৃমাতৃবৎ
76.16
ইতীদং মনসা গত্বা প্রজাসর্গার্থমাত্মনঃ
প্রজাপতির্বলাধানমমৃতং প্রাপিবত্তদা
76.17
স গতস্তস্য তৃপ্তিং তু গন্ধং সুরভিমুদ্গিরন্
দদর্শোদ্গারসংবৃত্তাং সুরভিং মুখজাং সুতাম্
76.18
সাসৃজত্সৌরভেয়ীস্তু সুরভির্লোকমাতরঃ
সুবর্ণবর্ণাঃ কপিলাঃ প্রজানাং বৃত্তিধেনবঃ
76.19
তাসামমৃতবর্ণানাং ক্ষরন্তীনাং সমন্ততঃ
বভূবামৃতজঃ ফেনঃ স্রবন্তীনামিবোর্মিজঃ
76.20
স বত্সমুখবিভ্রষ্টো ভবস্য ভুবি তিষ্ঠতঃ
শিরস্যবাপ তত্ক্রুদ্ধঃ স তদোদৈক্ষত প্রভুঃ
ললাটপ্রভবেনাক্ষ্ণা রোহিণীঃ প্রদহন্নিব
76.21
তত্তেজস্তু ততো রৌদ্রং কপিলা গা বিশাং পতে
নানাবর্ণত্বমনয়ন্মেঘানিব দিবাকরঃ
76.22
যাস্তু তস্মাদপক্রম্য সোমমেবাভিসংশ্রিতাঃ
যথোত্পন্নাঃ স্ববর্ণস্থাস্তা নীতা নান্যবর্ণতাম্
76.23
অথ ক্রুদ্ধং মহাদেবং প্রজাপতিরভাষত
অমৃতেনাবসিক্তস্ত্বং নোচ্ছিষ্টং বিদ্যতে গবাম্
76.24
যথা হ্যমৃতমাদায় সোমো বিষ্যন্দতে পুনঃ
তথা ক্ষীরং ক্ষরন্ত্যেতা রোহিণ্যোঽমৃতসংভবাঃ
76.25
ন দুষ্যত্যনিলো নাগ্নির্ন সুবর্ণং ন চোদধিঃ
নামৃতেনামৃতং পীতং বত্সপীতা ন বত্সলা
76.26
ইমাঁল্লোকান্ভরিষ্যন্তি হবিষা প্রস্নবেন চ
আসামৈশ্বর্যমশ্নীহি সর্বামৃতময়ং শুভম্
76.27
বৃষভং চ দদৌ তস্মৈ সহ তাভিঃ প্রজাপতিঃ
প্রসাদয়ামাস মনস্তেন রুদ্রস্য ভারত
76.28
প্রীতশ্চাপি মহাদেবশ্চকার বৃষভং তদা
ধ্বজং চ বাহনং চৈব তস্মাত্স বৃষভধ্বজঃ
76.29
ততো দেবৈর্মহাদেবস্তদা পশুপতিঃ কৃতঃ
ঈশ্বরঃ স গবাং মধ্যে বৃষাঙ্ক ইতি চোচ্যতে
76.30
এবমব্যগ্রবর্ণানাং কপিলানাং মহৌজসাম্
প্রদানে প্রথমঃ কল্পঃ সর্বাসামেব কীর্তিতঃ
76.31
লোকজ্যেষ্ঠা লোকবৃত্তিপ্রবৃত্তা; রুদ্রোপেতাঃ সোমবিষ্যন্দভূতাঃ
সৌম্যাঃ পুণ্যাঃ কামদাঃ প্রাণদাশ্চ; গা বৈ দত্ত্বা সর্বকামপ্রদঃ স্যাৎ
76.32
ইমং গবাং প্রভববিধানমুত্তমং; পঠন্সদা শুচিরতিমঙ্গলপ্রিয়ঃ
বিমুচ্যতে কলিকলুষেণ মানবঃ; প্রিয়ং সুতান্পশুধনমাপ্নুয়াত্তথা
76.33
হব্যং কব্যং তর্পণং শান্তিকর্ম; যানং বাসো বৃদ্ধবালস্য পুষ্টিম্
এতান্সর্বান্গোপ্রদানে গুণান্বৈ; দাতা রাজন্নাপ্নুয়াদ্বৈ সদৈব
76.34
বৈশংপায়ন উবাচ
পিতামহস্যাথ নিশম্য বাক্যং; রাজা সহ ভ্রাতৃভিরাজমীঢঃ
সৌবর্ণকাংস্যোপদুহাস্ততো গাঃ; পার্থো দদৌ ব্রাহ্মণসত্তমেভ্যঃ
76.35
তথৈব তেভ্যোঽভিদদৌ দ্বিজেভ্যো; গবাং সহস্রাণি শতানি চৈব
যজ্ঞান্সমুদ্দিশ্য চ দক্ষিণার্থে; লোকান্বিজেতুং পরমাং চ কীর্তিম্