অধ্যায় 77

77.1

ভীষ্ম উবাচ
এতস্মিন্নেব কালে তু বসিষ্ঠমৃষিসত্তমম্
ইক্ষ্বাকুবংশজো রাজা সৌদাসো দদতাং বরঃ

77.2

সর্বলোকচরং সিদ্ধং ব্রহ্মকোশং সনাতনম্
পুরোহিতমিদং প্রষ্টুমভিবাদ্যোপচক্রমে

77.3

সৌদাস উবাচ
ত্রৈলোক্যে ভগবন্কিং স্বিত্পবিত্রং কথ্যতেঽনঘ
যত্কীর্তয়ন্সদা মর্ত্যঃ প্রাপ্নুয়াত্পুণ্যমুত্তমম্

77.4

ভীষ্ম উবাচ
তস্মৈ প্রোবাচ বচনং প্রণতায় হিতং তদা
গবামুপনিষদ্বিদ্বান্নমস্কৃত্য গবাং শুচিঃ

77.5

গাবঃ সুরভিগন্ধিন্যস্তথা গুগ্গুলুগন্ধিকাঃ
গাবঃ প্রতিষ্ঠা ভূতানাং গাবঃ স্বস্ত্যয়নং মহৎ

77.6

গাবো ভূতং ভবিষ্যচ্চ গাবঃ পুষ্টিঃ সনাতনী
গাবো লক্ষ্ম্যাস্তথা মূলং গোষু দত্তং ন নশ্যতি
অন্নং হি সততং গাবো দেবানাং পরমং হবিঃ

77.7

স্বাহাকারবষট্কারৌ গোষু নিত্যং প্রতিষ্ঠিতৌ
গাবো যজ্ঞস্য হি ফলং গোষু যজ্ঞাঃ প্রতিষ্ঠিতাঃ

77.8

সায়ং প্রাতশ্চ সততং হোমকালে মহামতে
গাবো দদতি বৈ হোম্যমৃষিভ্যঃ পুরুষর্ষভ

77.9

কানিচিদ্যানি দুর্গাণি দুষ্কৃতানি কৃতানি চ
তরন্তি চৈব পাপ্মানং ধেনুং যে দদতি প্রভো

77.10

একাং চ দশগুর্দদ্যাদ্দশ দদ্যাচ্চ গোশতী
শতং সহস্রগুর্দদ্যাত্সর্বে তুল্যফলা হি তে

77.11

অনাহিতাগ্নিঃ শতগুরয়জ্বা চ সহস্রগুঃ
সমৃদ্ধো যশ্চ কীনাশো নার্ঘ্যমর্হন্তি তে ত্রয়ঃ

77.12

কপিলাং যে প্রয়চ্ছন্তি সবত্সাং কাংস্যদোহনাম্
সুব্রতাং বস্ত্রসংবীতামুভৌ লোকৌ জয়ন্তি তে

77.13

যুবানমিন্দ্রিয়োপেতং শতেন সহ যূথপম্
গবেন্দ্রং ব্রাহ্মণেন্দ্রায় ভূরিশৃঙ্গমলংকৃতম্

77.14

বৃষভং যে প্রয়চ্ছন্তি শ্রোত্রিয়ায় পরংতপ
ঐশ্বর্যং তেঽভিজায়ন্তে জায়মানাঃ পুনঃ পুনঃ

77.15

নাকীর্তয়িত্বা গাঃ সুপ্যান্নাস্মৃত্য পুনরুত্পতেৎ
সায়ং প্রাতর্নমস্যেচ্চ গাস্ততঃ পুষ্টিমাপ্নুয়াৎ

77.16

গবাং মূত্রপুরীষস্য নোদ্বিজেত কদাচন
ন চাসাং মাংসমশ্নীয়াদ্গবাং ব্যুষ্টিং তথাশ্নুতে

77.17

গাশ্চ সংকীর্তয়েন্নিত্যং নাবমন্যেত গাস্তথা
অনিষ্টং স্বপ্নমালক্ষ্য গাং নরঃ সংপ্রকীর্তয়েৎ

77.18

গোময়েন সদা স্নায়াদ্গোকরীষে চ সংবিশেৎ
শ্লেষ্মমূত্রপুরীষাণি প্রতিঘাতং চ বর্জয়েৎ

77.19

সার্দ্রচর্মণি ভুঞ্জীত নিরীক্ষন্বারুণীং দিশম্
বাগ্যতঃ সর্পিষা ভূমৌ গবাং ব্যুষ্টিং তথাশ্নুতে

77.20

ঘৃতেন জুহুয়াদগ্নিং ঘৃতেন স্বস্তি বাচয়েৎ
ঘৃতং দদ্যাদ্ঘৃতং প্রাশেদ্গবাং ব্যুষ্টিং তথাশ্নুতে

77.21

গোমত্যা বিদ্যয়া ধেনুং তিলানামভিমন্ত্র্য যঃ
রসরত্নময়ীং দদ্যান্ন স শোচেত্কৃতাকৃতে

77.22

গাবো মামুপতিষ্ঠন্তু হেমশৃঙ্গাঃ পয়োমুচঃ
সুরভ্যঃ সৌরভেয়াশ্চ সরিতঃ সাগরং যথা

77.23

গাবঃ পশ্যন্তু মাং নিত্যং গাবঃ পশ্যাম্যহং তদা
গাবোঽস্মাকং বয়ং তাসাং যতো গাবস্ততো বয়ম্

77.24

এবং রাত্রৌ দিবা চৈব সমেষু বিষমেষু চ
মহাভয়েষু চ নরঃ কীর্তয়ন্মুচ্যতে ভয়াৎ

Contains text from DharmicData, made available under the Open Database License (ODbL). Simple meanings are written by AI and can contain mistakes.