Utshovঅধ্যায় 78
78.1
বসিষ্ঠ উবাচ
শতং বর্ষসহস্রাণাং তপস্তপ্তং সুদুশ্চরম্
গোভিঃ পূর্ববিসৃষ্টাভির্গচ্ছেম শ্রেষ্ঠতামিতি
78.2
লোকেঽস্মিন্দক্ষিণানাং চ সর্বাসাং বয়মুত্তমাঃ
ভবেম ন চ লিপ্যেম দোষেণেতি পরংতপ
78.3
স এব চেতসা তেন হতো লিপ্যেত সর্বদা
শকৃতা চ পবিত্রার্থং কুর্বীরন্দেবমানুষাঃ
78.4
তথা সর্বাণি ভূতানি স্থাবরাণি চরাণি চ
প্রদাতারশ্চ গোলোকান্গচ্ছেয়ুরিতি মানদ
78.5
তাভ্যো বরং দদৌ ব্রহ্মা তপসোঽন্তে স্বয়ং প্রভুঃ
এবং ভবত্বিতি বিভুর্লোকাংস্তারয়তেতি চ
78.6
উত্তস্থুঃ সিদ্ধিকামাস্তা ভূতভব্যস্য মাতরঃ
তপসোঽন্তে মহারাজ গাবো লোকপরায়ণাঃ
78.7
তস্মাদ্গাবো মহাভাগাঃ পবিত্রং পরমুচ্যতে
তথৈব সর্বভূতানাং গাবস্তিষ্ঠন্তি মূর্ধনি
78.8
সমানবত্সাং কপিলাং ধেনুং দত্ত্বা পয়স্বিনীম্
সুব্রতাং বস্ত্রসংবীতাং ব্রহ্মলোকে মহীয়তে
78.9
রোহিণীং তুল্যবত্সাং তু ধেনুং দত্ত্বা পয়স্বিনীম্
সুব্রতাং বস্ত্রসংবীতাং সূর্যলোকে মহীয়তে
78.10
সমানবত্সাং শবলাং ধেনুং দত্ত্বা পয়স্বিনীম্
সুব্রতাং বস্ত্রসংবীতাং সোমলোকে মহীয়তে
78.11
সমানবত্সাং শ্বেতাং তু ধেনুং দত্ত্বা পয়স্বিনীম্
সুব্রতাং বস্ত্রসংবীতামিন্দ্রলোকে মহীয়তে
78.12
সমানবত্সাং কৃষ্ণাং তু ধেনুং দত্ত্বা পয়স্বিনীম্
সুব্রতাং বস্ত্রসংবীতামগ্নিলোকে মহীয়তে
78.13
সমানবত্সাং ধূম্রাং তু ধেনুং দত্ত্বা পয়স্বিনীম্
সুব্রতাং বস্ত্রসংবীতাং যাম্যলোকে মহীয়তে
78.14
অপাং ফেনসবর্ণাং তু সবত্সাং কাংস্যদোহনাম্
প্রদায় বস্ত্রসংবীতাং বারুণং লোকমশ্নুতে
78.15
বাতরেণুসবর্ণাং তু সবত্সাং কাংস্যদোহনাম্
প্রদায় বস্ত্রসংবীতাং বায়ুলোকে মহীয়তে
78.16
হিরণ্যবর্ণাং পিঙ্গাক্ষীং সবত্সাং কাংস্যদোহনাম্
প্রদায় বস্ত্রসংবীতাং কৌবেরং লোকমশ্নুতে
78.17
পলালধূম্রবর্ণাং তু সবত্সাং কাংস্যদোহনাম্
প্রদায় বস্ত্রসংবীতাং পিতৃলোকে মহীয়তে
78.18
সবত্সাং পীবরীং দত্ত্বা শিতিকণ্ঠামলংকৃতাম্
বৈশ্বদেবমসংবাধং স্থানং শ্রেষ্ঠং প্রপদ্যতে
78.19
সমানবত্সাং গৌরীং তু ধেনুং দত্ত্বা পয়স্বিনীম্
সুব্রতাং বস্ত্রসংবীতাং বসূনাং লোকমশ্নুতে
78.20
পাণ্ডুকম্বলবর্ণাং তু সবত্সাং কাংস্যদোহনাম্
প্রদায় বস্ত্রসংবীতাং সাধ্যানাং লোকমশ্নুতে
78.21
বৈরাটপৃষ্ঠমুক্ষাণং সর্বরত্নৈরলংকৃতম্
প্রদায় মরুতাং লোকানজরান্প্রতিপদ্যতে
78.22
বত্সোপপন্নাং নীলাঙ্গাং সর্বরত্নসমন্বিতাম্
গন্ধর্বাপ্সরসাং লোকান্দত্ত্বা প্রাপ্নোতি মানবঃ
78.23
শিতিকণ্ঠমনড্বাহং সর্বরত্নৈরলংকৃতম্
দত্ত্বা প্রজাপতের্লোকান্বিশোকঃ প্রতিপদ্যতে
78.24
গোপ্রদানরতো যাতি ভিত্ত্বা জলদসংচয়ান্
বিমানেনার্কবর্ণেন দিবি রাজন্বিরাজতা
78.25
তং চারুবেষাঃ সুশ্রোণ্যঃ সহস্রং বরয়োষিতঃ
রময়ন্তি নরশ্রেষ্ঠ গোপ্রদানরতং নরম্
78.26
বীণানাং বল্লকীনাং চ নূপুরাণাং চ শিঞ্জিতৈঃ
হাসৈশ্চ হরিণাক্ষীণাং প্রসুপ্তঃ প্রতিবোধ্যতে
78.27
যাবন্তি লোমানি ভবন্তি ধেন্বা;স্তাবন্তি বর্ষাণি মহীয়তে সঃ
স্বর্গাচ্চ্যুতশ্চাপি ততো নৃলোকে; কুলে সমুত্পত্স্যতি গোমিনাং সঃ