অধ্যায় 79

79.1

বসিষ্ঠ উবাচ
ঘৃতক্ষীরপ্রদা গাবো ঘৃতয়োন্যো ঘৃতোদ্ভবাঃ
ঘৃতনদ্যো ঘৃতাবর্তাস্তা মে সন্তু সদা গৃহে

ঘৃতং মে হৃদয়ে নিত্যং ঘৃতং নাভ্যাং প্রতিষ্ঠিতম্
ঘৃতং সর্বেষু গাত্রেষু ঘৃতং মে মনসি স্থিতম্

গাবো মমাগ্রতো নিত্যং গাবঃ পৃষ্ঠত এব চ
গাবো মে সর্বতশ্চৈব গবাং মধ্যে বসাম্যহম্

ইত্যাচম্য জপেত্সায়ং প্রাতশ্চ পুরুষঃ সদা
যদহ্না কুরুতে পাপং তস্মাত্স পরিমুচ্যতে

প্রাসাদা যত্র সৌবর্ণা বসোর্ধারা চ যত্র সা
গন্ধর্বাপ্সরসো যত্র তত্র যান্তি সহস্রদাঃ

নবনীতপঙ্কাঃ ক্ষীরোদা দধিশৈবলসংকুলাঃ
বহন্তি যত্র নদ্যো বৈ তত্র যান্তি সহস্রদাঃ

গবাং শতসহস্রং তু যঃ প্রয়চ্ছেদ্যথাবিধি
পরামৃদ্ধিমবাপ্যাথ স গোলোকে মহীয়তে

দশ চোভয়তঃ প্রেত্য মাতাপিত্রোঃ পিতামহান্
দধাতি সুকৃতাঁল্লোকান্পুনাতি চ কুলং নরঃ

ধেন্বাঃ প্রমাণেন সমপ্রমাণাং; ধেনুং তিলানামপি চ প্রদায়
পানীয়দাতা চ যমস্য লোকে; ন যাতনাং কাংচিদুপৈতি তত্র

পবিত্রমগ্র্যং জগতঃ প্রতিষ্ঠা; দিবৌকসাং মাতরোঽথাপ্রমেয়াঃ
অন্বালভেদ্দক্ষিণতো ব্রজেচ্চ; দদ্যাচ্চ পাত্রে প্রসমীক্ষ্য কালম্

ধেনুং সবত্সাং কপিলাং ভূরিশৃঙ্গাং; কাংস্যোপদোহাং বসনোত্তরীয়াম্
প্রদায় তাং গাহতি দুর্বিগাহ্যাং; যাম্যাং সভাং বীতভয়ো মনুষ্যঃ

সুরূপা বহুরূপাশ্চ বিশ্বরূপাশ্চ মাতরঃ
গাবো মামুপতিষ্ঠন্তামিতি নিত্যং প্রকীর্তয়েৎ

নাতঃ পুণ্যতরং দানং নাতঃ পুণ্যতরং ফলম্
নাতো বিশিষ্টং লোকেষু ভূতং ভবিতুমর্হতি

ত্বচা লোম্নাথ শৃঙ্গৈশ্চ বালৈঃ ক্ষীরেণ মেদসা
যজ্ঞং বহন্তি সংভূয় কিমস্ত্যভ্যধিকং ততঃ

যয়া সর্বমিদং ব্যাপ্তং জগত্স্থাবরজঙ্গমম্
তাং ধেনুং শিরসা বন্দে ভূতভব্যস্য মাতরম্

গুণবচনসমুচ্চয়ৈকদেশো; নৃবর ময়ৈষ গবাং প্রকীর্তিতস্তে
ন হি পরমিহ দানমস্তি গোভ্যো; ভবন্তি ন চাপি পরায়ণং তথান্যৎ

ভীষ্ম উবাচ
পরমিদমিতি ভূমিপো বিচিন্ত্য; প্রবরমৃষের্বচনং ততো মহাত্মা
ব্যসৃজত নিয়তাত্মবান্দ্বিজেভ্যঃ; সুবহু চ গোধনমাপ্তবাংশ্চ লোকান্