Utshovঅধ্যায় 80
80.1
যুধিষ্ঠির উবাচ
পবিত্রাণাং পবিত্রং যচ্ছ্রেষ্ঠং লোকে চ যদ্ভবেৎ
পাবনং পরমং চৈব তন্মে ব্রূহি পিতামহ
80.2
ভীষ্ম উবাচ
গাবো মহার্থাঃ পুণ্যাশ্চ তারয়ন্তি চ মানবান্
ধারয়ন্তি প্রজাশ্চেমাঃ পয়সা হবিষা তথা
80.3
ন হি পুণ্যতমং কিংচিদ্গোভ্যো ভরতসত্তম
এতাঃ পবিত্রাঃ পুণ্যাশ্চ ত্রিষু লোকেষ্বনুত্তমাঃ
80.4
দেবানামুপরিষ্টাচ্চ গাবঃ প্রতিবসন্তি বৈ
দত্ত্বা চৈতা নরপতে যান্তি স্বর্গং মনীষিণঃ
80.5
মান্ধাতা যৌবনাশ্বশ্চ যয়াতির্নহুষস্তথা
গাবো দদন্তঃ সততং সহস্রশতসংমিতাঃ
গতাঃ পরমকং স্থানং দেবৈরপি সুদুর্লভম্
80.6
অপি চাত্র পুরাবৃত্তং কথয়িষ্যামি তেঽনঘ
80.7
ঋষীণামুত্তমং ধীমান্কৃষ্ণদ্বৈপায়নং শুকঃ
অভিবাদ্যাহ্নিকং কৃত্বা শুচিঃ প্রয়তমানসঃ
পিতরং পরিপপ্রচ্ছ দৃষ্টলোকপরাবরম্
80.8
কো যজ্ঞঃ সর্বয়জ্ঞানাং বরিষ্ঠ উপলক্ষ্যতে
কিং চ কৃত্বা পরং স্বর্গং প্রাপ্নুবন্তি মনীষিণঃ
80.9
কেন দেবাঃ পবিত্রেণ স্বর্গমশ্নন্তি বা বিভো
কিং চ যজ্ঞস্য যজ্ঞত্বং ক্ব চ যজ্ঞঃ প্রতিষ্ঠিতঃ
80.10
দানানামুত্তমং কিং চ কিং চ সত্রমতঃ পরম্
পবিত্রাণাং পবিত্রং চ যত্তদ্ব্রূহি মমানঘ
80.11
এতচ্ছ্রুত্বা তু বচনং ব্যাসঃ পরমধর্মবিৎ
পুত্রায়াকথয়ত্সর্বং তত্ত্বেন ভরতর্ষভ
80.12
ব্যাস উবাচ
গাবঃ প্রতিষ্ঠা ভূতানাং তথা গাবঃ পরায়ণম্
গাবঃ পুণ্যাঃ পবিত্রাশ্চ পাবনং ধর্ম এব চ
80.13
পূর্বমাসন্নশৃঙ্গা বৈ গাব ইত্যনুশুশ্রুমঃ
শৃঙ্গার্থে সমুপাসন্ত তাঃ কিল প্রভুমব্যয়ম্
80.14
ততো ব্রহ্মা তু গাঃ প্রায়মুপবিষ্টাঃ সমীক্ষ্য হ
ঈপ্সিতং প্রদদৌ তাভ্যো গোভ্যঃ প্রত্যেকশঃ প্রভুঃ
80.15
তাসাং শৃঙ্গাণ্যজায়ন্ত যস্যা যাদৃঙ্মনোগতম্
নানাবর্ণাঃ শৃঙ্গবন্ত্যস্তা ব্যরোচন্ত পুত্রক
80.16
ব্রহ্মণা বরদত্তাস্তা হব্যকব্যপ্রদাঃ শুভাঃ
পুণ্যাঃ পবিত্রাঃ সুভগা দিব্যসংস্থানলক্ষণাঃ
গাবস্তেজো মহদ্দিব্যং গবাং দানং প্রশস্যতে
80.17
যে চৈতাঃ সংপ্রয়চ্ছন্তি সাধবো বীতমত্সরাঃ
তে বৈ সুকৃতিনঃ প্রোক্তাঃ সর্বদানপ্রদাশ্চ তে
গবাং লোকং তথা পুণ্যমাপ্নুবন্তি চ তেঽনঘ
80.18
যত্র বৃক্ষা মধুফলা দিব্যপুষ্পফলোপগাঃ
পুষ্পাণি চ সুগন্ধীনি দিব্যানি দ্বিজসত্তম
80.19
সর্বা মণিময়ী ভূমিঃ সূক্ষ্মকাঞ্চনবালুকা
সর্বত্র সুখসংস্পর্শা নিষ্পঙ্কা নীরজা শুভা
80.20
রক্তোত্পলবনৈশ্চৈব মণিদণ্ডৈর্হিরণ্ময়ৈঃ
তরুণাদিত্যসংকাশৈর্ভান্তি তত্র জলাশয়াঃ
80.21
মহার্হমণিপত্রৈশ্চ কাঞ্চনপ্রভকেসরৈঃ
নীলোত্পলবিমিশ্রৈশ্চ সরোভির্বহুপঙ্কজৈঃ
80.22
করবীরবনৈঃ ফুল্লৈঃ সহস্রাবর্তসংবৃতৈঃ
সংতানকবনৈঃ ফুল্লৈর্বৃক্ষৈশ্চ সমলংকৃতাঃ
80.23
নির্মলাভিশ্চ মুক্তাভির্মণিভিশ্চ মহাধনৈঃ
উদ্ধূতপুলিনাস্তত্র জাতরূপৈশ্চ নিম্নগাঃ
80.24
সর্বরত্নময়ৈশ্চিত্রৈরবগাঢা নগোত্তমৈঃ
জাতরূপময়ৈশ্চান্যৈর্হুতাশনসমপ্রভৈঃ
80.25
সৌবর্ণগিরয়স্তত্র মণিরত্নশিলোচ্চয়াঃ
সর্বরত্নময়ৈর্ভান্তি শৃঙ্গৈশ্চারুভিরুচ্ছ্রিতৈঃ
80.26
নিত্যপুষ্পফলাস্তত্র নগাঃ পত্ররথাকুলাঃ
দিব্যগন্ধরসৈঃ পুষ্পৈঃ ফলৈশ্চ ভরতর্ষভ
80.27
রমন্তে পুণ্যকর্মাণস্তত্র নিত্যং যুধিষ্ঠির
সর্বকামসমৃদ্ধার্থা নিঃশোকা গতমন্যবঃ
80.28
বিমানেষু বিচিত্রেষু রমণীয়েষু ভারত
মোদন্তে পুণ্যকর্মাণো বিহরন্তো যশস্বিনঃ
80.29
উপক্রীডন্তি তান্রাজঞ্শুভাশ্চাপ্সরসাং গণাঃ
এতাঁল্লোকানবাপ্নোতি গাং দত্ত্বা বৈ যুধিষ্ঠির
80.30
যাসামধিপতিঃ পূষা মারুতো বলবান্বলী
ঐশ্বর্যে বরুণো রাজা তা মাং পান্তু যুগংধরাঃ
80.31
সুরূপা বহুরূপাশ্চ বিশ্বরূপাশ্চ মাতরঃ
প্রাজাপত্যা ইতি ব্রহ্মঞ্জপেন্নিত্যং যতব্রতঃ
80.32
গাস্তু শুশ্রূষতে যশ্চ সমন্বেতি চ সর্বশঃ
তস্মৈ তুষ্টাঃ প্রয়চ্ছন্তি বরানপি সুদুর্লভান্
80.33
ন দ্রুহ্যেন্মনসা চাপি গোষু তা হি সুখপ্রদাঃ
অর্চয়েত সদা চৈব নমস্কারৈশ্চ পূজয়েৎ
দান্তঃ প্রীতমনা নিত্যং গবাং ব্যুষ্টিং তথাশ্নুতে
80.34
যেন দেবাঃ পবিত্রেণ ভুঞ্জতে লোকমুত্তমম্
যত্পবিত্রং পবিত্রাণাং তদ্ঘৃতং শিরসা বহেৎ
80.35
ঘৃতেন জুহুয়াদগ্নিং ঘৃতেন স্বস্তি বাচয়েৎ
ঘৃতং প্রাশেদ্ঘৃতং দদ্যাদ্গবাং ব্যুষ্টিং তথাশ্নুতে
80.36
ত্র্যহমুষ্ণং পিবেন্মূত্রং ত্র্যহমুষ্ণং পিবেত্পয়ঃ
গবামুষ্ণং পয়ঃ পীত্বা ত্র্যহমুষ্ণং ঘৃতং পিবেৎ
ত্র্যহমুষ্ণং ঘৃতং পীত্বা বায়ুভক্ষো ভবেত্ত্র্যহম্
80.37
নির্হৃতৈশ্চ যবৈর্গোভির্মাসং প্রসৃতয়াবকঃ
ব্রহ্মহত্যাসমং পাপং সর্বমেতেন শুধ্যতি
80.38
পরাভবার্থং দৈত্যানাং দেবৈঃ শৌচমিদং কৃতম্
দেবত্বমপি চ প্রাপ্তাঃ সংসিদ্ধাশ্চ মহাবলাঃ
80.39
গাবঃ পবিত্রাঃ পুণ্যাশ্চ পাবনং পরমং মহৎ
তাশ্চ দত্ত্বা দ্বিজাতিভ্যো নরঃ স্বর্গমুপাশ্নুতে
80.40
গবাং মধ্যে শুচির্ভূত্বা গোমতীং মনসা জপেৎ
পূতাভিরদ্ভিরাচম্য শুচির্ভবতি নির্মলঃ
80.41
অগ্নিমধ্যে গবাং মধ্যে ব্রাহ্মণানাং চ সংসদি
বিদ্যাবেদব্রতস্নাতা ব্রাহ্মণাঃ পুণ্যকর্মিণঃ
80.42
অধ্যাপয়েরঞ্শিষ্যান্বৈ গোমতীং যজ্ঞসংমিতাম্
ত্রিরাত্রোপোষিতঃ শ্রুত্বা গোমতীং লভতে বরম্
80.43
পুত্রকামশ্চ লভতে পুত্রং ধনমথাপি চ
পতিকামা চ ভর্তারং সর্বকামাংশ্চ মানবঃ
গাবস্তুষ্টাঃ প্রয়চ্ছন্তি সেবিতা বৈ ন সংশয়ঃ
80.44
এবমেতা মহাভাগা যজ্ঞিয়াঃ সর্বকামদাঃ
রোহিণ্য ইতি জানীহি নৈতাভ্যো বিদ্যতে পরম্
80.45
ইত্যুক্তঃ স মহাতেজাঃ শুকঃ পিত্রা মহাত্মনা
পূজয়ামাস গা নিত্যং তস্মাত্ত্বমপি পূজয়