অধ্যায় 81

81.1

যুধিষ্ঠির উবাচ
ময়া গবাং পুরীষং বৈ শ্রিয়া জুষ্টমিতি শ্রুতম্
এতদিচ্ছাম্যহং শ্রোতুং সংশয়োঽত্র হি মে মহান্

81.2

ভীষ্ম উবাচ
অত্রাপ্যুদাহরন্তীমমিতিহাসং পুরাতনম্
গোভির্নৃপেহ সংবাদং শ্রিয়া ভরতসত্তম

81.3

শ্রীঃ কৃত্বেহ বপুঃ কান্তং গোমধ্যং প্রবিবেশ হ
গাবোঽথ বিস্মিতাস্তস্যা দৃষ্ট্বা রূপস্য সংপদম্

81.4

গাব ঊচুঃ
কাসি দেবি কুতো বা ত্বং রূপেণাপ্রতিমা ভুবি
বিস্মিতাঃ স্ম মহাভাগে তব রূপস্য সংপদা

81.5

ইচ্ছামস্ত্বাং বয়ং জ্ঞাতুং কা ত্বং ক্ব চ গমিষ্যসি
তত্ত্বেন চ সুবর্ণাভে সর্বমেতদ্ব্রবীহি নঃ

81.6

শ্রীরুবাচ
লোককান্তাস্মি ভদ্রং বঃ শ্রীর্নাম্নেহ পরিশ্রুতা
ময়া দৈত্যাঃ পরিত্যক্তা বিনষ্টাঃ শাশ্বতীঃ সমাঃ

81.7

ইন্দ্রো বিবস্বান্সোমশ্চ বিষ্ণুরাপোঽগ্নিরেব চ
ময়াভিপন্না ঋধ্যন্তে ঋষয়ো দেবতাস্তথা

81.8

যাংশ্চ দ্বিষাম্যহং গাবস্তে বিনশ্যন্তি সর্বশঃ
ধর্মার্থকামহীনাশ্চ তে ভবন্ত্যসুখান্বিতাঃ

81.9

এবংপ্রভাবাং মাং গাবো বিজানীত সুখপ্রদাম্
ইচ্ছামি চাপি যুষ্মাসু বস্তুং সর্বাসু নিত্যদা
আগতা প্রার্থয়ানাহং শ্রীজুষ্টা ভবতানঘাঃ

81.10

গাব ঊচুঃ
অধ্রুবাং চঞ্চলাং চ ত্বাং সামান্যাং বহুভিঃ সহ
ন ত্বামিচ্ছামি ভদ্রং তে গম্যতাং যত্র রোচতে

81.11

বপুষ্মন্ত্যো বয়ং সর্বাঃ কিমস্মাকং ত্বয়াদ্য বৈ
যত্রেষ্টং গম্যতাং তত্র কৃতকার্যা বয়ং ত্বয়া

81.12

শ্রীরুবাচ
কিমেতদ্বঃ ক্ষমং গাবো যন্মাং নেহাভ্যনন্দথ
ন মাং সংপ্রতি গৃহ্ণীথ কস্মাদ্বৈ দুর্লভাং সতীম্

81.13

সত্যশ্চ লোকবাদোঽয়ং লোকে চরতি সুব্রতাঃ
স্বয়ং প্রাপ্তে পরিভবো ভবতীতি বিনিশ্চয়ঃ

81.14

মহদুগ্রং তপঃ কৃত্বা মাং নিষেবন্তি মানবাঃ
দেবদানবগন্ধর্বাঃ পিশাচোরগরাক্ষসাঃ

81.15

ক্ষমমেতদ্ধি বো গাবঃ প্রতিগৃহ্ণীত মামিহ
নাবমন্যা হ্যহং সৌম্যাস্ত্রৈলোক্যে সচরাচরে

81.16

গাব ঊচুঃ
নাবমন্যামহে দেবি ন ত্বাং পরিভবামহে
অধ্রুবা চলচিত্তাসি ততস্ত্বাং বর্জয়ামহে

81.17

বহুনাত্র কিমুক্তেন গম্যতাং যত্র বাঞ্ছসি
বপুষ্মত্যো বয়ং সর্বাঃ কিমস্মাকং ত্বয়ানঘে

81.18

শ্রীরুবাচ
অবজ্ঞাতা ভবিষ্যামি সর্বলোকেষু মানদাঃ
প্রত্যাখ্যানেন যুষ্মাভিঃ প্রসাদঃ ক্রিয়তামিতি

81.19

মহাভাগা ভবত্যো বৈ শরণ্যাঃ শরণাগতাম্
পরিত্রায়ন্তু মাং নিত্যং ভজমানামনিন্দিতাম্
মাননাং ত্বহমিচ্ছামি ভবত্যঃ সততং শুভাঃ

81.20

অপ্যেকাঙ্গে তু বো বস্তুমিচ্ছামি চ সুকুত্সিতে
ন বোঽস্তি কুত্সিতং কিংচিদঙ্গেষ্বালক্ষ্যতেঽনঘাঃ

81.21

পুণ্যাঃ পবিত্রাঃ সুভগা মমাদেশং প্রয়চ্ছত
বসেয়ং যত্র চাঙ্গেঽহং তন্মে ব্যাখ্যাতুমর্হথ

81.22

ভীষ্ম উবাচ
এবমুক্তাস্তু তা গাবঃ শুভাঃ করুণবত্সলাঃ
সংমন্ত্র্য সহিতাঃ সর্বাঃ শ্রিয়মূচুর্নরাধিপ

81.23

অবশ্যং মাননা কার্যা তবাস্মাভির্যশস্বিনি
শকৃন্মূত্রে নিবস নঃ পুণ্যমেতদ্ধি নঃ শুভে

81.24

শ্রীরুবাচ
দিষ্ট্যা প্রসাদো যুষ্মাভিঃ কৃতো মেঽনুগ্রহাত্মকঃ
এবং ভবতু ভদ্রং বঃ পূজিতাস্মি সুখপ্রদাঃ

81.25

ভীষ্ম উবাচ
এবং কৃত্বা তু সময়ং শ্রীর্গোভিঃ সহ ভারত
পশ্যন্তীনাং ততস্তাসাং তত্রৈবান্তরধীয়ত

81.26

এতদ্গোশকৃতঃ পুত্র মাহাত্ম্যং তেঽনুবর্ণিতম্
মাহাত্ম্যং চ গবাং ভূয়ঃ শ্রূয়তাং গদতো মম

Contains text from DharmicData, made available under the Open Database License (ODbL). Simple meanings are written by AI and can contain mistakes.