Utshovঅধ্যায় 82
82.1
ভীষ্ম উবাচ
যে চ গাঃ সংপ্রয়চ্ছন্তি হুতশিষ্টাশিনশ্চ যে
তেষাং সত্রাণি যজ্ঞাশ্চ নিত্যমেব যুধিষ্ঠির
82.2
ঋতে দধিঘৃতেনেহ ন যজ্ঞঃ সংপ্রবর্ততে
তেন যজ্ঞস্য যজ্ঞত্বমতোমূলং চ লক্ষ্যতে
82.3
দানানামপি সর্বেষাং গবাং দানং প্রশস্যতে
গাবঃ শ্রেষ্ঠাঃ পবিত্রাশ্চ পাবনং হ্যেতদুত্তমম্
82.4
পুষ্ট্যর্থমেতাঃ সেবেত শান্ত্যর্থমপি চৈব হ
পয়ো দধি ঘৃতং যাসাং সর্বপাপপ্রমোচনম্
82.5
গাবস্তেজঃ পরং প্রোক্তমিহ লোকে পরত্র চ
ন গোভ্যঃ পরমং কিংচিত্পবিত্রং পুরুষর্ষভ
82.6
অত্রাপ্যুদাহরন্তীমমিতিহাসং পুরাতনম্
পিতামহস্য সংবাদমিন্দ্রস্য চ যুধিষ্ঠির
82.7
পরাভূতেষু দৈত্যেষু শক্রে ত্রিভুবনেশ্বরে
প্রজাঃ সমুদিতাঃ সর্বাঃ সত্যধর্মপরায়ণাঃ
82.8
অথর্ষয়ঃ সগন্ধর্বাঃ কিংনরোরগরাক্ষসাঃ
দেবাসুরসুপর্ণাশ্চ প্রজানাং পতয়স্তথা
পর্যুপাসন্ত কৌরব্য কদাচিদ্বৈ পিতামহম্
82.9
নারদঃ পর্বতশ্চৈব বিশ্বাবসুহহাহুহূ
দিব্যতানেষু গায়ন্তঃ পর্যুপাসন্ত তং প্রভুম্
82.10
তত্র দিব্যানি পুষ্পাণি প্রাবহত্পবনস্তথা
আজহ্রুরৃতবশ্চাপি সুগন্ধীনি পৃথক্পৃথক্
82.11
তস্মিন্দেবসমাবায়ে সর্বভূতসমাগমে
দিব্যবাদিত্রসংঘুষ্টে দিব্যস্ত্রীচারণাবৃতে
ইন্দ্রঃ পপ্রচ্ছ দেবেশমভিবাদ্য প্রণম্য চ
82.12
দেবানাং ভগবন্কস্মাল্লোকেশানাং পিতামহ
উপরিষ্টাদ্গবাং লোক এতদিচ্ছামি বেদিতুম্
82.13
কিং তপো ব্রহ্মচর্যং বা গোভিঃ কৃতমিহেশ্বর
দেবানামুপরিষ্টাদ্যদ্বসন্ত্যরজসঃ সুখম্
82.14
ততঃ প্রোবাচ তং ব্রহ্মা শক্রং বলনিসূদনম্
অবজ্ঞাতাস্ত্বয়া নিত্যং গাবো বলনিসূদন
82.15
তেন ত্বমাসাং মাহাত্ম্যং ন বেত্থ শৃণু তত্প্রভো
গবাং প্রভাবং পরমং মাহাত্ম্যং চ সুরর্ষভ
82.16
যজ্ঞাঙ্গং কথিতা গাবো যজ্ঞ এব চ বাসব
এতাভিশ্চাপ্যৃতে যজ্ঞো ন প্রবর্তেত্কথংচন
82.17
ধারয়ন্তি প্রজাশ্চৈব পয়সা হবিষা তথা
এতাসাং তনয়াশ্চাপি কৃষিয়োগমুপাসতে
82.18
জনয়ন্তি চ ধান্যানি বীজানি বিবিধানি চ
ততো যজ্ঞাঃ প্রবর্তন্তে হব্যং কব্যং চ সর্বশঃ
82.19
পয়ো দধি ঘৃতং চৈব পুণ্যাশ্চৈতাঃ সুরাধিপ
বহন্তি বিবিধান্ভারান্ক্ষুত্তৃষ্ণাপরিপীডিতাঃ
82.20
মুনীংশ্চ ধারয়ন্তীহ প্রজাশ্চৈবাপি কর্মণা
বাসবাকূটবাহিন্যঃ কর্মণা সুকৃতেন চ
উপরিষ্টাত্ততোঽস্মাকং বসন্ত্যেতাঃ সদৈব হি
82.21
এতত্তে কারণং শক্র নিবাসকৃতমদ্য বৈ
গবাং দেবোপরিষ্টাদ্ধি সমাখ্যাতং শতক্রতো
82.22
এতা হি বরদত্তাশ্চ বরদাশ্চৈব বাসব
সৌরভ্যঃ পুণ্যকর্মিণ্যঃ পাবনাঃ শুভলক্ষণাঃ
82.23
যদর্থং গা গতাশ্চৈব সৌরভ্যঃ সুরসত্তম
তচ্চ মে শৃণু কার্ত্স্ন্যেন বদতো বলসূদন
82.24
পুরা দেবয়ুগে তাত দৈত্যেন্দ্রেষু মহাত্মসু
ত্রীঁল্লোকাননুশাসত্সু বিষ্ণৌ গর্ভত্বমাগতে
82.25
অদিত্যাস্তপ্যমানায়াস্তপো ঘোরং সুদুশ্চরম্
পুত্রার্থমমরশ্রেষ্ঠ পাদেনৈকেন নিত্যদা
82.26
তাং তু দৃষ্ট্বা মহাদেবীং তপ্যমানাং মহত্তপঃ
দক্ষস্য দুহিতা দেবী সুরভির্নাম নামতঃ
82.27
অতপ্যত তপো ঘোরং হৃষ্টা ধর্মপরায়ণা
কৈলাসশিখরে রম্যে দেবগন্ধর্বসেবিতে
82.28
ব্যতিষ্ঠদেকপাদেন পরমং যোগমাস্থিতা
দশ বর্ষসহস্রাণি দশ বর্ষশতানি চ
82.29
সংতপ্তাস্তপসা তস্যা দেবাঃ সর্ষিমহোরগাঃ
তত্র গত্বা ময়া সার্ধং পর্যুপাসন্ত তাং শুভাম্
82.30
অথাহমব্রুবং তত্র দেবীং তাং তপসান্বিতাম্
কিমর্থং তপ্যতে দেবি তপো ঘোরমনিন্দিতে
82.31
প্রীতস্তেঽহং মহাভাগে তপসানেন শোভনে
বরয়স্ব বরং দেবি দাতাস্মীতি পুরংদর
82.32
সুরভ্যুবাচ
বরেণ ভগবন্মহ্যং কৃতং লোকপিতামহ
এষ এব বরো মেঽদ্য যত্প্রীতোঽসি মমানঘ
82.33
ব্রহ্মোবাচ
তামেবং ব্রুবতীং দেবীং সুরভীং ত্রিদশেশ্বর
প্রত্যব্রুবং যদ্দেবেন্দ্র তন্নিবোধ শচীপতে
82.34
অলোভকাম্যয়া দেবি তপসা চ শুভেন তে
প্রসন্নোঽহং বরং তস্মাদমরত্বং দদানি তে
82.35
ত্রয়াণামপি লোকানামুপরিষ্টান্নিবত্স্যসি
মত্প্রসাদাচ্চ বিখ্যাতো গোলোকঃ স ভবিষ্যতি
82.36
মানুষেষু চ কুর্বাণাঃ প্রজাঃ কর্ম সুতাস্তব
নিবত্স্যন্তি মহাভাগে সর্বা দুহিতরশ্চ তে
82.37
মনসা চিন্তিতা ভোগাস্ত্বয়া বৈ দিব্যমানুষাঃ
যচ্চ স্বর্গসুখং দেবি তত্তে সংপত্স্যতে শুভে
82.38
তস্যা লোকাঃ সহস্রাক্ষ সর্বকামসমন্বিতাঃ
ন তত্র ক্রমতে মৃত্যুর্ন জরা ন চ পাবকঃ
ন দৈন্যং নাশুভং কিংচিদ্বিদ্যতে তত্র বাসব
82.39
তত্র দিব্যান্যরণ্যানি দিব্যানি ভবনানি চ
বিমানানি চ যুক্তানি কামগানি চ বাসব
82.40
ব্রতৈশ্চ বিবিধৈঃ পুণ্যৈস্তথা তীর্থানুসেবনাৎ
তপসা মহতা চৈব সুকৃতেন চ কর্মণা
শক্যঃ সমাসাদয়িতুং গোলোকঃ পুষ্করেক্ষণ
82.41
এতত্তে সর্বমাখ্যাতং ময়া শক্রানুপৃচ্ছতে
ন তে পরিভবঃ কার্যো গবামরিনিসূদন
82.42
ভীষ্ম উবাচ
এতচ্ছ্রুত্বা সহস্রাক্ষঃ পূজয়ামাস নিত্যদা
গাশ্চক্রে বহুমানং চ তাসু নিত্যং যুধিষ্ঠির
82.43
এতত্তে সর্বমাখ্যাতং পাবনং চ মহাদ্যুতে
পবিত্রং পরমং চাপি গবাং মাহাত্ম্যমুত্তমম্
কীর্তিতং পুরুষব্যাঘ্র সর্বপাপবিনাশনম্
82.44
য ইদং কথয়েন্নিত্যং ব্রাহ্মণেভ্যঃ সমাহিতঃ
হব্যকব্যেষু যজ্ঞেষু পিতৃকার্যেষু চৈব হ
সার্বকামিকমক্ষয্যং পিতৄংস্তস্যোপতিষ্ঠতি
82.45
গোষু ভক্তশ্চ লভতে যদ্যদিচ্ছতি মানবঃ
স্ত্রিয়োঽপি ভক্তা যা গোষু তাশ্চ কামানবাপ্নুয়ুঃ
82.46
পুত্রার্থী লভতে পুত্রং কন্যা পতিমবাপ্নুয়াৎ
ধনার্থী লভতে বিত্তং ধর্মার্থী ধর্মমাপ্নুয়াৎ
82.47
বিদ্যার্থী প্রাপ্নুয়াদ্বিদ্যাং সুখার্থী প্রাপ্নুয়াত্সুখম্
ন কিংচিদ্দুর্লভং চৈব গবাং ভক্তস্য ভারত