Utshovঅধ্যায় 83
83.1
যুধিষ্ঠির উবাচ
উক্তং পিতামহেনেদং গবাং দানমনুত্তমম্
বিশেষেণ নরেন্দ্রাণামিতি ধর্মমবেক্ষতাম্
83.2
রাজ্যং হি সততং দুঃখমাশ্রমাশ্চ সুদুর্বিদাঃ
পরিবারেণ বৈ দুঃখং দুর্ধরং চাকৃতাত্মভিঃ
ভূয়িষ্ঠং চ নরেন্দ্রাণাং বিদ্যতে ন শুভা গতিঃ
83.3
পূয়ন্তে তেঽত্র নিয়তং প্রয়চ্ছন্তো বসুংধরাম্
পূর্বং চ কথিতা ধর্মাস্ত্বয়া মে কুরুনন্দন
83.4
এবমেব গবামুক্তং প্রদানং তে নৃগেণ হ
ঋষিণা নাচিকেতেন পূর্বমেব নিদর্শিতম্
83.5
বেদোপনিষদে চৈব সর্বকর্মসু দক্ষিণা
সর্বক্রতুষু চোদ্দিষ্টং ভূমির্গাবোঽথ কাঞ্চনম্
83.6
তত্র শ্রুতিস্তু পরমা সুবর্ণং দক্ষিণেতি বৈ
এতদিচ্ছাম্যহং শ্রোতুং পিতামহ যথাতথম্
83.7
কিং সুবর্ণং কথং জাতং কস্মিন্কালে কিমাত্মকম্
কিং দানং কিং ফলং চৈব কস্মাচ্চ পরমুচ্যতে
83.8
কস্মাদ্দানং সুবর্ণস্য পূজয়ন্তি মনীষিণঃ
কস্মাচ্চ দক্ষিণার্থং তদ্যজ্ঞকর্মসু শস্যতে
83.9
কস্মাচ্চ পাবনং শ্রেষ্ঠং ভূমের্গোভ্যশ্চ কাঞ্চনম্
পরমং দক্ষিণার্থে চ তদ্ব্রবীহি পিতামহ
83.10
ভীষ্ম উবাচ
শৃণু রাজন্নবহিতো বহুকারণবিস্তরম্
জাতরূপসমুত্পত্তিমনুভূতং চ যন্ময়া
83.11
পিতা মম মহাতেজাঃ শংতনুর্নিধনং গতঃ
তস্য দিত্সুরহং শ্রাদ্ধং গঙ্গাদ্বারমুপাগমম্
83.12
তত্রাগম্য পিতুঃ পুত্র শ্রাদ্ধকর্ম সমারভম্
মাতা মে জাহ্নবী চৈব সাহায্যমকরোত্তদা
83.13
ততোঽগ্রতস্তপঃসিদ্ধানুপবেশ্য বহূনৃষীন্
তোয়প্রদানাত্প্রভৃতি কার্যাণ্যহমথারভম্
83.14
তত্সমাপ্য যথোদ্দিষ্টং পূর্বকর্ম সমাহিতঃ
দাতুং নির্বপণং সম্যগ্যথাবদহমারভম্
83.15
ততস্তং দর্ভবিন্যাসং ভিত্ত্বা সুরুচিরাঙ্গদঃ
প্রলম্বাভরণো বাহুরুদতিষ্ঠদ্বিশাং পতে
83.16
তমুত্থিতমহং দৃষ্ট্বা পরং বিস্ময়মাগমম্
প্রতিগ্রহীতা সাক্ষান্মে পিতেতি ভরতর্ষভ
83.17
ততো মে পুনরেবাসীত্সংজ্ঞা সংচিন্ত্য শাস্ত্রতঃ
নায়ং বেদেষু বিহিতো বিধির্হস্ত ইতি প্রভো
পিণ্ডো দেয়ো নরেণেহ ততো মতিরভূন্মম
83.18
সাক্ষান্নেহ মনুষ্যস্য পিতরোঽন্তর্হিতাঃ ক্বচিৎ
গৃহ্ণন্তি বিহিতং ত্বেবং পিণ্ডো দেয়ঃ কুশেষ্বিতি
83.19
ততোঽহং তদনাদৃত্য পিতুর্হস্তনিদর্শনম্
শাস্ত্রপ্রমাণাত্সূক্ষ্মং তু বিধিং পার্থিব সংস্মরন্
83.20
ততো দর্ভেষু তত্সর্বমদদং ভরতর্ষভ
শাস্ত্রমার্গানুসারেণ তদ্বিদ্ধি মনুজর্ষভ
83.21
ততঃ সোঽন্তর্হিতো বাহুঃ পিতুর্মম নরাধিপ
ততো মাং দর্শয়ামাসুঃ স্বপ্নান্তে পিতরস্তদা
83.22
প্রীয়মাণাস্তু মামূচুঃ প্রীতাঃ স্ম ভরতর্ষভ
বিজ্ঞানেন তবানেন যন্ন মুহ্যসি ধর্মতঃ
83.23
ত্বয়া হি কুর্বতা শাস্ত্রং প্রমাণমিহ পার্থিব
আত্মা ধর্মঃ শ্রুতং বেদাঃ পিতরশ্চ মহর্ষিভিঃ
83.24
সাক্ষাত্পিতামহো ব্রহ্মা গুরবোঽথ প্রজাপতিঃ
প্রমাণমুপনীতা বৈ স্থিতিশ্চ ন বিচালিতা
83.25
তদিদং সম্যগারব্ধং ত্বয়াদ্য ভরতর্ষভ
কিং তু ভূমের্গবাং চার্থে সুবর্ণং দীয়তামিতি
83.26
এবং বয়ং চ ধর্মশ্চ সর্বে চাস্মত্পিতামহাঃ
পাবিতা বৈ ভবিষ্যন্তি পাবনং পরমং হি তৎ
83.27
দশ পূর্বান্দশ পরাংস্তথা সংতারয়ন্তি তে
সুবর্ণং যে প্রয়চ্ছন্তি এবং মে পিতরোঽব্রুবন্
83.28
ততোঽহং বিস্মিতো রাজন্প্রতিবুদ্ধো বিশাং পতে
সুবর্ণদানেঽকরবং মতিং ভরতসত্তম
83.29
ইতিহাসমিমং চাপি শৃণু রাজন্পুরাতনম্
জামদগ্ন্যং প্রতি বিভো ধন্যমায়ুষ্যমেব চ
83.30
জামদগ্ন্যেন রামেণ তীব্ররোষান্বিতেন বৈ
ত্রিঃসপ্তকৃত্বঃ পৃথিবী কৃতা নিঃক্ষত্রিয়া পুরা
83.31
ততো জিত্বা মহীং কৃত্স্নাং রামো রাজীবলোচনঃ
আজহার ক্রতুং বীরো ব্রহ্মক্ষত্রেণ পূজিতম্
83.32
বাজিমেধং মহারাজ সর্বকামসমন্বিতম্
পাবনং সর্বভূতানাং তেজোদ্যুতিবিবর্ধনম্
83.33
বিপাপ্মাপি স তেজস্বী তেন ক্রতুফলেন বৈ
নৈবাত্মনোঽথ লঘুতাং জামদগ্ন্যোঽভ্যগচ্ছত
83.34
স তু ক্রতুবরেণেষ্ট্বা মহাত্মা দক্ষিণাবতা
পপ্রচ্ছাগমসংপন্নানৃষীন্দেবাংশ্চ ভার্গবঃ
83.35
পাবনং যত্পরং নৄণামুগ্রে কর্মণি বর্ততাম্
তদুচ্যতাং মহাভাগা ইতি জাতঘৃণোঽব্রবীৎ
83.36
বসিষ্ঠ উবাচ
দেবতাস্তে প্রয়চ্ছন্তি সুবর্ণং যে দদত্যুত
অগ্নির্হি দেবতাঃ সর্বাঃ সুবর্ণং চ তদাত্মকম্
83.37
তস্মাত্সুবর্ণং দদতা দত্তাঃ সর্বাশ্চ দেবতাঃ
ভবন্তি পুরুষব্যাঘ্র ন হ্যতঃ পরমং বিদুঃ
83.38
ভূয় এব চ মাহাত্ম্যং সুবর্ণস্য নিবোধ মে
গদতো মম বিপ্রর্ষে সর্বশস্ত্রভৃতাং বর
83.39
ময়া শ্রুতমিদং পূর্বং পুরাণে ভৃগুনন্দন
প্রজাপতেঃ কথয়তো মনোঃ স্বায়ংভুবস্য বৈ
83.40
শূলপাণের্ভগবতো রুদ্রস্য চ মহাত্মনঃ
গিরৌ হিমবতি শ্রেষ্ঠে তদা ভৃগুকুলোদ্বহ
83.41
দেব্যা বিবাহে নির্বৃত্তে রুদ্রাণ্যা ভৃগুনন্দন
সমাগমে ভগবতো দেব্যা সহ মহাত্মনঃ
ততঃ সর্বে সমুদ্বিগ্না ভগবন্তমুপাগমন্
83.42
তে মহাদেবমাসীনং দেবীং চ বরদামুমাম্
প্রসাদ্য শিরসা সর্বে রুদ্রমূচুর্ভৃগূদ্বহ
83.43
অয়ং সমাগমো দেব দেব্যা সহ তবানঘ
তপস্বিনস্তপস্বিন্যা তেজস্বিন্যাতিতেজসঃ
অমোঘতেজাস্ত্বং দেব দেবী চেয়মুমা তথা
83.44
অপত্যং যুবয়োর্দেব বলবদ্ভবিতা প্রভো
তন্নূনং ত্রিষু লোকেষু ন কিংচিচ্ছেষয়িষ্যতি
83.45
তদেভ্যঃ প্রণতেভ্যস্ত্বং দেবেভ্যঃ পৃথুলোচন
বরং প্রয়চ্ছ লোকেশ ত্রৈলোক্যহিতকাম্যয়া
অপত্যার্থং নিগৃহ্ণীষ্ব তেজো জ্বলিতমুত্তমম্
83.46
ইতি তেষাং কথয়তাং ভগবান্গোবৃষধ্বজঃ
এবমস্ত্বিতি দেবাংস্তান্বিপ্রর্ষে প্রত্যভাষত
83.47
ইত্যুক্ত্বা চোর্ধ্বমনয়ত্তদ্রেতো বৃষবাহনঃ
ঊর্ধ্বরেতাঃ সমভবত্ততঃপ্রভৃতি চাপি সঃ
83.48
রুদ্রাণী তু ততঃ ক্রুদ্ধা প্রজোচ্ছেদে তথা কৃতে
দেবানথাব্রবীত্তত্র স্ত্রীভাবাত্পরুষং বচঃ
83.49
যস্মাদপত্যকামো বৈ ভর্তা মে বিনিবর্তিতঃ
তস্মাত্সর্বে সুরা যূয়মনপত্যা ভবিষ্যথ
83.50
প্রজোচ্ছেদো মম কৃতো যস্মাদ্যুষ্মাভিরদ্য বৈ
তস্মাত্প্রজা বঃ খগমাঃ সর্বেষাং ন ভবিষ্যতি
83.51
পাবকস্তু ন তত্রাসীচ্ছাপকালে ভৃগূদ্বহ
দেবা দেব্যাস্তথা শাপাদনপত্যাস্তদাভবন্
83.52
রুদ্রস্তু তেজোঽপ্রতিমং ধারয়ামাস তত্তদা
প্রস্কন্নং তু ততস্তস্মাত্কিংচিত্তত্রাপতদ্ভুবি
83.53
তত্পপাত তদা চাগ্নৌ ববৃধে চাদ্ভুতোপমম্
তেজস্তেজসি সংপৃক্তমেকয়োনিত্বমাগতম্
83.54
এতস্মিন্নেব কালে তু দেবাঃ শক্রপুরোগমাঃ
অসুরস্তারকো নাম তেন সংতাপিতা ভৃশম্
83.55
আদিত্যা বসবো রুদ্রা মরুতোঽথাশ্বিনাবপি
সাধ্যাশ্চ সর্বে সংত্রস্তা দৈতেয়স্য পরাক্রমাৎ
83.56
স্থানানি দেবতানাং হি বিমানানি পুরাণি চ
ঋষীণামাশ্রমাশ্চৈব বভূবুরসুরৈর্হৃতাঃ
83.57
তে দীনমনসঃ সর্বে দেবাশ্চ ঋষয়শ্চ হ
প্রজগ্মুঃ শরণং দেবং ব্রহ্মাণমজরং প্রভুম্