Utshovঅধ্যায় 84
84.1
দেবা ঊচুঃ
অসুরস্তারকো নাম ত্বয়া দত্তবরঃ প্রভো
সুরানৃষীংশ্চ ক্লিশ্নাতি বধস্তস্য বিধীয়তাম্
84.2
তস্মাদ্ভয়ং সমুত্পন্নমস্মাকং বৈ পিতামহ
পরিত্রায়স্ব নো দেব ন হ্যন্যা গতিরস্তি নঃ
84.3
ব্রহ্মোবাচ
সমোঽহং সর্বভূতানামধর্মং নেহ রোচয়ে
হন্যতাং তারকঃ ক্ষিপ্রং সুরর্ষিগণবাধকঃ
84.4
বেদা ধর্মাশ্চ নোত্সাদং গচ্ছেয়ুঃ সুরসত্তমাঃ
বিহিতং পূর্বমেবাত্র ময়া বৈ ব্যেতু বো জ্বরঃ
84.5
দেবা ঊচুঃ
বরদানাদ্ভগবতো দৈতেয়ো বলগর্বিতঃ
দেবৈর্ন শক্যতে হন্তুং স কথং প্রশমং ব্রজেৎ
84.6
স হি নৈব স্ম দেবানাং নাসুরাণাং ন রক্ষসাম্
বধ্যঃ স্যামিতি জগ্রাহ বরং ত্বত্তঃ পিতামহ
84.7
দেবাশ্চ শপ্তা রুদ্রাণ্যা প্রজোচ্ছেদে পুরা কৃতে
ন ভবিষ্যতি বোঽপত্যমিতি সর্বজগত্পতে
84.8
ব্রহ্মোবাচ
হুতাশনো ন তত্রাসীচ্ছাপকালে সুরোত্তমাঃ
স উত্পাদয়িতাপত্যং বধার্থং ত্রিদশদ্বিষাম্
84.9
তদ্বৈ সর্বানতিক্রম্য দেবদানবরাক্ষসান্
মানুষানথ গন্ধর্বান্নাগানথ চ পক্ষিণঃ
84.10
অস্ত্রেণামোঘপাতেন শক্ত্যা তং ঘাতয়িষ্যতি
যতো বো ভয়মুত্পন্নং যে চান্যে সুরশত্রবঃ
84.11
সনাতনো হি সংকল্পঃ কাম ইত্যভিধীয়তে
রুদ্রস্য তেজঃ প্রস্কন্নমগ্নৌ নিপতিতং চ তৎ
84.12
তত্তেজোঽগ্নির্মহদ্ভূতং দ্বিতীয়মিব পাবকম্
বধার্থং দেবশত্রূণাং গঙ্গায়াং জনয়িষ্যতি
84.13
স তু নাবাপ তং শাপং নষ্টঃ স হুতভুক্তদা
তস্মাদ্বো ভয়হৃদ্দেবাঃ সমুত্পত্স্যতি পাবকিঃ
84.14
অন্বিষ্যতাং বৈ জ্বলনস্তথা চাদ্য নিয়ুজ্যতাম্
তারকস্য বধোপায়ঃ কথিতো বৈ ময়ানঘাঃ
84.15
ন হি তেজস্বিনাং শাপাস্তেজঃসু প্রভবন্তি বৈ
বলান্যতিবলং প্রাপ্য নবলানি ভবন্তি বৈ
84.16
হন্যাদবধ্যান্বরদানপি চৈব তপস্বিনঃ
সংকল্পাভিরুচিঃ কামঃ সনাতনতমোঽনলঃ
84.17
জগত্পতিরনির্দেশ্যঃ সর্বগঃ সর্বভাবনঃ
হৃচ্ছয়ঃ সর্বভূতানাং জ্যেষ্ঠো রুদ্রাদপি প্রভুঃ
84.18
অন্বিষ্যতাং স তু ক্ষিপ্রং তেজোরাশির্হুতাশনঃ
স বো মনোগতং কামং দেবঃ সংপাদয়িষ্যতি
84.19
এতদ্বাক্যমুপশ্রুত্য ততো দেবা মহাত্মনঃ
জগ্মুঃ সংসিদ্ধসংকল্পাঃ পর্যেষন্তো বিভাবসুম্
84.20
ততস্ত্রৈলোক্যমৃষয়ো ব্যচিন্বন্ত সুরৈঃ সহ
কাঙ্ক্ষন্তো দর্শনং বহ্নেঃ সর্বে তদ্গতমানসাঃ
84.21
পরেণ তপসা যুক্তাঃ শ্রীমন্তো লোকবিশ্রুতাঃ
লোকানন্বচরন্সিদ্ধাঃ সর্ব এব ভৃগূদ্বহ
নষ্টমাত্মনি সংলীনং নাধিজগ্মুর্হুতাশনম্
84.22
ততঃ সংজাতসংত্রাসানগ্নের্দর্শনলালসান্
জলেচরঃ ক্লান্তমনাস্তেজসাগ্নেঃ প্রদীপিতঃ
উবাচ দেবান্মণ্ডূকো রসাতলতলোত্থিতঃ
84.23
রসাতলতলে দেবা বসত্যগ্নিরিতি প্রভো
সংতাপাদিহ সংপ্রাপ্তঃ পাবকপ্রভবাদহম্
84.24
স সংসুপ্তো জলে দেবা ভগবান্হব্যবাহনঃ
অপঃ সংসৃজ্য তেজোভিস্তেন সংতাপিতা বয়ম্
84.25
তস্য দর্শনমিষ্টং বো যদি দেবা বিভাবসোঃ
তত্রৈনমভিগচ্ছধ্বং কার্যং বো যদি বহ্নিনা
84.26
গম্যতাং সাধয়িষ্যামো বয়ং হ্যগ্নিভয়াত্সুরাঃ
এতাবদুক্ত্বা মণ্ডূকস্ত্বরিতো জলমাবিশৎ
84.27
হুতাশনস্তু বুবুধে মণ্ডূকস্যাথ পৈশুনম্
শশাপ স তমাসাদ্য ন রসান্বেত্স্যসীতি বৈ
84.28
তং স সংয়ুজ্য শাপেন মণ্ডূকং পাবকো যয়ৌ
অন্যত্র বাসায় বিভুর্ন চ দেবানদর্শয়ৎ
84.29
দেবাস্ত্বনুগ্রহং চক্রুর্মণ্ডূকানাং ভৃগূদ্বহ
যত্তচ্ছৃণু মহাবাহো গদতো মম সর্বশঃ
84.30
দেবা ঊচুঃ
অগ্নিশাপাদজিহ্বাপি রসজ্ঞানবহিষ্কৃতাঃ
সরস্বতীং বহুবিধাং যূয়মুচ্চারয়িষ্যথ
84.31
বিলবাসগতাংশ্চৈব নিরাদানানচেতসঃ
গতাসূনপি বঃ শুষ্কান্ভূমিঃ সংধারয়িষ্যতি
তমোগতায়ামপি চ নিশায়াং বিচরিষ্যথ
84.32
ইত্যুক্ত্বা তাংস্ততো দেবাঃ পুনরেব মহীমিমাম্
পরীয়ুর্জ্বলনস্যার্থে ন চাবিন্দন্হুতাশনম্
84.33
অথ তান্দ্বিরদঃ কশ্চিত্সুরেন্দ্রদ্বিরদোপমঃ
অশ্বত্থস্থোঽগ্নিরিত্যেবং প্রাহ দেবান্ভৃগূদ্বহ
84.34
শশাপ জ্বলনঃ সর্বান্দ্বিরদান্ক্রোধমূর্ছিতঃ
প্রতীপা ভবতাং জিহ্বা ভবিত্রীতি ভৃগূদ্বহ
84.35
ইত্যুক্ত্বা নিঃসৃতোঽশ্বত্থাদগ্নির্বারণসূচিতঃ
প্রবিবেশ শমীগর্ভমথ বহ্নিঃ সুষুপ্সয়া
84.36
অনুগ্রহং তু নাগানাং যং চক্রুঃ শৃণু তং প্রভো
দেবা ভৃগুকুলশ্রেষ্ঠ প্রীতাঃ সত্যপরাক্রমাঃ
84.37
দেবা ঊচুঃ
প্রতীপয়া জিহ্বয়াপি সর্বাহারান্করিষ্যথ
বাচং চোচ্চারয়িষ্যধ্বমুচ্চৈরব্যঞ্জিতাক্ষরম্
ইত্যুক্ত্বা পুনরেবাগ্নিমনুসস্রুর্দিবৌকসঃ
84.38
অশ্বত্থান্নিঃসৃতশ্চাগ্নিঃ শমীগর্ভগতস্তদা
শুকেন খ্যাপিতো বিপ্র তং দেবাঃ সমুপাদ্রবন্
84.39
শশাপ শুকমগ্নিস্তু বাগ্বিহীনো ভবিষ্যসি
জিহ্বাং চাবর্তয়ামাস তস্যাপি হুতভুক্তদা
84.40
দৃষ্ট্বা তু জ্বলনং দেবাঃ শুকমূচুর্দয়ান্বিতাঃ
ভবিতা ন ত্বমত্যন্তং শকুনে নষ্টবাগিতি
84.41
আবৃত্তজিহ্বস্য সতো বাক্যং কান্তং ভবিষ্যতি
বালস্যেব প্রবৃদ্ধস্য কলমব্যক্তমদ্ভুতম্
84.42
ইত্যুক্ত্বা তং শমীগর্ভে বহ্নিমালক্ষ্য দেবতাঃ
তদেবায়তনং চক্রুঃ পুণ্যং সর্বক্রিয়াস্বপি
84.43
ততঃপ্রভৃতি চাপ্যগ্নিঃ শমীগর্ভেষু দৃশ্যতে
উত্পাদনে তথোপায়মনুজগ্মুশ্চ মানবাঃ
84.44
আপো রসাতলে যাস্তু সংসৃষ্টাশ্চিত্রভানুনা
তাঃ পর্বতপ্রস্রবণৈরূষ্মাং মুঞ্চন্তি ভার্গব
পাবকেনাধিশয়তা সংতপ্তাস্তস্য তেজসা
84.45
ততোঽগ্নির্দেবতা দৃষ্ট্বা বভূব ব্যথিতস্তদা
কিমাগমনমিত্যেবং তানপৃচ্ছত পাবকঃ
84.46
তমূচুর্বিবুধাঃ সর্বে তে চৈব পরমর্ষয়ঃ
ত্বাং নিয়োক্ষ্যামহে কার্যে তদ্ভবান্কর্তুমর্হতি
কৃতে চ তস্মিন্ভবিতা তবাপি সুমহান্গুণঃ
84.47
অগ্নিরুবাচ
ব্রূত যদ্ভবতাং কার্যং সর্বং কর্তাস্মি তত্সুরাঃ
ভবতাং হি নিয়োজ্যোঽহং মা বোঽত্রাস্তু বিচারণা
84.48
দেবা ঊচুঃ
অসুরস্তারকো নাম ব্রহ্মণো বরদর্পিতঃ
অস্মান্প্রবাধতে বীর্যাদ্বধস্তস্য বিধীয়তাম্
84.49
ইমান্দেবগণাংস্তাত প্রজাপতিগণাংস্তথা
ঋষীংশ্চাপি মহাভাগান্পরিত্রায়স্ব পাবক
84.50
অপত্যং তেজসা যুক্তং প্রবীরং জনয় প্রভো
যদ্ভয়ং নোঽসুরাত্তস্মান্নাশয়েদ্ধব্যবাহন
84.51
শপ্তানাং নো মহাদেব্যা নান্যদস্তি পরায়ণম্
অন্যত্র ভবতো বীর্যং তস্মাত্ত্রায়স্ব নস্ততঃ
84.52
ইত্যুক্তঃ স তথেত্যুক্ত্বা ভগবান্হব্যকব্যভুক্
জগামাথ দুরাধর্ষো গঙ্গাং ভাগীরথীং প্রতি
84.53
তয়া চাপ্যভবন্মিশ্রো গর্ভশ্চাস্যাভবত্তদা
ববৃধে স তদা গর্ভঃ কক্ষে কৃষ্ণগতির্যথা
84.54
তেজসা তস্য গর্ভস্য গঙ্গা বিহ্বলচেতনা
সংতাপমগমত্তীব্রং সা সোঢুং ন শশাক হ
84.55
আহিতে জ্বলনেনাথ গর্ভে তেজঃসমন্বিতে
গঙ্গায়ামসুরঃ কশ্চিদ্ভৈরবং নাদমুত্সৃজৎ
84.56
অবুদ্ধাপতিতেনাথ নাদেন বিপুলেন সা
বিত্রস্তোদ্ভ্রান্তনয়না গঙ্গা বিপ্লুতলোচনা
বিসংজ্ঞা নাশকদ্গর্ভং সংধারয়িতুমাত্মনা
84.57
সা তু তেজঃপরীতাঙ্গী কম্পমানা চ জাহ্নবী
উবাচ বচনং বিপ্র তদা গর্ভবলোদ্ধতা
ন তে শক্তাস্মি ভগবংস্তেজসোঽস্য বিধারণে
84.58
বিমূঢাস্মি কৃতানেন তথাস্বাস্থ্যং কৃতং পরম্
বিহ্বলা চাস্মি ভগবংস্তেজো নষ্টং চ মেঽনঘ
84.59
ধারণে নাস্য শক্তাহং গর্ভস্য তপতাং বর
উত্স্রক্ষ্যেঽহমিমং দুঃখান্ন তু কামাত্কথংচন
84.60
ন চেতসোঽস্তি সংস্পর্শো মম দেব বিভাবসো
আপদর্থে হি সংবন্ধঃ সুসূক্ষ্মোঽপি মহাদ্যুতে
84.61
যদত্র গুণসংপন্নমিতরং বা হুতাশন
ত্বয্যেব তদহং মন্যে ধর্মাধর্মৌ চ কেবলৌ
84.62
তামুবাচ ততো বহ্নির্ধার্যতাং ধার্যতাময়ম্
গর্ভো মত্তেজসা যুক্তো মহাগুণফলোদয়ঃ
84.63
শক্তা হ্যসি মহীং কৃত্স্নাং বোঢুং ধারয়িতুং তথা
ন হি তে কিংচিদপ্রাপ্যং মদ্রেতোধারণাদৃতে
84.64
সা বহ্নিনা বার্যমাণা দেবৈশ্চাপি সরিদ্বরা
সমুত্সসর্জ তং গর্ভং মেরৌ গিরিবরে তদা
84.65
সমর্থা ধারণে চাপি রুদ্রতেজঃপ্রধর্ষিতা
নাশকত্তং তদা গর্ভং সংধারয়িতুমোজসা
84.66
সা সমুত্সৃজ্য তং দুঃখাদ্দীপ্তবৈশ্বানরপ্রভম্
দর্শয়ামাস চাগ্নিস্তাং তদা গঙ্গাং ভৃগূদ্বহ
পপ্রচ্ছ সরিতাং শ্রেষ্ঠাং কচ্চিদ্গর্ভঃ সুখোদয়ঃ
84.67
কীদৃগ্বর্ণোঽপি বা দেবি কীদৃগ্রূপশ্চ দৃশ্যতে
তেজসা কেন বা যুক্তঃ সর্বমেতদ্ব্রবীহি মে
84.68
গঙ্গোবাচ
জাতরূপঃ স গর্ভো বৈ তেজসা ত্বমিবানল
সুবর্ণো বিমলো দীপ্তঃ পর্বতং চাবভাসয়ৎ
84.69
পদ্মোত্পলবিমিশ্রাণাং হ্রদানামিব শীতলঃ
গন্ধোঽস্য স কদম্বানাং তুল্যো বৈ তপতাং বর
84.70
তেজসা তস্য গর্ভস্য ভাস্করস্যেব রশ্মিভিঃ
যদ্দ্রব্যং পরিসংসৃষ্টং পৃথিব্যাং পর্বতেষু বা
তত্সর্বং কাঞ্চনীভূতং সমন্তাত্প্রত্যদৃশ্যত
84.71
পর্যধাবত শৈলাংশ্চ নদীঃ প্রস্রবণানি চ
ব্যদীপয়ত্তেজসা চ ত্রৈলোক্যং সচরাচরম্
84.72
এবংরূপঃ স ভগবান্পুত্রস্তে হব্যবাহন
সূর্যবৈশ্বানরসমঃ কান্ত্যা সোম ইবাপরঃ
এবমুক্ত্বা তু সা দেবী তত্রৈবান্তরধীয়ত
84.73
পাবকশ্চাপি তেজস্বী কৃত্বা কার্যং দিবৌকসাম্
জগামেষ্টং ততো দেশং তদা ভার্গবনন্দন
84.74
এতৈঃ কর্মগুণৈর্লোকে নামাগ্নেঃ পরিগীয়তে
হিরণ্যরেতা ইতি বৈ ঋষিভির্বিবুধৈস্তথা
পৃথিবী চ তদা দেবী খ্যাতা বসুমতীতি বৈ
84.75
স তু গর্ভো মহাতেজা গাঙ্গেয়ঃ পাবকোদ্ভবঃ
দিব্যং শরবণং প্রাপ্য ববৃধেঽদ্ভুতদর্শনঃ
84.76
দদৃশুঃ কৃত্তিকাস্তং তু বালার্কসদৃশদ্যুতিম্
জাতস্নেহাশ্চ তং বালং পুপুষুঃ স্তন্যবিস্রবৈঃ
84.77
ততঃ স কার্ত্তিকেয়ত্বমবাপ পরমদ্যুতিঃ
স্কন্নত্বাত্স্কন্দতাং চাপি গুহাবাসাদ্গুহোঽভবৎ
84.78
এবং সুবর্ণমুত্পন্নমপত্যং জাতবেদসঃ
তত্র জাম্বূনদং শ্রেষ্ঠং দেবানামপি ভূষণম্
84.79
ততঃপ্রভৃতি চাপ্যেতজ্জাতরূপমুদাহৃতম্
যত্সুবর্ণং স ভগবানগ্নিরীশঃ প্রজাপতিঃ
84.80
পবিত্রাণাং পবিত্রং হি কনকং দ্বিজসত্তম
অগ্নীষোমাত্মকং চৈব জাতরূপমুদাহৃতম্
84.81
রত্নানামুত্তমং রত্নং ভূষণানাং তথোত্তমম্
পবিত্রং চ পবিত্রাণাং মঙ্গলানাং চ মঙ্গলম্