Utshovঅধ্যায় 85
85.1
বসিষ্ঠ উবাচ
অপি চেদং পুরা রাম শ্রুতং মে ব্রহ্মদর্শনম্
পিতামহস্য যদ্বৃত্তং ব্রহ্মণঃ পরমাত্মনঃ
85.2
দেবস্য মহতস্তাত বারুণীং বিভ্রতস্তনুম্
ঐশ্বর্যে বারুণে রাম রুদ্রস্যেশস্য বৈ প্রভো
85.3
আজগ্মুর্মুনয়ঃ সর্বে দেবাশ্চাগ্নিপুরোগমাঃ
যজ্ঞাঙ্গানি চ সর্বাণি বষট্কারশ্চ মূর্তিমান্
85.4
মূর্তিমন্তি চ সামানি যজূংষি চ সহস্রশঃ
ঋগ্বেদশ্চাগমত্তত্র পদক্রমবিভূষিতঃ
85.5
লক্ষণানি স্বরাঃ স্তোভা নিরুক্তং স্বরভক্তয়ঃ
ওংকারশ্চাবসন্নেত্রে নিগ্রহপ্রগ্রহৌ তথা
85.6
বেদাশ্চ সোপনিষদো বিদ্যা সাবিত্র্যথাপি চ
ভূতং ভব্যং ভবিষ্যচ্চ দধার ভগবাঞ্শিবঃ
জুহ্বচ্চাত্মন্যথাত্মানং স্বয়মেব তদা প্রভো
85.7
দেবপত্ন্যশ্চ কন্যাশ্চ দেবানাং চৈব মাতরঃ
আজগ্মুঃ সহিতাস্তত্র তদা ভৃগুকুলোদ্বহ
85.8
যজ্ঞং পশুপতেঃ প্রীতা বরুণস্য মহাত্মনঃ
স্বয়ংভুবস্তু তা দৃষ্ট্বা রেতঃ সমপতদ্ভুবি
85.9
তস্য শুক্রস্য নিষ্পন্দাত্পাংসূন্সংগৃহ্য ভূমিতঃ
প্রাস্যত্পূষা করাভ্যাং বৈ তস্মিন্নেব হুতাশনে
85.10
ততস্তস্মিন্সংপ্রবৃত্তে সত্রে জ্বলিতপাবকে
ব্রহ্মণো জুহ্বতস্তত্র প্রাদুর্ভাবো বভূব হ
85.11
স্কন্নমাত্রং চ তচ্ছুক্রং স্রুবেণ প্রতিগৃহ্য সঃ
আজ্যবন্মন্ত্রবচ্চাপি সোঽজুহোদ্ভৃগুনন্দন
85.12
ততঃ সংজনয়ামাস ভূতগ্রামং স বীর্যবান্
ততস্তু তেজসস্তস্মাজ্জজ্ঞে লোকেষু তৈজসম্
85.13
তমসস্তামসা ভাবা ব্যাপি সত্ত্বং তথোভয়ম্
সগুণস্তেজসো নিত্যং তমস্যাকাশমেব চ
85.14
সর্বভূতেষ্বথ তথা সত্ত্বং তেজস্তথা তমঃ
শুক্রে হুতেঽগ্নৌ তস্মিংস্তু প্রাদুরাসংস্ত্রয়ঃ প্রভো
85.15
পুরুষা বপুষা যুক্তা যুক্তাঃ প্রসবজৈর্গুণৈঃ
ভৃগিত্যেব ভৃগুঃ পূর্বমঙ্গারেভ্যোঽঙ্গিরাভবৎ
85.16
অঙ্গারসংশ্রয়াচ্চৈব কবিরিত্যপরোঽভবৎ
সহ জ্বালাভিরুত্পন্নো ভৃগুস্তস্মাদ্ভৃগুঃ স্মৃতঃ
85.17
মরীচিভ্যো মরীচিস্তু মারীচঃ কশ্যপো হ্যভূৎ
অঙ্গারেভ্যোঽঙ্গিরাস্তাত বালখিল্যাঃ শিলোচ্চয়াৎ
অত্রৈবাত্রেতি চ বিভো জাতমত্রিং বদন্ত্যপি
85.18
তথা ভস্মব্যপোহেভ্যো ব্রহ্মর্ষিগণসংমিতাঃ
বৈখানসাঃ সমুত্পন্নাস্তপঃশ্রুতগুণেপ্সবঃ
অশ্রুতোঽস্য সমুত্পন্নাবশ্বিনৌ রূপসংমতৌ
85.19
শেষাঃ প্রজানাং পতয়ঃ স্রোতোভ্যস্তস্য জজ্ঞিরে
ঋষয়ো লোমকূপেভ্যঃ স্বেদাচ্ছন্দো মলাত্মকম্
85.20
এতস্মাত্কারণাদাহুরগ্নিং সর্বাস্তু দেবতাঃ
ঋষয়ঃ শ্রুতসংপন্না বেদপ্রামাণ্যদর্শনাৎ
85.21
যানি দারূণি তে মাসা নির্যাসাঃ পক্ষসংজ্ঞিতাঃ
অহোরাত্রা মুহূর্তাস্তু পিত্তং জ্যোতিশ্চ বারুণম্
85.22
রৌদ্রং লোহিতমিত্যাহুর্লোহিতাত্কনকং স্মৃতম্
তন্মৈত্রমিতি বিজ্ঞেয়ং ধূমাচ্চ বসবঃ স্মৃতাঃ
85.23
অর্চিষো যাশ্চ তে রুদ্রাস্তথাদিত্যা মহাপ্রভাঃ
উদ্দিষ্টাস্তে তথাঙ্গারা যে ধিষ্ণ্যেষু দিবি স্থিতাঃ
85.24
আদিনাথশ্চ লোকস্য তত্পরং ব্রহ্ম তদ্ধ্রুবম্
সর্বকামদমিত্যাহুস্তত্র হব্যমুদাবহৎ
85.25
ততোঽব্রবীন্মহাদেবো বরুণঃ পরমাত্মকঃ
মম সত্রমিদং দিব্যমহং গৃহপতিস্ত্বিহ
85.26
ত্রীণি পূর্বাণ্যপত্যানি মম তানি ন সংশয়ঃ
ইতি জানীত খগমা মম যজ্ঞফলং হি তৎ
85.27
অগ্নিরুবাচ
মদঙ্গেভ্যঃ প্রসূতানি মদাশ্রয়কৃতানি চ
মমৈব তান্যপত্যানি বরুণো হ্যবশাত্মকঃ
85.28
অথাব্রবীল্লোকগুরুর্ব্রহ্মা লোকপিতামহঃ
মমৈব তান্যপত্যানি মম শুক্রং হুতং হি তৎ
85.29
অহং বক্তা চ মন্ত্রস্য হোতা শুক্রস্য চৈব হ
যস্য বীজং ফলং তস্য শুক্রং চেত্কারণং মতম্
85.30
ততোঽব্রুবন্দেবগণাঃ পিতামহমুপেত্য বৈ
কৃতাঞ্জলিপুটাঃ সর্বে শিরোভিরভিবন্দ্য চ
85.31
বয়ং চ ভগবন্সর্বে জগচ্চ সচরাচরম্
তবৈব প্রসবাঃ সর্বে তস্মাদগ্নির্বিভাবসুঃ
বরুণশ্চেশ্বরো দেবো লভতাং কামমীপ্সিতম্
85.32
নিসর্গাদ্বরুণশ্চাপি ব্রহ্মণো যাদসাং পতিঃ
জগ্রাহ বৈ ভৃগুং পূর্বমপত্যং সূর্যবর্চসম্
85.33
ঈশ্বরোঽঙ্গিরসং চাগ্নেরপত্যার্থেঽভ্যকল্পয়ৎ
পিতামহস্ত্বপত্যং বৈ কবিং জগ্রাহ তত্ত্ববিৎ
85.34
তদা স বারুণঃ খ্যাতো ভৃগুঃ প্রসবকর্মকৃৎ
আগ্নেয়স্ত্বঙ্গিরাঃ শ্রীমান্কবির্ব্রাহ্মো মহায়শাঃ
ভার্গবাঙ্গিরসৌ লোকে লোকসংতানলক্ষণৌ
85.35
এতে বিপ্রবরাঃ সর্বে প্রজানাং পতয়স্ত্রয়ঃ
সর্বং সংতানমেতেষামিদমিত্যুপধারয়
85.36
ভৃগোস্তু পুত্রাস্তত্রাসন্সপ্ত তুল্যা ভৃগোর্গুণৈঃ
চ্যবনো বজ্রশীর্ষশ্চ শুচিরৌর্বস্তথৈব চ
85.37
শুক্রো বরেণ্যশ্চ বিভুঃ সবনশ্চেতি সপ্ত তে
ভার্গবা বারুণাঃ সর্বে যেষাং বংশে ভবানপি
85.38
অষ্টৌ চাঙ্গিরসঃ পুত্রা বারুণাস্তেঽপ্যুদাহৃতাঃ
বৃহস্পতিরুতথ্যশ্চ বয়স্যঃ শান্তিরেব চ
85.39
ঘোরো বিরূপঃ সংবর্তঃ সুধন্বা চাষ্টমঃ স্মৃতঃ
এতেঽষ্টাবগ্নিজাঃ সর্বে জ্ঞাননিষ্ঠা নিরাময়াঃ
85.40
ব্রাহ্মণস্য কবেঃ পুত্রা বারুণাস্তেঽপ্যুদাহৃতাঃ
অষ্টৌ প্রসবজৈর্যুক্তা গুণৈর্ব্রহ্মবিদঃ শুভাঃ
85.41
কবিঃ কাব্যশ্চ বিষ্ণুশ্চ বুদ্ধিমানুশনাস্তথা
ভৃগুশ্চ বিরজাশ্চৈব কাশী চোগ্রশ্চ ধর্মবিৎ
85.42
অষ্টৌ কবিসুতা হ্যেতে সর্বমেভির্জগত্ততম্
প্রজাপতয় এতে হি প্রজানাং যৈরিমাঃ প্রজাঃ
85.43
এবমঙ্গিরসশ্চৈব কবেশ্চ প্রসবান্বয়ৈঃ
ভৃগোশ্চ ভৃগুশার্দূল বংশজৈঃ সততং জগৎ
85.44
বরুণশ্চাদিতো বিপ্র জগ্রাহ প্রভুরীশ্বরঃ
কবিং তাত ভৃগুং চৈব তস্মাত্তৌ বারুণৌ স্মৃতৌ
85.45
জগ্রাহাঙ্গিরসং দেবঃ শিখী তস্মাদ্ধুতাশনঃ
তস্মাদঙ্গিরসো জ্ঞেয়াঃ সর্ব এব তদন্বয়াঃ
85.46
ব্রহ্মা পিতামহঃ পূর্বং দেবতাভিঃ প্রসাদিতঃ
ইমে নঃ সংতরিষ্যন্তি প্রজাভির্জগদীশ্বরাঃ
85.47
সর্বে প্রজানাং পতয়ঃ সর্বে চাতিতপস্বিনঃ
ত্বত্প্রসাদাদিমং লোকং তারয়িষ্যন্তি শাশ্বতম্
85.48
তথৈব বংশকর্তারস্তব তেজোবিবর্ধনাঃ
ভবেয়ুর্বেদবিদুষঃ সর্বে বাক্পতয়স্তথা
85.49
দেবপক্ষধরাঃ সৌম্যাঃ প্রাজাপত্যা মহর্ষয়ঃ
আপ্নুবন্তি তপশ্চৈব ব্রহ্মচর্যং পরং তথা
85.50
সর্বে হি বয়মেতে চ তবৈব প্রসবঃ প্রভো
দেবানাং ব্রাহ্মণানাং চ ত্বং হি কর্তা পিতামহ
85.51
মরীচিমাদিতঃ কৃত্বা সর্বে চৈবাথ ভার্গবাঃ
অপত্যানীতি সংপ্রেক্ষ্য ক্ষময়াম পিতামহ
85.52
তে ত্বনেনৈব রূপেণ প্রজনিষ্যন্তি বৈ প্রজাঃ
স্থাপয়িষ্যন্তি চাত্মানং যুগাদিনিধনে তথা
85.53
এবমেতত্পুরা বৃত্তং তস্য যজ্ঞে মহাত্মনঃ
দেবশ্রেষ্ঠস্য লোকাদৌ বারুণীং বিভ্রতস্তনুম্
85.54
অগ্নির্ব্রহ্মা পশুপতিঃ শর্বো রুদ্রঃ প্রজাপতিঃ
অগ্নেরপত্যমেতদ্বৈ সুবর্ণমিতি ধারণা
85.55
অগ্ন্যভাবে চ কুর্বন্তি বহ্নিস্থানেষু কাঞ্চনম্
জামদগ্ন্য প্রমাণজ্ঞা বেদশ্রুতিনিদর্শনাৎ
85.56
কুশস্তম্বে জুহোত্যগ্নিং সুবর্ণং তত্র সংস্থিতম্
হুতে প্রীতিকরীমৃদ্ধিং ভগবাংস্তত্র মন্যতে
85.57
তস্মাদগ্নিপরাঃ সর্বা দেবতা ইতি শুশ্রুম
ব্রহ্মণো হি প্রসূতোঽগ্নিরগ্নেরপি চ কাঞ্চনম্
85.58
তস্মাদ্যে বৈ প্রয়চ্ছন্তি সুবর্ণং ধর্মদর্শিনঃ
দেবতাস্তে প্রয়চ্ছন্তি সমস্তা ইতি নঃ শ্রুতম্
85.59
তস্য চাতমসো লোকা গচ্ছতঃ পরমাং গতিম্
স্বর্লোকে রাজরাজ্যেন সোঽভিষিচ্যেত ভার্গব
85.60
আদিত্যোদয়নে প্রাপ্তে বিধিমন্ত্রপুরস্কৃতম্
দদাতি কাঞ্চনং যো বৈ দুঃস্বপ্নং প্রতিহন্তি সঃ
85.61
দদাত্যুদিতমাত্রে যস্তস্য পাপ্মা বিধূয়তে
মধ্যাহ্নে দদতো রুক্মং হন্তি পাপমনাগতম্
85.62
দদাতি পশ্চিমাং সংধ্যাং যঃ সুবর্ণং ধৃতব্রতঃ
ব্রহ্মবায্বগ্নিসোমানাং সালোক্যমুপয়াতি সঃ
85.63
সেন্দ্রেষু চৈব লোকেষু প্রতিষ্ঠাং প্রাপ্নুতে শুভাম্
ইহ লোকে যশঃ প্রাপ্য শান্তপাপ্মা প্রমোদতে
85.64
ততঃ সংপদ্যতেঽন্যেষু লোকেষ্বপ্রতিমঃ সদা
অনাবৃতগতিশ্চৈব কামচারী ভবত্যুত
85.65
ন চ ক্ষরতি তেভ্যঃ স শশ্বচ্চৈবাপ্নুতে মহৎ
সুবর্ণমক্ষয়ং দত্ত্বা লোকানাপ্নোতি পুষ্কলান্
85.66
যস্তু সংজনয়িত্বাগ্নিমাদিত্যোদয়নং প্রতি
দদ্যাদ্বৈ ব্রতমুদ্দিশ্য সর্বান্কামান্সমশ্নুতে
85.67
অগ্নিরিত্যেব তত্প্রাহুঃ প্রদানং বৈ সুখাবহম্
যথেষ্টগুণসংপন্নং প্রবর্তকমিতি স্মৃতম্
85.68
ভীষ্ম উবাচ
ইত্যুক্তঃ স বসিষ্ঠেন জামদগ্ন্যঃ প্রতাপবান্
দদৌ সুবর্ণং বিপ্রেভ্যো ব্যমুচ্যত চ কিল্বিষাৎ
85.69
এতত্তে সর্বমাখ্যাতং সুবর্ণস্য মহীপতে
প্রদানস্য ফলং চৈব জন্ম চাগ্ন্যমনুত্তমম্
85.70
তস্মাত্ত্বমপি বিপ্রেভ্যঃ প্রয়চ্ছ কনকং বহু
দদত্সুবর্ণং নৃপতে কিল্বিষাদ্বিপ্রমোক্ষ্যসি