Utshovঅধ্যায় 86
86.1
যুধিষ্ঠির উবাচ
উক্তাঃ পিতামহেনেহ সুবর্ণস্য বিধানতঃ
বিস্তরেণ প্রদানস্য যে গুণাঃ শ্রুতিলক্ষণাঃ
86.2
যত্তু কারণমুত্পত্তেঃ সুবর্ণস্যেহ কীর্তিতম্
স কথং তারকঃ প্রাপ্তো নিধনং তদ্ব্রবীহি মে
86.3
উক্তঃ স দেবতানাং হি অবধ্য ইতি পার্থিব
ন চ তস্যেহ তে মৃত্যুর্বিস্তরেণ প্রকীর্তিতঃ
86.4
এতদিচ্ছাম্যহং শ্রোতুং ত্বত্তঃ কুরুকুলোদ্বহ
কার্ত্স্ন্যেন তারকবধং পরং কৌতূহলং হি মে
86.5
ভীষ্ম উবাচ
বিপন্নকৃত্যা রাজেন্দ্র দেবতা ঋষয়স্তথা
কৃত্তিকাশ্চোদয়ামাসুরপত্যভরণায় বৈ
86.6
ন দেবতানাং কাচিদ্ধি সমর্থা জাতবেদসঃ
একাপি শক্তা তং গর্ভং সংধারয়িতুমোজসা
86.7
ষণ্ণাং তাসাং ততঃ প্রীতঃ পাবকো গর্ভধারণাৎ
স্বেন তেজোবিসর্গেণ বীর্যেণ পরমেণ চ
86.8
তাস্তু ষট্কৃত্তিকা গর্ভং পুপুষুর্জাতবেদসঃ
ষট্সু বর্ত্মসু তেজোঽগ্নেঃ সকলং নিহিতং প্রভো
86.9
ততস্তা বর্ধমানস্য কুমারস্য মহাত্মনঃ
তেজসাভিপরীতাঙ্গ্যো ন ক্বচিচ্ছর্ম লেভিরে
86.10
ততস্তেজঃপরীতাঙ্গ্যঃ সর্বাঃ কাল উপস্থিতে
সমং গর্ভং সুষুবিরে কৃত্তিকাস্তা নরর্ষভ
86.11
ততস্তং ষডধিষ্ঠানং গর্ভমেকত্বমাগতম্
পৃথিবী প্রতিজগ্রাহ কান্তীপুরসমীপতঃ
86.12
স গর্ভো দিব্যসংস্থানো দীপ্তিমান্পাবকপ্রভঃ
দিব্যং শরবণং প্রাপ্য ববৃধে প্রিয়দর্শনঃ
86.13
দদৃশুঃ কৃত্তিকাস্তং তু বালং বহ্নিসমদ্যুতিম্
জাতস্নেহাশ্চ সৌহার্দাত্পুপুষুঃ স্তন্যবিস্রবৈঃ
86.14
অভবত্কার্ত্তিকেয়ঃ স ত্রৈলোক্যে সচরাচরে
স্কন্নত্বাত্স্কন্দতাং চাপ গুহাবাসাদ্গুহোঽভবৎ
86.15
ততো দেবাস্ত্রয়স্ত্রিংশদ্দিশশ্চ সদিগীশ্বরাঃ
রুদ্রো ধাতা চ বিষ্ণুশ্চ যজ্ঞঃ পূষার্যমা ভগঃ
86.16
অংশো মিত্রশ্চ সাধ্যাশ্চ বসবো বাসবোঽশ্বিনৌ
আপো বায়ুর্নভশ্চন্দ্রো নক্ষত্রাণি গ্রহা রবিঃ
86.17
পৃথগ্ভূতানি চান্যানি যানি দেবার্পণানি বৈ
আজগ্মুস্তত্র তং দ্রষ্টুং কুমারং জ্বলনাত্মজম্
ঋষয়স্তুষ্টুবুশ্চৈব গন্ধর্বাশ্চ জগুস্তথা
86.18
ষডাননং কুমারং তং দ্বিষডক্ষং দ্বিজপ্রিয়ম্
পীনাংসং দ্বাদশভুজং পাবকাদিত্যবর্চসম্
86.19
শয়ানং শরগুল্মস্থং দৃষ্ট্বা দেবাঃ সহর্ষিভিঃ
লেভিরে পরমং হর্ষং মেনিরে চাসুরং হতম্
86.20
ততো দেবাঃ প্রিয়াণ্যস্য সর্ব এব সমাচরন্
ক্রীডতঃ ক্রীডনীয়ানি দদুঃ পক্ষিগণাংশ্চ হ
86.21
সুপর্ণোঽস্য দদৌ পত্রং ময়ূরং চিত্রবর্হিণম্
রাক্ষসাশ্চ দদুস্তস্মৈ বরাহমহিষাবুভৌ
86.22
কুক্কুটং চাগ্নিসংকাশং প্রদদৌ বরুণঃ স্বয়ম্
চন্দ্রমাঃ প্রদদৌ মেষমাদিত্যো রুচিরাং প্রভাম্
86.23
গবাং মাতা চ গা দেবী দদৌ শতসহস্রশঃ
ছাগমগ্নির্গুণোপেতমিলা পুষ্পফলং বহু
86.24
সুধন্বা শকটং চৈব রথং চামিতকূবরম্
বরুণো বারুণান্দিব্যান্ভুজংগান্প্রদদৌ শুভান্
সিংহান্সুরেন্দ্রো ব্যাঘ্রাংশ্চ দ্বীপিনোঽন্যাংশ্চ দংষ্ট্রিণঃ
86.25
শ্বাপদাংশ্চ বহূন্ঘোরাংশ্ছত্রাণি বিবিধানি চ
রাক্ষসাসুরসংঘাশ্চ যেঽনুজগ্মুস্তমীশ্বরম্
86.26
বর্ধমানং তু তং দৃষ্ট্বা প্রার্থয়ামাস তারকঃ
উপায়ৈর্বহুভির্হন্তুং নাশকচ্চাপি তং বিভুম্
86.27
সেনাপত্যেন তং দেবাঃ পূজয়িত্বা গুহালয়ম্
শশংসুর্বিপ্রকারং তং তস্মৈ তারককারিতম্
86.28
স বিবৃদ্ধো মহাবীর্যো দেবসেনাপতিঃ প্রভুঃ
জঘানামোঘয়া শক্ত্যা দানবং তারকং গুহঃ
86.29
তেন তস্মিন্কুমারেণ ক্রীডতা নিহতেঽসুরে
সুরেন্দ্রঃ স্থাপিতো রাজ্যে দেবানাং পুনরীশ্বরঃ
86.30
স সেনাপতিরেবাথ বভৌ স্কন্দঃ প্রতাপবান্
ঈশো গোপ্তা চ দেবানাং প্রিয়কৃচ্ছংকরস্য চ
86.31
হিরণ্যমূর্তির্ভগবানেষ এব চ পাবকিঃ
সদা কুমারো দেবানাং সেনাপত্যমবাপ্তবান্
86.32
তস্মাত্সুবর্ণং মঙ্গল্যং রত্নমক্ষয্যমুত্তমম্
সহজং কার্ত্তিকেয়স্য বহ্নেস্তেজঃ পরং মতম্
86.33
এবং রামায় কৌরব্য বসিষ্ঠোঽকথয়ত্পুরা
তস্মাত্সুবর্ণদানায় প্রয়তস্ব নরাধিপ
86.34
রামঃ সুবর্ণং দত্ত্বা হি বিমুক্তঃ সর্বকিল্বিষৈঃ
ত্রিবিষ্টপে মহত্স্থানমবাপাসুলভং নরৈঃ