অধ্যায় 87

87.1

যুধিষ্ঠির উবাচ
চাতুর্বর্ণ্যস্য ধর্মাত্মন্ধর্মঃ প্রোক্তস্ত্বয়ানঘ
তথৈব মে শ্রাদ্ধবিধিং কৃত্স্নং প্রব্রূহি পার্থিব

বৈশংপায়ন উবাচ
যুধিষ্ঠিরেণৈবমুক্তো ভীষ্মঃ শাংতনবস্তদা
ইমং শ্রাদ্ধবিধিং কৃত্স্নং প্রবক্তুমুপচক্রমে

ভীষ্ম উবাচ
শৃণুষ্বাবহিতো রাজঞ্শ্রাদ্ধকল্পমিমং শুভম্
ধন্যং যশস্যং পুত্রীয়ং পিতৃয়জ্ঞং পরংতপ

দেবাসুরমনুষ্যাণাং গন্ধর্বোরগরক্ষসাম্
পিশাচকিংনরাণাং চ পূজ্যা বৈ পিতরঃ সদা

পিতৄন্পূজ্যাদিতঃ পশ্চাদ্দেবান্সংতর্পয়ন্তি বৈ
তস্মাত্সর্বপ্রয়ত্নেন পুরুষঃ পূজয়েত্সদা

অন্বাহার্যং মহারাজ পিতৄণাং শ্রাদ্ধমুচ্যতে
তচ্চামিষেণ বিধিনা বিধিঃ প্রথমকল্পিতঃ

সর্বেষ্বহঃসু প্রীয়ন্তে কৃতৈঃ শ্রাদ্ধৈঃ পিতামহাঃ
প্রবক্ষ্যামি তু তে সর্বাংস্তিথ্যাং তিথ্যাং গুণাগুণান্

যেষ্বহঃসু কৃতৈঃ শ্রাদ্ধৈর্যত্ফলং প্রাপ্যতেঽনঘ
তত্সর্বং কীর্তয়িষ্যামি যথাবত্তন্নিবোধ মে

পিতৄনর্চ্য প্রতিপদি প্রাপ্নুয়াত্স্বগৃহে স্ত্রিয়ঃ
অভিরূপপ্রজায়িন্যো দর্শনীয়া বহুপ্রজাঃ

স্ত্রিয়ো দ্বিতীয়াং জায়ন্তে তৃতীয়ায়াং তু বন্দিনঃ
চতুর্থ্যাং ক্ষুদ্রপশবো ভবন্তি বহবো গৃহে

পঞ্চম্যাং বহবঃ পুত্রা জায়ন্তে কুর্বতাং নৃপ
কুর্বাণাস্তু নরাঃ ষষ্ঠ্যাং ভবন্তি দ্যুতিভাগিনঃ

কৃষিভাগী ভবেচ্ছ্রাদ্ধং কুর্বাণঃ সপ্তমীং নৃপ
অষ্টম্যাং তু প্রকুর্বাণো বাণিজ্যে লাভমাপ্নুয়াৎ

নবম্যাং কুর্বতঃ শ্রাদ্ধং ভবত্যেকশফং বহু
বিবর্ধন্তে তু দশমীং গাবঃ শ্রাদ্ধানি কুর্বতঃ

কুপ্যভাগী ভবেন্মর্ত্যঃ কুর্বন্নেকাদশীং নৃপ
ব্রহ্মবর্চস্বিনঃ পুত্রা জায়ন্তে তস্য বেশ্মনি

দ্বাদশ্যামীহমানস্য নিত্যমেব প্রদৃশ্যতে
রজতং বহু চিত্রং চ সুবর্ণং চ মনোরমম্

জ্ঞাতীনাং তু ভবেচ্ছ্রেষ্ঠঃ কুর্বঞ্শ্রাদ্ধং ত্রয়োদশীম্
অবশ্যং তু যুবানোঽস্য প্রমীয়ন্তে নরা গৃহে

যুদ্ধভাগী ভবেন্মর্ত্যঃ শ্রাদ্ধং কুর্বংশ্চতুর্দশীম্
অমাবাস্যাং তু নিবপন্সর্বান্কামানবাপ্নুয়াৎ

কৃষ্ণপক্ষে দশম্যাদৌ বর্জয়িত্বা চতুর্দশীম্
শ্রাদ্ধকর্মণি তিথ্যঃ স্যুঃ প্রশস্তা ন তথেতরাঃ

যথা চৈবাপরঃ পক্ষঃ পূর্বপক্ষাদ্বিশিষ্যতে
তথা শ্রাদ্ধস্য পূর্বাহ্ণাদপরাহ্ণো বিশিষ্যতে