UtshovChapter 87
87.1
युधिष्ठिर उवाच
चातुर्वर्ण्यस्य धर्मात्मन्धर्मः प्रोक्तस्त्वयानघ
तथैव मे श्राद्धविधिं कृत्स्नं प्रब्रूहि पार्थिव
Yudhishthira uvacha
Chaturvarnyasya dharmatmandharmah proktastvayanagha
Tathaiva me shraddhavidhim kritsnam prabruhi parthiva
87.2
वैशंपायन उवाच
युधिष्ठिरेणैवमुक्तो भीष्मः शांतनवस्तदा
इमं श्राद्धविधिं कृत्स्नं प्रवक्तुमुपचक्रमे
Vaishampayana uvacha
Yudhishthirenaivamukto bhishmah shantanavastada
Imam shraddhavidhim kritsnam pravaktumupachakrame
87.3
भीष्म उवाच
शृणुष्वावहितो राजञ्श्राद्धकल्पमिमं शुभम्
धन्यं यशस्यं पुत्रीयं पितृयज्ञं परंतप
Bhishma uvacha
Shrinushvavahito rajanshraddhakalpamimam shubham
Dhanyam yashasyam putriyam pitriyagyam parantapa
87.4
देवासुरमनुष्याणां गन्धर्वोरगरक्षसाम्
पिशाचकिंनराणां च पूज्या वै पितरः सदा
Devasuramanushyanam gandharvoragarakshasam
Pishachakinnaranam cha pujya vai pitarah sada
87.5
पितॄन्पूज्यादितः पश्चाद्देवान्संतर्पयन्ति वै
तस्मात्सर्वप्रयत्नेन पुरुषः पूजयेत्सदा
Pitrinpujyaditah pashchaddevansantarpayanti vai
Tasmatsarvaprayatnena purushah pujayetsada
87.6
अन्वाहार्यं महाराज पितॄणां श्राद्धमुच्यते
तच्चामिषेण विधिना विधिः प्रथमकल्पितः
Anvaharyam maharaja pitrinam shraddhamuchyate
Tachchamishena vidhina vidhih prathamakalpitah
87.7
सर्वेष्वहःसु प्रीयन्ते कृतैः श्राद्धैः पितामहाः
प्रवक्ष्यामि तु ते सर्वांस्तिथ्यां तिथ्यां गुणागुणान्
Sarveshvahahsu priyante kritaih shraddhaih pitamahah
Pravakshyami tu te sarvanstithyam tithyam gunagunan
87.8
येष्वहःसु कृतैः श्राद्धैर्यत्फलं प्राप्यतेऽनघ
तत्सर्वं कीर्तयिष्यामि यथावत्तन्निबोध मे
Yeshvahahsu kritaih shraddhairyatphalam prapyatenagha
Tatsarvam kirtayishyami yathavattannibodha me
87.9
पितॄनर्च्य प्रतिपदि प्राप्नुयात्स्वगृहे स्त्रियः
अभिरूपप्रजायिन्यो दर्शनीया बहुप्रजाः
Pitrinarchya pratipadi prapnuyatsvagrihe striyah
Abhirupaprajayinyo darshaniya bahuprajah
87.10
स्त्रियो द्वितीयां जायन्ते तृतीयायां तु वन्दिनः
चतुर्थ्यां क्षुद्रपशवो भवन्ति बहवो गृहे
Striyo dvitiyam jayante tritiyayam tu vandinah
Chaturthyam kshudrapashavo bhavanti bahavo grihe
87.11
पञ्चम्यां बहवः पुत्रा जायन्ते कुर्वतां नृप
कुर्वाणास्तु नराः षष्ठ्यां भवन्ति द्युतिभागिनः
Panchamyam bahavah putra jayante kurvatam nripa
Kurvanastu narah shashthyam bhavanti dyutibhaginah
87.12
कृषिभागी भवेच्छ्राद्धं कुर्वाणः सप्तमीं नृप
अष्टम्यां तु प्रकुर्वाणो वाणिज्ये लाभमाप्नुयात्
Krishibhagi bhavechchhraddham kurvanah saptamim nripa
Ashtamyam tu prakurvano vanijye labhamapnuyat
87.13
नवम्यां कुर्वतः श्राद्धं भवत्येकशफं बहु
विवर्धन्ते तु दशमीं गावः श्राद्धानि कुर्वतः
Navamyam kurvatah shraddham bhavatyekashapham bahu
Vivardhante tu dashamim gavah shraddhani kurvatah
87.14
कुप्यभागी भवेन्मर्त्यः कुर्वन्नेकादशीं नृप
ब्रह्मवर्चस्विनः पुत्रा जायन्ते तस्य वेश्मनि
Kupyabhagi bhavenmartyah kurvannekadashim nripa
Brahmavarchasvinah putra jayante tasya veshmani
87.15
द्वादश्यामीहमानस्य नित्यमेव प्रदृश्यते
रजतं बहु चित्रं च सुवर्णं च मनोरमम्
Dvadashyamihamanasya nityameva pradrishyate
Rajatam bahu chitram cha suvarnam cha manoramam
87.16
ज्ञातीनां तु भवेच्छ्रेष्ठः कुर्वञ्श्राद्धं त्रयोदशीम्
अवश्यं तु युवानोऽस्य प्रमीयन्ते नरा गृहे
Gyatinam tu bhavechchhreshthah kurvanshraddham trayodashim
Avashyam tu yuvanosya pramiyante nara grihe
87.17
युद्धभागी भवेन्मर्त्यः श्राद्धं कुर्वंश्चतुर्दशीम्
अमावास्यां तु निवपन्सर्वान्कामानवाप्नुयात्
Yuddhabhagi bhavenmartyah shraddham kurvanshchaturdashim
Amavasyam tu nivapansarvankamanavapnuyat
87.18
कृष्णपक्षे दशम्यादौ वर्जयित्वा चतुर्दशीम्
श्राद्धकर्मणि तिथ्यः स्युः प्रशस्ता न तथेतराः
Krishnapakshe dashamyadau varjayitva chaturdashim
Shraddhakarmani tithyah syuh prashasta na tathetarah
87.19
यथा चैवापरः पक्षः पूर्वपक्षाद्विशिष्यते
तथा श्राद्धस्य पूर्वाह्णादपराह्णो विशिष्यते
Yatha chaivaparah pakshah purvapakshadvishishyate
Tatha shraddhasya purvahnadaparahno vishishyate