UtshovChapter 88
88.1
युधिष्ठिर उवाच
किं स्विद्दत्तं पितृभ्यो वै भवत्यक्षयमीश्वर
किं हविश्चिररात्राय किमानन्त्याय कल्पते
Yudhishthira uvacha
Kim sviddattam pitribhyo vai bhavatyakshayamishvara
Kim havishchiraratraya kimanantyaya kalpate
88.2
भीष्म उवाच
हवींषि श्राद्धकल्पे तु यानि श्राद्धविदो विदुः
तानि मे शृणु काम्यानि फलं चैषां युधिष्ठिर
Bhishma uvacha
Havinshi shraddhakalpe tu yani shraddhavido viduh
Tani me shrinu kamyani phalam chaisham yudhishthira
88.3
तिलैर्व्रीहियवैर्माषैरद्भिर्मूलफलैस्तथा
दत्तेन मासं प्रीयन्ते श्राद्धेन पितरो नृप
Tilairvrihiyavairmashairadbhirmulaphalaistatha
Dattena masam priyante shraddhena pitaro nripa
88.4
वर्धमानतिलं श्राद्धमक्षयं मनुरब्रवीत्
सर्वेष्वेव तु भोज्येषु तिलाः प्राधान्यतः स्मृताः
Vardhamanatilam shraddhamakshayam manurabravit
Sarveshveva tu bhojyeshu tilah pradhanyatah smritah
88.5
द्वौ मासौ तु भवेत्तृप्तिर्मत्स्यैः पितृगणस्य ह
त्रीन्मासानाविकेनाहुश्चातुर्मास्यं शशेन तु
Dvau masau tu bhavettriptirmatsyaih pitriganasya ha
Trinmasanavikenahushchaturmasyam shashena tu
88.6
आजेन मासान्प्रीयन्ते पञ्चैव पितरो नृप
वाराहेण तु षण्मासान्सप्त वै शाकुनेन तु
Ajena masanpriyante panchaiva pitaro nripa
Varahena tu shanmasansapta vai shakunena tu
88.7
मासानष्टौ पार्षतेन रौरवेण नवैव तु
गवयस्य तु मांसेन तृप्तिः स्याद्दशमासिकी
Masanashtau parshatena rauravena navaiva tu
Gavayasya tu mansena triptih syaddashamasiki
88.8
मासानेकादश प्रीतिः पितॄणां माहिषेण तु
गव्येन दत्ते श्राद्धे तु संवत्सरमिहोच्यते
Masanekadasha pritih pitrinam mahishena tu
Gavyena datte shraddhe tu sanvatsaramihochyate
88.9
यथा गव्यं तथा युक्तं पायसं सर्पिषा सह
वाध्रीणसस्य मांसेन तृप्तिर्द्वादशवार्षिकी
Yatha gavyam tatha yuktam payasam sarpisha saha
Vadhrinasasya mansena triptirdvadashavarshiki
88.10
आनन्त्याय भवेद्दत्तं खड्गमांसं पितृक्षये
कालशाकं च लौहं चाप्यानन्त्यं छाग उच्यते
Anantyaya bhaveddattam khadgamansam pitrikshaye
Kalashakam cha lauham chapyanantyam chhaga uchyate
88.11
गाथाश्चाप्यत्र गायन्ति पितृगीता युधिष्ठिर
सनत्कुमारो भगवान्पुरा मय्यभ्यभाषत
Gathashchapyatra gayanti pitrigita yudhishthira
Sanatkumaro bhagavanpura mayyabhyabhashata
88.12
अपि नः स कुले जायाद्यो नो दद्यात्त्रयोदशीम्
मघासु सर्पिषा युक्तं पायसं दक्षिणायने
Api nah sa kule jayadyo no dadyattrayodashim
Maghasu sarpisha yuktam payasam dakshinayane
88.13
आजेन वापि लौहेन मघास्वेव यतव्रतः
हस्तिच्छायासु विधिवत्कर्णव्यजनवीजितम्
Ajena vapi lauhena maghasveva yatavratah
Hastichchhayasu vidhivatkarnavyajanavijitam
88.14
एष्टव्या बहवः पुत्रा यद्येकोऽपि गयां व्रजेत्
यत्रासौ प्रथितो लोकेष्वक्षय्यकरणो वटः
Eshtavya bahavah putra yadyekopi gayam vrajet
Yatrasau prathito lokeshvakshayyakarano vatah
88.15
आपो मूलं फलं मांसमन्नं वापि पितृक्षये
यत्किंचिन्मधुसंमिश्रं तदानन्त्याय कल्पते
Apo mulam phalam mansamannam vapi pitrikshaye
Yatkinchinmadhusammishram tadanantyaya kalpate