অধ্যায় 88

88.1

যুধিষ্ঠির উবাচ
কিং স্বিদ্দত্তং পিতৃভ্যো বৈ ভবত্যক্ষয়মীশ্বর
কিং হবিশ্চিররাত্রায় কিমানন্ত্যায় কল্পতে

ভীষ্ম উবাচ
হবীংষি শ্রাদ্ধকল্পে তু যানি শ্রাদ্ধবিদো বিদুঃ
তানি মে শৃণু কাম্যানি ফলং চৈষাং যুধিষ্ঠির

তিলৈর্ব্রীহিয়বৈর্মাষৈরদ্ভির্মূলফলৈস্তথা
দত্তেন মাসং প্রীয়ন্তে শ্রাদ্ধেন পিতরো নৃপ

বর্ধমানতিলং শ্রাদ্ধমক্ষয়ং মনুরব্রবীৎ
সর্বেষ্বেব তু ভোজ্যেষু তিলাঃ প্রাধান্যতঃ স্মৃতাঃ

দ্বৌ মাসৌ তু ভবেত্তৃপ্তির্মত্স্যৈঃ পিতৃগণস্য হ
ত্রীন্মাসানাবিকেনাহুশ্চাতুর্মাস্যং শশেন তু

আজেন মাসান্প্রীয়ন্তে পঞ্চৈব পিতরো নৃপ
বারাহেণ তু ষণ্মাসান্সপ্ত বৈ শাকুনেন তু

মাসানষ্টৌ পার্ষতেন রৌরবেণ নবৈব তু
গবয়স্য তু মাংসেন তৃপ্তিঃ স্যাদ্দশমাসিকী

মাসানেকাদশ প্রীতিঃ পিতৄণাং মাহিষেণ তু
গব্যেন দত্তে শ্রাদ্ধে তু সংবত্সরমিহোচ্যতে

যথা গব্যং তথা যুক্তং পায়সং সর্পিষা সহ
বাধ্রীণসস্য মাংসেন তৃপ্তির্দ্বাদশবার্ষিকী

আনন্ত্যায় ভবেদ্দত্তং খড্গমাংসং পিতৃক্ষয়ে
কালশাকং চ লৌহং চাপ্যানন্ত্যং ছাগ উচ্যতে

গাথাশ্চাপ্যত্র গায়ন্তি পিতৃগীতা যুধিষ্ঠির
সনত্কুমারো ভগবান্পুরা ময্যভ্যভাষত

অপি নঃ স কুলে জায়াদ্যো নো দদ্যাত্ত্রয়োদশীম্
মঘাসু সর্পিষা যুক্তং পায়সং দক্ষিণায়নে

আজেন বাপি লৌহেন মঘাস্বেব যতব্রতঃ
হস্তিচ্ছায়াসু বিধিবত্কর্ণব্যজনবীজিতম্

এষ্টব্যা বহবঃ পুত্রা যদ্যেকোঽপি গয়াং ব্রজেৎ
যত্রাসৌ প্রথিতো লোকেষ্বক্ষয্যকরণো বটঃ

আপো মূলং ফলং মাংসমন্নং বাপি পিতৃক্ষয়ে
যত্কিংচিন্মধুসংমিশ্রং তদানন্ত্যায় কল্পতে