Utshovঅধ্যায় 89
89.1
ভীষ্ম উবাচ
যমস্তু যানি শ্রাদ্ধানি প্রোবাচ শশবিন্দবে
তানি মে শৃণু কাম্যানি নক্ষত্রেষু পৃথক্পৃথক্
89.2
শ্রাদ্ধং যঃ কৃত্তিকায়োগে কুর্বীত সততং নরঃ
অগ্নীনাধায় সাপত্যো যজেত বিগতজ্বরঃ
89.3
অপত্যকামো রোহিণ্যামোজস্কামো মৃগোত্তমে
ক্রূরকর্মা দদচ্ছ্রাদ্ধমার্দ্রায়াং মানবো ভবেৎ
89.4
কৃষিভাগী ভবেন্মর্ত্যঃ কুর্বঞ্শ্রাদ্ধং পুনর্বসৌ
পুষ্টিকামোঽথ পুষ্যেণ শ্রাদ্ধমীহেত মানবঃ
89.5
আশ্লেষায়াং দদচ্ছ্রাদ্ধং বীরান্পুত্রান্প্রজায়তে
জ্ঞাতীনাং তু ভবেচ্ছ্রেষ্ঠো মঘাসু শ্রাদ্ধমাবপন্
89.6
ফল্গুনীষু দদচ্ছ্রাদ্ধং সুভগঃ শ্রাদ্ধদো ভবেৎ
অপত্যভাগুত্তরাসু হস্তেন ফলভাগ্ভবেৎ
89.7
চিত্রায়াং তু দদচ্ছ্রাদ্ধং লভেদ্রূপবতঃ সুতান্
স্বাতিয়োগে পিতৄনর্চ্য বাণিজ্যমুপজীবতি
89.8
বহুপুত্রো বিশাখাসু পিত্র্যমীহন্ভবেন্নরঃ
অনুরাধাসু কুর্বাণো রাজচক্রং প্রবর্তয়েৎ
89.9
আদিপত্যং ব্রজেন্মর্ত্যো জ্যেষ্ঠায়ামপবর্জয়ন্
নরঃ কুরুকুলশ্রেষ্ঠ শ্রদ্ধাদমপুরঃসরঃ
89.10
মূলে ত্বারোগ্যমর্চ্ছেত যশোঽষাঢাস্বনুত্তমম্
উত্তরাসু ত্বষাঢাসু বীতশোকশ্চরেন্মহীম্
89.11
শ্রাদ্ধং ত্বভিজিতা কুর্বন্বিদ্যাং শ্রেষ্ঠামবাপ্নুয়াৎ
শ্রবণে তু দদচ্ছ্রাদ্ধং প্রেত্য গচ্ছেত্পরাং গতিম্
89.12
রাজ্যভাগী ধনিষ্ঠায়াং প্রাপ্নুয়ান্নাপদং নরঃ
নক্ষত্রে বারুণে কুর্বন্ভিষক্সিদ্ধিমবাপ্নুয়াৎ
89.13
পূর্বপ্রোষ্ঠপদাঃ কুর্বন্বহু বিন্দেদজাবিকম্
উত্তরাস্বথ কুর্বাণো বিন্দতে গাঃ সহস্রশঃ
89.14
বহুরূপ্যকৃতং বিত্তং বিন্দতে রেবতীং শ্রিতঃ
অশ্বাংশ্চাশ্বয়ুজে বেত্তি ভরণীষ্বায়ুরুত্তমম্
89.15
ইমং শ্রাদ্ধবিধিং শ্রুত্বা শশবিন্দুস্তথাকরোৎ
অক্লেশেনাজয়চ্চাপি মহীং সোঽনুশশাস হ